Kârimaku kutokenaku
9
Na amalaakaw atokenaw ârimum kârimaku katawool, ña nijuk yootay yâlowumulom hatiya di emitay be di etaam; be yoota'uyu di kuwuu'yo ekulhulumay yata husunahu hâlahaahu. 2 Ña amalaakaw umu nakullhul husuna'uhu hâlahaahu ma âbaahuu'ho, ña ekooliitay di êcaalhumuu'dô yarem non ekooliit yata êphuurna yâamak. Ekooliita'uyu di ega jaley, di poop ûdu hatiya di emitay, ma di muucen. 3 Ban babonkaabu bawulim sembaasu non silhankuur, di bûcaalhumul di ekooliita'uyu ma buwaasoor di etaamay.4 Di beeni, mumulet bi bukajen mahos, di uyaajaw, di poop ununukenaw, be mbi bukay keb be bata ejamaatay kâbikutim di kûriiŋaku ma kugawi êmanjumay yata Emitay. 5 Di beeni poop mumulet bi bubuj an, be mbi bules bukana'uku ma kûsonji non bukan ka silhankuur sitahe. 6 Ña nownu bukanaku mbi kupaam eketay, be keetubi kujuu'yo, di kûkin kuket, be eketay mbi êrangiyiil.
7 Be babonkaa'ubu di bunaamoor non epilinj yabandoorim be ejan; kûkuwaku kata bo kubaje wahaw wanaamoorum non ênkuuha yata bûgaalabu yata ûuru, ban wuulaw wata bo di unaamoor di wata ejamaat. 8 Ban walaw wata bo di unaamoor non wata anñaakan, ûŋiiŋaw wata bo di unaamoor non wata êŋaŋ; 9 sîsigirasu sata bo di sibaj wahaw wanaamoorum non bûjupaabu bata muhaañaayamu. Ugeŋaw wata bo ya ulhok palabab non sisareet sata sipilinjasu sakayem be ejan. 10 Ban di bubaj kuwetaku kanaamoorum di kata elhakuur, ban di kuweta'uku di kubaj sembaasu sa mbi bûlesum ejamaatay kulheeŋaku hutok. 11 Amalaakaw agam âyyaw ata bo, oo amalaakaw ata husunahu hâlahaahu, a keenem Abadoŋ di baloberabu bata êbrew, di keenool poop Apoliyoŋ di baloberabu bata greegu.
12 Moo, hûlaamahu hûtiyaarahu hubawe, be kugaba kôkareesewuum.
Kârimaku kagawom hutok di kanor
13 Na amalaakaw agawiim hutok di anor ârimum kârimaku katawool, nijam hurimahu hâcaalhumulom di urebaw ubakiiraw wata Altar yata ûuru yammi kayooŋ Emitay, 14 ma heen amalaakaw umu agawiim hutok di anor aakum kârimaku: “Uwalen kumalaaka'uku ebakiiray kammi ma kukulhim ñata di hulhuwahu hâmakaahu haaneyim Ewphratis.” 15 Ña di kuwalen kumalaaka'uku ebakiiray kabandoorim di ewora'uyu, di huka'uhu, di hulheeŋa'uhu, di poop kajaaña'uku, ma kubuj kareb kaaku kûhaajutaku kata ejamaatay.
16 Ña nijam ma kuloom maama esellooraay kata sipilinjasu kêemim; keemo similiyoŋasu sîteemeerasu sigaba.
17 Ña di êbaahulom ma ijuk sipilinja'usu, di poop esellooraay kageelosom. Be esellooraa'uyu kageelosom, koo di ûjupaaw wata muhaañaayamu wâjeelum non sambun, ban di sîkileet non Saphiira, di siga poop haralh non ensoophri. Be kûkuwaku kata so di kunaamoor non kûkow kata sîŋaŋ, ban ya sîcaalhenul sambunasu, di hakoorahu, di poop ensoophri di utumaw wata so. 18 Mata hûlaamahu hata sambuna'usu, di ekooliita'uyu, di poop ensoophri uyu yâcaalhumulom di utumaw wata so, ña urebaw ûhaajiyaaw wata bukanaku di kuket. 19 Mata sembaasu sata sipilinja'usu sosu di utumaw wata so, di poop kuwetaku kata so, mata kuwetaku kata so kunaamoor non silun, ban di kubaj kûkuwaku ka ya sîrumummi bukanaku.
20 Be bukan kaaku kaketutum di hûlaama'uhu, di kulat kawatatenooro ma kuwalh kaga wahaw wa kucookoorem di uŋenaw watayiil, kuwalhut poop kawaasen kumalaku, di ûkiinaw watayiil wata ûuru, di wata praata, di wata bronsi, di wata kuwaaliisaku, di poop wata utaaguwaaw waamom wâjukoriitim, ûjamoriit, ban poop ûreesoriit. 21 Bukana'uku poop di kulat kawatatenooro jabujaju ja kubujem bukanaku, di musaayamu, di kâmooraaku, di poop êkuutay.