Babilooniya di elo
18
Ban na wahaw uwu uhulhum, nijuk amalaakaw aahu abaam sembe noon ma awalowulom hatiya di emitay, ña majaaŋaamu matawool di muhikiten etaamay pooyo. 2 Ña nâŋaaŋulo di sembe ma ya âanul:“Babilooniya elowe!
Êsukay yâmakaay yata Babilooniya elowe!
Elaañe ban ega hukinahu hata kumalaku,
di hata uynumaw wajakutaaw,
di hata basuwaabu bâgiipunenim, ban bûsuumut kajiker.
3 Mata âmbasuk peh kujakene ban bunukabu bata hubirikahu hata mata kâmooraaku ka ekaayem.
Kîyyaku kata âmbasuk peh ya kukay kâmooraaku di yo.
Bunoomaabu poop bata wahaw kata di etaamay, di kusaanumo poop hurim mata bâpuñuworiitabu bata yo.”
4 Ña nijam hurimahu haahu hatiya di emitay hammi:
“Bukanaku kûmbaam, jîcaalh di êsukay uyu,
ma aatuba mbi jêemi di kûbajumiñaku kata yo,
ma aatuba mbi jibommi poop di yo na mbi iles yo.
5 Mata kûbajumiñaku kata Babilooniya koku ma kulakenoorum be hatiya di emitay.
Moo, Emitay êwukent mata malesamu mata yo.
6 Moo, jiga yo manoramu non ma egawuum;
di jincaam yo ñagaba wahaw wa egawuum;
jikoopaaju jata yo jata mujakenumaayamu ma eyoolhum ewuluul,
jimeeŋen jo ma jiwuu'yo ñeemo ñagaba.
7 Di jiga yo di hûlaamahu, di poop hûsonjaahu,
jirewen di maama ebañem ma ya egawooro.
Mata di hunongahu hata yo ya êenul:
‘Înje ma ilakom jak non apañoor ây;
igawut âkutuwaata, eetubi ibajurer poop ñikul.’
8 Momakiimom di huk hanor keb, hûlaamahu mbi hûlowum yo hata:
eketay, di ñikulañu, di poop bacaarabu.
Ban di êbolum yo sambunasu,
mata Ata Emit ata sembaasu agayom batalenabu.”
9 Ña kîyyaku kata di etaamay kagam kûbajumiñaku di yo, ka ya kalakom poop di mâsuumaamu di yo, mbi kukaaw ma kulhooŋooro mata ma kujuum ekooliitay yata sambunasu sa ya sâludom. 10 Ban ma kûkolim mata hûlaama'uhu, mbi kujuum rângi, ma ya kêenul:
“Awo! Awo! Babilooniya, aw jagam êsukay yabaam sembe!
Be di ewooraay yanor keb, batalenabu batayi bûrillo.”
11 Ña bûjulaabu bata wahaw kata di etaamay, mbi kukaaw ma kulhooŋooro mata yo, mata an aatubi anoomurer dô joon wah wakeel, 12 wagam non ûuru, di praata, di bawaalisabu baseeraabu, di peerola, di ehulay yagawaay bururur, di yaayu yâyemaay hûp, di yaayu yaaneyim seeda, di yaayu yâyemaay kêp; di utaaguwa peh waputaaw sûum, di wahaw peh wacookoorumim usiiraw wata siñaabasu, di waawu wacookoorumim utaaguwaaw waseeraaw, di kûgebaayaku, di muhaañaayamu, di poop kuwaaliisaku kaaneyim marmori. 13 An aatubi aali poop ânon'dô joon wahaw waputem sûum waaneyim kanela, di waawu waaneyim krabu, di muheeñamu, di miira, di ebaaliinay; di poop bunukabu, di êduuliinay, di baporabu, di trîigu, di uncaamaw wâmakaaw, di sîgaraniinaasu, di sipilinjasu; di poop sisareetasu, di emiikeelay, di poop bukan kaaku. 14 Ban mbi ya kêenul: “Wahaw peh wa aw ûkinemmi noon ûbuyuwe ban; husaanumahu, di majakaamu matayi mûbuyuwe ban; moo, an aatinki ajukurer wo joon.”
15 Bunoomaabu bata wahaw uwu, kasaanumom mata yo, mbi kujuum rângi hurim bûkolaabu bata buhiiraa'ubu bâlowmi êsuka'uyu ma ya kukaaw ma ya kulhooŋooro, 16 ma ya kêenul:
“Awo! Awo! Êsukay yâmakaay,
aw jalhiimuweenem wañaw wata ehulay yagawaay bururur,
di yaayu yâyemaay hûp, di yaayu yâyemaay kêp;
jâsangenooruwem ûuru,
di bawaalisabu baseeraabu, di poop peerola.”
17 Be di ewooraay yanor keb, husaanumahu hatayi peh mbi hûbuyo. Moo, buniiwaabu bata sibaarukasu, di kaaku kâjupuwedom, di bugorooraabu bata dô, di poop bûjulaabu bata di kulhuwaku, mbi kujuum rângi. 18 Ma ya kujiker ekooliitay yata hubolaahu hata yo, ban ya kûŋaaŋulo ma ya kêenul: “Êsuk bu yeelim eliiki di êsuka'uye yâmakaay?” 19 Ña di kuhoonen kûkuwaku katayiil ekapay ma ya kûruuren ma kulhooŋooro ma ya kûŋaaŋulo kêenul:
“Awo! Awo! Êsukay yâmakaay!
Aw jagam ma kata sibaarukasu peh kakayem di kulhuwaku kusaanumo,
be di ewooraay yanor keb,
husaanumahu hatayi peh di hûbuyo.
20 Moo, aw hatiya di emitay, ûririgen,
miwuul bunapaabu, di kumakaaku kata Jesus, di buñaaŋenaabu bata kûboñaku kata Emitay jîririgen.
Mata yoo egayom batalenabu hurim wahaw wa egawuum.”
21 Ña amalaakaw aahu ata sembaasu, nârallhul huwaaliisahu hâamak harem non hata mowiñu ma âraacuu'hô di kasamaaku, ban nâanul:
“Mo ma mbi êsuka'uyu yâmakaay yata Babilooniya, eraaci di sembe,
ban an aatinki ajukurer yo joon.
22 Ña kare, an aatinki ajamurer bâyimper bata aarpa,
palimo buyeeŋa,
palimo bulhiitaabu bata silhiitasu,
palimo poop bârimer bata kârim.
Deetinki bajurer dâada di kukalaku katayi,
acookoora ata wah wakeel.
Deetinki jamureri di tutaru tatayi, baweler bata etamp.
23 Majaaŋaamu mata ehikitenum metunki mujuki joon d'aw;
karim kata bûbutuwaabu keetubi kujamureri poop d'aw,
mata bûjulaabu bata wahaw watayi, kugawengawemmi bukanaku kâamak di etaamay,
mata ma ya ubuntemmi êsukay peh di musaayamu matayi.
24 Ban d'aw hûsimahu hujukim hata buñaaŋenaabu bata kûboñaku kata Emitay,
di hata bukanaku kanapaaku kata yo,
di poop hata bukan kaaku peh kaŋaalim di etaamay.”