Anñaakanaw agam êkusumay
17
Ban amalaakaw aahu ata di buku hutok di egabaay kaakum siboolasu, nâkayil ki atookon to ma aanom: “Bila ma îyisi anñaakanaw umu agam êkusumay abaam êriibiinaay, ammi ma aleehom di mumelamu maama mbi alesi. 2 Mata kîyyaku kata di etaamay ya kukumemmi d'oo, poopii bukanaku kata âmbasuk peh di kûkali mata kâgawikooraku katawool.”3 Ban amalaakaw umu naŋarom di buynumabu be di ekinkay, îriiŋ nijuk anñaakanaw ma ageelom beesta êyem hûp, ban di yeen huc uñaaŋaw wata kûgelaku waloom kôji be bata Emitay; ban di ebaj kûkuwaku hutok di kugaba, di poop usiinaw kunŋen. 4 Anñaakanaw umu oo ma alhiimom wañaw wâyemmi hûp, di ûyem poop kêp, ban di ûsangenumi ûuru, di bawaalisabu baseeraabu, di poop baabu baaneyim peerola. Ban nasoh ekoopaay yata ûuru yammi huc wahaw wajakutaaw, di poop wâhikooraw wata kâmooraaku ka akayem. 5 Ban di hûriiŋahu hatawool, di ŋiici dô kañaaŋaku ka an aaliitum anamulen maama kûkimmi kulob, kammi: “Babilooniya Yâmakaay, yagam iñaaw sîkusumasu, di poop wâhikooraw wata di etaamay.” 6 Be nijuk kaan anñaakanaw umu, omu ma âkalim hûsimahu hata bukanaku kanapaaku, di poop hata bukanaku kalobem mata Jesus kabujim. Be na ijukoom, ña nîjanaŋen kaŋ noon.
7 Ña amalaakaw umu narinkom ma aanom: “Kama mata wa nujaahali? Jijaa, mbi iñaaŋeni wahaw wa an âmirutum mata anñaakana'umu, di poop mata beesta uyu yaakum kûkuwaku hutok di kugaba, di poop usiinaw kunŋen. 8 Jijaa, beesta uyu ya ujuum umu, malhegen eroŋeroŋemmi, be mowme eroŋut, mata ma êŋoolul di husunahu hâlahaahu ma ekay be di hûjimenahu. Moo, bukanaku kammi di etaamay ka uñaaŋaw watayiil uleem ma uŋiicim di kaytaku kata eroŋay kata kaŋ na êwwenim, mbi kujaahali na mbi kujuk beesta uyu yarommi, ban eroŋut joon, na mbi êcaalhul.
9 “Moo, ute majaalhaamu mentom. Mata kûkuwa'uku kaamom hutok di kugaba, koo kugam kurimbiliŋa'uku hutok di kugaba, da añakanaw umu aleehom. Kurimbiliŋa'uku poop, koo kugam kîyyaku hutok di egaba. 10 Moo, hutok kulowe ban, ma anor antom ma aleehom para di kâyyaku, aahu âriiŋorulloot. Be na mbi âriiŋul, aatubi alako di kâyyaku piyo. 11 Beesta poop uyu yaroŋemmi, ban eroŋutum ban, yoo egam âyyaw aahu agawiim hutok di êhaaji. Moo, yoo ereesem be di hûjimenahu.
12 “Usiinaw uwu poop waamom kunŋenay wa ujuum, woo ugam kîyyaku kaleehuworutum di ûyyaw; be mbi kuwuli sembaasu ma keeli kuleeho di ûyyaw watayiil di manor di beesta ewooraay yanor. 13 Ban kûyya'uku kunŋenay hunongahu hanor keekum, ma ya kuwul sembaasu, di hunnahaanowutaahu hatayiil besta'uyu. 14 Ma kutiik di Êgaraniinaay; be Êgaraniinaay di ehaatiil, mata yoo egam Ata Emit ahammi atamitii peh, di ega poop Âyyaw ahammi kîyyaku peh. Ban bukanaku poop ka âwoom, ka ajotum, kâynenoom, ban di kêemi d'oo, mbi kuhaat poop.”
15 Ban amalaakaw umu naanom joon: “Jijaa, mumela'umu da anñaakanaw agam êkusumay aleehom, ûdu buyooŋabu bata bukanaku, di siheetasu, di bâsukabu, di poop silobasu. 16 Usiinaw uwu kunŋenay wa ujuum, di poop beesta, mbi ûsuumaati anñaakanaw umu agam êkusumay. Mbi uyab wahaw peh wa anñaakanaw umu agam êkusumay aakum, ma uwalhoo'to way, ban mbi utokoñool, eluway yaŋañunom nureemen yo di sambunasu. 17 Mata Emitay egam kûyya'uku ma kuga wahaw wa yoo êkimmi. Ña di egawiil ma kubaj hunongahu ma kuwalen ûyyaw watayiil ma beesta ega annahaanaw ii be na wahaw wa Emitay eloom di wo ugam.
18 “Moo, anñaakanaw umu a ujuum umu, oo êsukay yâamak, ban naga annahaanaw ata kûyyaku kata etaamay.”