Êgaraniinaay di bukanaku kata yo
14
Ban nijuk Êgaraniinaay ma ejummi di hurimbiliŋahu haaneyim Siyoŋ, bukanaku koo too di yo katoom sînjunnaasu êteemeer di bukanaku egaba, di ebakiir (144.000), kaŋiicim di kûriiŋaku katayiil kañaaŋaku kata yo, di poo kata Ampaw yo.2 Nijam poop hurimahu hâcaalhumulom hatiya di emitay ha ya haloloboorum non mumel mayeje, ma hulhok non bâlunder bata kararanjuun, nijam poop bâyimperabu non bukan kûyimpem di sikontiŋasu saaneyim aarpa. 3 Ma ya kuyeeŋ kañaaŋaku kunkulaku kayooŋ di hulhikahu, di kayooŋ wahaw uwu ubakiiraw waroŋaaw, di poop kayooŋ yahaana'uyu. Be an aaliit kañaaŋa'uku, be buko keb keelikom kaamom sînjunnaasu êteemeer, di bukanaku egaba di ebakiir (144.000), kanoomulim di etaamay. 4 Mata buke koo bukanaku kasemenoorowutum di yaaraay, mata buko bukanaku kakayitum kâmooraaku. Be ya kusoollhen Êgaraniinaay be tiŋ peh ta ereesem be. Moo, buko ko kanoomulim di tutaru tata ejamaatay ma kuga bukanaku kâtiyaaraku be bata Emitay, di poop Êgaraniinaay. 5 Mata wah wata mûcal ujamuti di utumaw watayiil, ban poop kubajut wah wa an aalim awatatenumiil.
Kumalaakaku êhaajiyaay
6 Ban nijuk amalaakaw aahu oo ma âyitem hatiya di emitay, oo di elobay yâsuumaay yâbaworiitaay, ya nki añaaŋen bukanaku kammi di etaamay peh, di âmbasuk peh, di eheet peh, di silob peh, di poop êsuk peh. 7 Ma ya âŋaaŋulo ma âanul: “Jîkoli Emitay ma ya jisal yo, mata hukahu hata yo hûriiŋe ma ega batalenabu; di jîbinken yo mata yoo ecookoom hatiya di emitay, di etaamay, di kasamaaku, di poop uyelenooraaw wata mumelamu.”
8 Na amalaakaw âtiyaaraw aloom aban, ña aahu agabutaw nasoolhellool ma ya âanul: “Babilooniya elowe ban, Babilooniya yâmakaay elowe ban! Yagam âmbasuk peh kûkali bunukabu bata hubirikahu hata kâmooraaku kata yo.”
9 Ban amalaakaw âhaajutaw nâsoolhenul umu ma ya âŋaaŋulo lhînŋa ma âanul: “Anaw âbinken jaa beesta, di poop ebandapaaray yata yo ma agawi êmanjumay di hûriiŋahu, be mante di kaŋenaku katawool, 10 anaw umu poop, mbi ajaken di bunukabu bata hubirikahu hata Emitay, bayoolhutim, bakalhim di ekoopaay yata hubirikahu hata yo. Ma mbi alesumi sambunasu sata ensoophri sâbaworiitum, kayooŋ kumalaakaku kanapaaku kata yo, di poop Êgaraniinaay. 11 Ña ekooliitay yata sambunasu sata ta kulhesim, di eŋool be nanoonan. Moo, bukana'uku kâbinkenem beesta, di poop ebandapaaray yata yo, di kaaku kagawim êmanjumay yata kañaaŋaku kata yo, kubajut kahepulen tutulay, di poop busonna.” 12 Moo, jake ma bûynenaabu bata Emitay kujuum tir, kaamom kajamem di kûboñaku kata yo, ban di kenken ma kûynen Jesus.
13 Ban nijam hurimahu hatiya di emitay ha ya hammi: “Uŋiic ma ooniil, bukanaku kakeem mowme koo ma kûynemmi di Ata Emit, kubaje hûpiira.”
Buynum Bunapaabu di bêenul: “Malhegen, mbi kuhepulen hûlaamahu, moo, ugorooraw watayiil wa kugam mbi usiseniil.”
Ejalay yâbanumay
14 Ban nijuk kawiiñaku kûtumpaay, anaw dôo ma aleehom hatiya di ko anaamoorum non añool ajamaat, oo ma ânkuuhom ênkuuhaay yata ûuru yata bûgaalabu, ban nasoh kagitumaku kayabum noon. 15 Ña amalaakaw aahu nâcaalhumul di eluupay yata Emitay, ma ya âŋaaŋulo di sembe anaw umu aleehom di kawiiñaku ma ya aanool: “Uŋar kagitumaku katayi ma ugit, mata ejalay êriiŋe ban, kalhaakaku kata etaamay kutate ban.” 16 Ña anaw aleehom di kawiiñaku naŋar kagitumaku katawool aga di etaamay ma agit kalhaaka'uku.
17 Be amalaakaw aahu nâcaalhumul di eluupay yata Emitay yammi hatiya, oo ma asoom poop kagitumaku kayabum noon.
18 Ban amalaakaw aahu akiim mata sambunasu nâcaalhumul di Altar, ma ya âŋaaŋulo umu aakum kagitumaku kayabum noon, ma aanool: “Uŋar kagitumaku katayi ma atij ûuba yammi di etaamay, mata utokosaw wata yo utate ban.” 19 Ña naŋar kagitumaku katawool ma atij utokosaw wata ûuba sammi di etaamay, ban nabee'wo di hûbarikahu hâamak hata jaguncenaju, hâyisum hubirikahu hata Emitay. 20 Ban ûuba di egunceni di hûbarika'uhu tîyaŋ di êsukay, ña hûsimahu di hûcaalhul di hûbarika'uhu poopii di took mâlahaamu mârimmi di butumabu bata epilinj, buyalaabu bata ho di butey sibankasu sârimmi sikilometrasu sîteemeerasu sîhaaji (300).