Bukanaku egabaay kalakotonom
11
Ban nawulom hunjaamahu hanaamoom non kaliikum ma aanom: “Ulhaalo ma ukay ki uliik eluupay yata Emitay, di poop Altar, ban nupin bukanaku kasaleyodom. 2 Be nuwaa'bo buhandabu bammi tîyaŋ di Eluupay yata Emitay, aatuba uliik bo, mata bobu ma buwulim bukanaku kata siheet saasu kagawutum jûdewwi, ka mbi kuyokosen êsukay yanapaay kulheeŋaku bukanaku egaba di kugaba (42). 3 Ban mbi iboñ bukanaku kûmbaam egaba ka mbi kûjupo kusaakaaku ma kuñaaŋen elobay yûmbaam kukaku kârimmi ênjunni, di sîteemeerasu sigaba, di bukanaku êhaaji (1.260).”4 Moo, bukana'uku egabaay, koo kugam uyaajaw ugabaaw waaneyim oliveyra, di poop sihikitenumasu sigabaasu sammi ta Ata Emit akiim etaamay ammi. 5 Be anaw agam âsuumutaaw atayiil âkin ja agawiil kôji, sambunasu di sîcaalhul di utumaw watayiil ma sibujool, anaw âkin jaa poop ma âgawikooriil, mbi aket manoramu di sambuna'usu. 6 Ban kubaje sembe ma kuga emitay ma yetuba êlubul di kuka'uku na ya kuñaaŋemmi elobay yata Emitay. Kubaje poop sembe ma kuga mumelamu mata sinkoloŋasu ma muga hûsimahu, di kubaa'poop sembe ma kuga etaamay ma êlaam di hûlaam peh, nanoonan na kûkimmi.
7 Be na mbi kuga kubane jañaaŋenaju jata elobay yata Emitay, ña beesta yâcallhom di husunahu hâlahaahu, mbi etiik di buko, be mbi ehaatiil ma ebujiil, 8 ma sihuluŋaayasu satayiil sitali tiŋatu ta an peh aalim ajuu'so tata êsukay yata Sodooma, di Ejiptu; tiŋa'utu tîwooli umu mata to ta Ata Emit atayiil ariiŋim di êkrusay. 9 Ña bukanaku peh kata sîsukasu, di siheetasu, di silobasu, di poop bâsukabu, mbi kulat ma sihuluŋaaya'usu sihoki, ma ya kujikee'so kukaku kûhaaji, di tutaru. 10 Ña bukanaku peh kammi di etaamay di sûumiil mata eketay yatayiil, poopii di kuga kâlundaayaku ma ya kuyeekoor mata buñaaŋenaa'ubu bata kûboñaku egabaay kagam hûlaamahu bukanaku kata di etaamay. 11 Be na kuka'uku kûhaajiyaaku, di tutaru kugam kubawe, ña Emitay di êboñul buynumabu bata eroŋay ma bunebej di sihuluŋaaya'usu, ña di silhaalo ma sijuum, ña êsukay ka ya kajikeesom di kûkoli noon. 12 Ña di kujam hurimahu hâcaalhumulom hatiya di emitay haaniim: “Jîŋoolul be ûde.” Ña di kuŋool be hatiya di emitay di kawiiñaku ma kûsuumutaaku katayiil ya kujikeriil. 13 Ña nownu kaŋ etaamay di egogoroor, kareb kaaku kata êsukay kagawom kunŋen di kulo, bukanaku kârimmi sînjunnaasu hutok di sigaba di kuket mata ma etaamay egogoroorum. Ña kaaku kaŋañom di kûkoli lhînŋa, poopii di kusal Emitay yammi hatiya.
14 Ña hûlaamahu hugabutahu di hubawo, be haahu hûhaajutahu hôhareesewuum.
Kârimaku kagawom hutok di ugaba
15 Na amalaakaw agawiim hutok di egaba ârimum kârimaku katawool, ña di jami kurimaku kata bukanaku kalhoom palabab ma ya kêenul:
“Kâyyaku kata etaamay,
mowme Ata Emit atoolool akiikom,
di Kristu a mbi aga âyyaw be nanoonan.”
16 Ña yahaana'uyu kaamom anabawo di ebakiir kaleehom di kulhikaku katayiil kayooŋ di Emitay, di kûtiigen ma kuya wuulaw watayiil di etaam ma kûbinken yo, 17 ma ya kêenul:
“Ata Emit, aamom Emitay, Yakiim Sembe Peh,
yagam yoo, yantom kata kaŋ niŋanu;
ûli nooni jêrejep,
mata hurim sembaasu satayi sâmakaasu nûlakowummi di kâyyaku.
18 Malhegen bâsukabu bubirike,
be hukahu hata hubirikahu hatayi poop hûriiŋe;
moo, tîriiŋe ma uga batalenabu bukanaku kakeem,
tîriiŋe poop ma uncaam buñaaŋenaabu bata kûboñaku katayi,
di bugorooraabu batayi,
di poop kaaku kanapaaku kâkoliyem kañaaŋaku katayi,
kagam kinŋetaaku, di poop yahaanay,
mata tîriiŋe ma ûbuy bukanaku kakajenem etaamay.”
19 Ña Eluupay yata Emitay yammi hatiya di êbabuli; nijuk ekeesay yata yaŋaayay yata yo dâada di eluupay uyu. Nijuk ma yagam uraranjuunaw, nijam ûrimaw, di poop bûhututenooraabu; etaamay di egogoroor, egilaasay poop di êlowul.