Seelu yagasom hutok di sigaba
8
Na Êgaraniinaay êkotuum seelu yagasom hutok di sigaba, ña ûdu hatiya di emitay, di dipato jib ii di deen rîiŋ tutaru tata ewooraay. 2 Ña nijuk kumalaaka'uku kaamom hutok di egabaay kajummi kayooŋ di Emitay, ma kuwulim ûrimaw weemo hutok di ugaba.3 Amalaakaw aahu nâkayil bi ajuum ta Altar yemmi, oo ma asoom eboolay yata ûuru da kugawem ebaaliinay. Di kuwulool ebaaliinay lhay yabomim di kalhawaku kata bukanaku kata Emitay ya mbi ewuli be bata yo, ma aga yo di Altar yata ûuru yammi kayooŋ hulhikahu hata Emitay. 4 Ña hakoorahu hata ebaaliinay, di kalhaku kata bukanaku kata Emitay, di hûcaalhumul di uŋenaw wata amalaakaw umu ma huŋool be kayooŋ di Emitay. 5 Ban amalaakaw umu nasoh eboolay yata ebaaliinay ma ameeŋen yo sambunasu sata di Altar, ban naraac yo di etaamay. Ña di jami bâlunderabu bata uraranjuunaw, di poop bâlunder baabu, di juki bawajuwajerabu bata wo, ña etaamay poop peh di egogoroor.
Ûrimaw wata hûlaamahu
6 Ña kumalaaka'uku kaamom hutok di egabaay, kasoom ûrimaw uwu waamom hutok di ugaba, di kubandoor ma kûrim.
7 Na amalaakaw âtiyaaraw ârimum kârimaku katawool, ña Emitay di êlubul kunkaamaku kata mumelamu, di sambunasu sâguusorum di hûsimahu. Ña sambuna'usu di sikaajen kareb kaaku kûhaajutaku kata etaamay, di uyaajaw, di poop mahosamu.
8 Na amalaakaw agabutaw ârimum kârimaku katawool, ña wahaw wanaamoorum non hurimbiliŋ hâamak hammi ma hûluwem, di huraaculi di kasamaaku. Ña karebaku kûhaajutaku kata ko, di kulaañ kuga hûsimahu. 9 Ña karebaku kûhaajutaku kata bânunkureŋabu bata di kasamaaku, di buket; karebaku poop kûhaajutaku kata sibaarukasu, di sikajeni.
10 Na amalaakaw âhaajutaw ârimum kârimaku katawool, ña yootay yâamak di êlowumul hatiya ma êjeel non hungeeraam hata sambun, ma êlowum kajimaku kûhaajutaku kata waalaw, di poop sinkoloŋasu. 11 Ña karebaku kûhaajutaku kata mumelamu di mûtali. Kañaaŋaku kata yoota'uyu ya keeni Mâtaliyaamu. Momakiimom bukan kameeŋe kasibemom di kuket.
12 Na amalaakaw abakiirenaw ârimum kârimaku katawool, ña karebaku kûhaajutaku kata jaley, di hulheeŋahu, di bootabu di kucoki. Ña kajimaku kûhaajutaku kata wo di kumuucen; kajimaku poop kûhaajutaku kata majaaŋaamu mata tutulay, di busonnaaru, di kumuucen.
13 Ban nijuk hûjuupaahu hoo ma hûyitem hatiya, ma ya hûŋaaŋulo lhînŋa ma ya hêenul: “Awo! Awo! Buhiiraabu mbi busoh bukanaku kammi di etaamay na mbi bârimerabu bujami bata kumalaakaku êhaajiyaay ka mbi kûrim!”