Anñaakanaw koo di dragoŋ
12
Ban êmanjumay yâamak di ejuki hatiya di emitay yata anñaakanaw, âjupom jalay, ban hulheeŋahu hoo di etaam di ûkandumaw watawool, ban poop na ânkuuho ênkuuhaay yata bûgaalabu yaakum sootasu kunŋen di sigaba. 2 Be anñaakanaw umu oo balet tîikoorool, ban ya âruuren mata hukaku hatawool hûrimmi.3 Ban êmanjumay yaayu di ejuki joon hatiya di emitay, yagam yata dragoŋ yâamak, ban di êyem yabaam kûkuwaku hutok di kugaba, di usiinaw kunŋen, ban poop hûkuwoohukow hubaje ênkuuhaay yata bûgaalabu. 4 Huwetahu hata yo, di hûkiilh karebaku kûhaajutaku kata bootabu ma êbetuu'bo di etaamay, ban di ejuum kayooŋ añakanaw ahuutum karoŋ, ma mbi aroŋ, di etokoñ añoolool. 5 Ña añakanaw umu naroŋ aŋilaw îinaaw a mbi aga âyyaw ata âmbasuk peh, a mbi asohumiil hujinkumahu hata muhaañaayamu. Be aŋilaw umu nahiiwuli ma aŋari be ta Emitay emmi, di hulhikahu hata yo. 6 Anñaakanaw umu nagum be di ekinkay ki alako tiŋatu ta Emitay ebandoorum be batawool, ma êkuumenoo'bô kukaku ênjunni di sîteemeerasu sigaba di bukanaku êhaaji (1.260).
7 Ña hutiikahu di huga hatiya di emitay, ma Miigeel agam annahaanaw ata kumalaakaku koo di kumalaakaku katawool kutiik di dragoŋ, di poop kumalaku kata yo. 8 Be dragoŋ uyu di kumalaku kata yo di kuhaati, momakiimom ma kûbajutummi tiŋ kuleeho hatiya di emitay. 9 Ña dragoŋ uyu yâmakaay yagam elunay yapiyaay yaaneyim Diyaabu, di yeeni poop Satanaas, yabuntenem bukanaku peh kata di etaamay, di eraaculi yoo di kumalaku kata yo be di etaam.
10 Ña nijam hurimahu hâamak hatiya di emitay ha ya hammi:
“Kapakaku kata Emitay yatoolaal kûrillo,
mata mowme êyiise ban sembaasu sata yo non Ây.
Mowme kâyyaku koku ban di kaŋenaku kata Kristu ata yo,
mata asoosenaaw ata kutiyolaal,
aamom asooseneyiim tutulay,
di busonna kayooŋ di Emitay, nahaati ban.
11 Mata Kutiyolaal, di hûsimahu hata Êgaraniinaay kûhaatummi,
di poop mata elobay ya kuñaaŋemmi mata Kristu.
Mata palimo ma keelim kuketeen,
be kujikerut mata eroŋay yatayiil.
12 Moo, ûdu hatiya di emitay,
di poop miwuul jâkindom jimaayoor.
Be miwuul jammi ma jikimmi di etaamay,
di poop kasamaaku jibaje buhiira,
mata diyaabu yoyu ma ewalowulom di hubirikahu be baabu di miwuul,
mata êmire di kaan etaŋay yaŋañoyom yinŋet.”
13 Na dragoŋ êmiim di kaan eraaculi ban be di etaam, ña di eŋomoor anñaakanaw umu âcallhom di aŋilaw îinaaw. 14 Be anñaakanaw umu nawuli ugeŋaw wâamak ugaba wata hûjuupaahu ma âyit be di ekinkay tagam tiŋatu tatawool, ta âkuumenim ujaañaw ûhaaji di tutaru, ma âraagi elunay. 15 Ña eluna'uyu di êlhacul mumelamu di butumabu bata yo magam non kaal kujeeŋanda añakanaw umu, ma mbi mutey d'oo. 16 Be etaamay di yeenen añakanaw umu, ma êsaabul ma emer mumela'umu ma dragoŋ uyu elhaculom di butumabu bata yo. 17 Ña dragoŋ uyu di ebirik di anñaakanaw umu, ña di ekay ki etiik êbajoorumay yatawool yaŋañunom, yaamom yata bukanaku kasoom kûboñaku kata Emitay, kañaaŋenem bukanaku elobay yata Jesus. 18 Ña di ekay ki ejuum di hubeereeraahu hata kasamaaku.