Hûlaamahu hûbanumahu
15
Ban nijuu'joon hatiya di emitay êmanjumay yâamak ya mbi ujuk nujaahali: yagam yata kumalaakaku hutok di egaba kaakum kûlaamaku hutok di kugaba kûbanumaku kâriremmi hubirikahu hata Emitay.2 Ña nijuk wahaw wanaamoorum non kasamaaku kata kajukoorum, kâguusoorum di sambunasu. Nijuu'poop bukanaku kahaatum beesta, di ebandapaaray yata yo, di poop ênuumeray yata kañaaŋaku kata yo, ma kujummi hûg kasamaa'uku, ban di kusoh aarpa sa Emitay ewuliim. 3 Ma ya kuyeeŋ kañaaŋaku kata Moyses agam agorooraaw ata Emitay, di poop kata Êgaraniinaay ma ya kêenul:
“Ata Emit, aw Emitay Yakiim Sembe Peh,
wahaw wa ugam wâamak, ban anaw ajam wo jaa nâjanaŋen!
Ây, aw jagam âyyaw ata âmbasuk peh, buruŋabu batayi, buruŋabu bacolum, ban balhegenumaayabu!
4 Ata Emit, aymoom aatumbi âkoliyi?
Aymoom aatumbi asal kañaaŋaku katayi?
Mata aw kaŋ keb ugam anaw anapaaw; momakiimom ma
âmbasuk peh mbi kûkayil be kayooŋ d'aw ma kûbinkeni,
mata wahaw wa ugam walhegenumaayaw,
bukanaku peh kujuu'wo.”
5 Ban nijuk tiŋatu tâñoyyaatu hatiya di emitay, ma bûngungabu bata yaŋaayay yata Emitay di ejamaatay bûbabulom. 6 Ña kumalaakaku hutok di egaba, kakiim mata kûlaamaku hutok di kugaba, di kûcaalhumul tiŋootu tâñoyyaatu koo ma kûjupom wañaw wata ehulay elhegenumaayay yagam wajwaj, ban di kukoko poop ubaŋaw wata ûuru di sîsigirasu satayiil. 7 Aahu ata di wahaw uwu ubakiiraw waroŋaaw, nawul kumalaaka'uku kaamom hutok di egaba, siboolasu hutok di sigaba sammi huc hubirikahu hata Emitay yantom ma erommi be nanoonan. 8 Ña tiŋa'utu tâñoyyaatu tata bûngungabu bata Emitay, di ten huc hakoorahu hata majaaŋaamu, di poop sembaasu sata yo. Ña an aaliit anebee'dô be kaŋ na mbi kûlaama'uku kaamom hutok di kugaba kubawo, ka kumalaaka'uku hutok di egabaay kuŋallom.