Beesta yâcaalhumulom di kasamaaku
13
Ban nijuk beesta yâcaalhumulom di kasamaaku yabaam usiinaw kunŋen, di poop kûkuwaku hutok di kugaba. Ban hatiya di usiina'uwu di ebaa'dô sînkuuhaasu kunŋen sata bûgaalabu. Di hûkuwoohukow poop di ŋiici dô kañaaŋaku kata kûgelaku be bata Emitay. 2 Be beesta uyu ya ijuum di enaamoor non esaamaay, ban ûkandumaw wata yo di unaamoor non wata ûrsu, butumabu bata yo di bunaamoor non bata êŋaŋ. Ña dragoŋ di ewuu'yo sembaasu sata yo, di hulhikahu hata yo, di poop hunnahaanowutaahu hata yo. 3 Di hûkuwahu haahu hata beesta uyu, di naamoor non hucoka hata eket hêndo, be hucoka'uhu hoo bâjuwee'ban; ña bukanaku kata âmbasuk peh di kujaahali mata beesta uyu, ña di kusoolhen yo. 4 Ña di kûbinken poop dragoŋ mata ma ewuum hunnahaanowutaahu hata yo beesta ma ya kêenul: “Aymoom anaamoom di beesta uye? Aymoom aalim atiik di yo?”5 Be beesta uyu di ewuli buruŋ ma ya elob bûlaatabu, di êlobikoor poop be bata Emitay. Ban di ewuli poop sembaasu ma ega annahaanaw kulheeŋaku bukanaku egaba di kugaba; 6 ma ya êlobikoor be bata Emitay, di êlobikoor mata kañaaŋaku kata yo, di êlobikoor mata hukinahu hata yo, di poop mata bukanaku kakimmi hatiya di emitay. 7 Ban di ewuli buruŋ ma etiik bukanaku kata Emitay ma eheekiil. Di ewuli poop sembaasu ma ega annahaanaw ata siheetasu peh, di silob peh, di poop âmbasuk peh. 8 Ña bukanaku peh kakimmi di etaamay di kûbinken yo, kaamom ka uñaaŋaw watayiil uleem ma uŋiicim kata kaŋ niŋanu di hûcukumahu hata etaamay, di êliibray yata eroŋay yata êgaraniinaay yaamom yabujim.
9 Moo, anaw abaam ûjaŋay natallhen ma ajam. 10 Mata anoowan añuurim ma mbi aŋari be humiikeelowutaahu, mbi akay be bo. Anaw añuurim poop ma mbi abujumi kajaasiyaaku, mbi abujumi ko; momakiimom ma jâkummi ma bukanaku kata Emitay kubaj humuntenahu di kâynenaku.
Beesta yâcalhom di etaamay
11 Ban nijuk beesta yaayu yâcaalhumulom di etaamay yabaam usiinaw ugaba wanaamoom non wata êgaraniina, ban ya elob non dragoŋ. 12 Be beesta uyu ya elako kayooŋ yaayu êtiyaaray, ban ya êgoroorum sembaasu sata yo. Ma ega etaamay, di bukanaku kândom ma kûbinken beesta êtiyaaray yagawemmi yaakay yata eketay ban di êju. 13 Ña beesta uyu egabutay, ya ega wahaw wâjaahaliyenim noon. Ma ya ega sambunasu sîlowumul hatiya di emitay kayooŋ di êsukay, 14 ma ya êbuntenum bukanaku kammi di etaamay wahaw wâjaahaliyenim wa ewaalhim ma ya ega kayooŋ yaayu êtiyaaray, ma ya yeen bukanaku kammi di etaamay kuga ebandapaaray yata beesta yayawim kajaasiyaaku be di erog. 15 Ban di ewuli sembaasu ma ega huyiihahu di ebandapaaray yata beesta êtiyaaray, ma ega yo ma ya elob, di yeeli poop ebuj bukanaku kalatum kâbinken yo. 16 Ña beesta di ega di sembe bukanaku peh kagam balaabu, di yahaanay, di busaanumuwaabu, di bûsukateenaabu, di emiikeelay, di poop kaaku kagawutum emiikeel, ma kugawi sîmanjumasu di uŋenaw ûriraw, di poop kûriiŋaku, 17 ma an aatubi aali anoom, be mante nânoomul wah aakutum êmanjum, be keb bukanaku kaakum sîmanjuma'usu sata kañaaŋaku kata beesta uyu, be mante ênuumeray yata kañaaŋaku kata yo.
18 Moo, ute majaalhaamu mentom. Bukanaku kanamulemmi keeli kupisen ênuumeray yata beesta uyu, mata ênumera'uyu, ênuumeray yata ajamaataw. Ênuumeray yata yo, sîteemeerasu hutok di yanor, di bukanaku êhaaji di hutok, di yanor (666).