Siboolasu sata hubirikahu hata Emitay
16
Ban nijam hurimahu hawenjum hâcaalhumulom tiŋatu tâñoyyaatu di bûngungabu bata Emitay ma ya hulob di kumalaaka'uku hutok di egabaay ma heeniil: “Jikay ki jîhip di etaamay siboola'usu hutok di sigaba sata hubirikahu hata Emitay.”2 Ña amalaakaw âtiyaaraw nakay ki âhip eboolay yatawool di etaamay, saakasu sâkoliyenim sâsonjiyem noon, di silako di bukanaku kaakum êmanjumay yata beesta, ban ya kûbinken ebandapaaray yata yo.
3 Amalaakaw agabutaw nâhip poop eboolay yatawool di kasamaaku, ña di kulaañ keeno non hûsim hata wah wabuji, ña wahaw peh waroŋaaw wândom di uket.
4 Amalaakaw âhaajutaw nâhip poop eboolay yatawool di waalaw, di poop uyelenooraaw, ña mumelamu di mulaañ muga hûsimahu. 5 Ña nijam amalaakaw akiim mata mumelamu ma ya ammi:
“Ata Emit, aw anaw acolum, ban nunap,
aamom âamiyaalitom, antom be nanoonan;
ban batalenabu ba ugawem bacolaabu.
6 Mata non ma kûhipum hûsimahu hata bukanaku katayi,
di poop hata buñaaŋenaabu bata kûboñaku katayi,
mo ma uwulumiim poop hûsimahu kusiben non ma kujommi.”
7 Ban nijam hurimahu hâcaalhumulom di Altar, ha ya hammi:
“Malhegen Ata Emit, akiim sembe peh,
batalenabu batayi, batalenabu balhegenumaayabu, ban di bucol.”
8 Ban amalaakaw abakiirenaw nâhip poop eboolay yatawool di jaley, ña nâhaah kaŋ cûm ma abol bukanaku. 9 Be bukana'uku ma kubolumim mâhaahaamu marem noon, ña di kûlobikoor mata kañaaŋaku kata Emitay, yaamom yakiim mata hûlaama'uhu, ma kulat kawatatenooro mata kûbajumiñaku katayiil, palimo poop ma kusal Emitay.
10 Amalaakaw atokenaw nâhipul eboolay yatawool di hulhikahu hata beesta, ña kâyyaku kata yo pooko di kumuucen mib, ña bukanaku ya kurum kûlelempaku hurim hûsonjaahu. 11 Ña ya kugel Emitay yammi hatiya hurim ma kûsonjim, di poop mata saakasu salakom di buko, ma kulat kawatatenooro mata wahaw wajakutaaw wa kugam.
12 Ban amalaakaw agawiim hutok di anor, nâhip eboolay yatawool di hulhuwahu hâmakaahu aaneyim Ewphratis. Ña hulhuwa'uhu di hulhaal ma huga buruŋabu bata kîyyaku ka mbi kûbimmul di karebaku ka jaley âcaalhumewuum. 13 Ban nijuk uynumaw ûhaaji wajakutaaw wanaamoorum non kuraacooruwa wa ya wâcaalhumulom di butumabu bata dragoŋ, di bata beesta, di poop bata añaaŋenaaw ata kûboñaku kata simitasu agawutum alhegenumaayaw. 14 Buynuma'ubu, uynumaw wata kumalaku wagawem miñamu mata sembaasu sata Esatanaay, wa mbi ukay ki utoo'bo kîyaku kata etaamay pooyo, ma ubom di ko ma mbi kutiik nata hukahu hâmakaahu hata Emitay Yakiim Sembe Peh.
15 Ban Ata Emit nâanul: “Jitallhen, mbi îkayil wûb non âkuuta. Moo, bukanaku kaleem ma kuŋotem, kammi ma kupooyem di wañaw watayiil ma keetubi kulako to barindiŋ, di kupuño di êsukay, kubaje hûpiira.”
16 Ña uynumaw uwu wajakutaaw di ubom kîyyaku di tiŋatu ta êbrewwi keenem Armajedoŋ.a
17 Ban amalaakaw agawiim hutok di egaba, nâhip eboolay yatawool di ehentelaay. Ña hurimahu hawenjum noon di hûcaalhumul di hulhikahu di eluupay yata Emitay hammi: “Ña gawi ban.” 18 Ña di baano bawajuwajerabu, di bâlunderabu, di poop uraranjuunaw. Etaamay di eboboken pooyo, ma kôliyeni noon. Babobokenara'ubu noo kaŋ noo na ejamaatay kemmi di etaamay, bajorut bakeel baremo. 19 Ña êsuka'uyu yâmakaay, di êgiitoor ma ega urebaw ûhaaji. Saasu pooso sagam sâmakaasu, di siwapi. Be Emitay di ewollho ma mbi eles êsukay yâmakaay yata Babilooniya, ña di ewuu'yo jikoopaaju jata bunukabu bata hubirikahu hata yo. 20 Ña sîsukasu peh sammi di aŋoomenooruwayi, di poop kurimbiliŋaku di sinep. 21 Emitay di êlubul kunkaamaku kata mumelamu kaalim kûriiŋ sîkilaasu bukanaku egaba (40), ma kûlowum bukanaku. Ña bukanaku di kugel Emitay, mata ma elesumiim kuwaalisa'uku karem noon.