Joŋ natokoñ kaytaku
10
Ban nijuk amalaakaw aahu aŋaŋalom noon oo ma âwaluwewuum hatiya di emitay. Uwiiñaw woo ma uŋoomenoom, enabay yoo hatiya di hûkuwahu hatawool. Buulabu batawool di bunaamoor di jaley, ûkandumaw watawool di unaamoor non sinuk sata sambun. 2 Amalaakaw umu oo ma asoom jîliibraju di kaŋen joo ma jîbabulim. Ban naga kâkandumaku kûriraku di kasamaaku, kaaku kumayaku di etaamay. 3 Ban nâŋaaŋulo lhînŋa ma alhok non êŋaŋ yâlunde. Ña na âŋaaŋulom umu, uraranjuunaw hutok di ugaba di ûlund. 4 Na uraranjuunaw uwu hutok di ugabaaw ya ûlundum, ña niga ma iŋiic, be nijam hurimahu hâcaalhumulom hatiya di emitay ha ya hammi: “Aatuba uŋiic, mata wahaw wa ujammi di uraranjuuna'uwu wahaw wâñoorim.”5 Ña amalaakaw a ijuum oo ma ajummi di kasamaaku, di poop etaamay, nañuur kaŋenaku katawool kûriraku hatiya di emitay, 6 ban nanuur di kañaaŋaku kata Emitay, yammi ma erommi be nanoonan, yaamom yâwuwemmi hatiya di emitay, di etaamay, di kasamaaku, di poop wahaw peh wândom, ma âanul: “Leetubi piyo joon, 7 na mbi hukahu hûriiŋ ma amalaakaw agawiim hutok di egaba ârim kârimaku katawool, Emitay di ega maama ebandoorum ma êñoorum di hunongahu hata yo, ma eloom buñaaŋenaabu bata kûboñaku kata yo.”
8 Ña hurimahu ha ijammi hâcaalhumulom hatiya di emitay, di hûlobul d'înje joon ma heenom: “Ukay ki uŋar êliibray yâbaahulim yammi di kaŋenaku kata amalaakaw ammi ma ajummi di kasamaaku, di poop etaamay.”
9 Ña nikay ki ilhaw amalaakaw umu êliibray. Be naanom: “Uŋaa'yo utokoñ; di butumabu batayi mbi êsuum non mûkum, be eyongay yatayi mbi êtali.” 10 Nikay ki iŋaa'yo di kaŋenaku kata amalaakaw umu ma itokon yo, di butumabu bûmbaam di êsuum non mûkum, be na igam nimee'yo, eyongay yûmbaam di êtali. 11 Ña naanom: “Jake ma uñaaŋen joon bukanaku maama Emitay eloom mata siheet sameeŋe, di sîsukasu, di silobasu, di poop kîyyaku.”