Bukanaku kagam kata Emitay kaamom sînjunnaasu êteemeer, di bukanaku egaba di ebakiir 144.000
7
Ban nijuk kumalaakaku ebakiir koo ma kujummi di urebaw ubakiiraw wata etaamay, ma kuminden ehentelaay yâcaalhumewuum di urebaw uwu ma etuba êtekul be di etaamay, di kasamaaku, di poop uyaajaw. 2 Ban nijuk amalaakaw aahu âcaalhumulom ba jaley âcaalhumewuum oo ma asoom êbikumay yata Emitay yaroŋaay, ña nâŋaaŋulo lhînŋa ma alob di kumalaaka'uku ebakiiray kaamom ka Emitay ewuum sembaasu ma kukajen etaamay, di kasamaaku, 3 ma aaniil: “Aatuba jikajen etaamay, di kasamaaku, di poop uyaajaw, ii be na mbi ûbik di kûriiŋaku bugorooraabu bata Emitay yatoolaal.” 4 Ña nijam ma kuloom maama bukanaku ka kûbikum di kûriiŋaku kêemim; keemom sînjunnaasu êteemeer, di bukanaku egaba di ebakiir (144.000), kata di sîbajoorumasu peh sata kuŋilaku kata Israyel. 5 Di êbajoorumay yata Judaa, keemom sînjunnaasu kunŋen di sigaba (12.000); yata Rubeŋ, sînjunnaasu kunŋen di sigaba (12.000); yata Gaadi, sînjunnaasu kunŋen di sigaba (12.000); 6 yata Aseer, sînjunnaasu kunŋen di sigaba (12.000); yata Naphtali, sînjunnaasu kunŋen di sigaba (12.000), yata Manasees sînjunnaasu kunŋen di sigaba (12.000); 7 yata Simiyoŋ, sînjunnaasu kunŋen di sigaba (12.000); yata Levi, sînjunnaasu kunŋen di sigaba (12.000); yata Isakaar, sînjunnaasu kunŋen di sigaba (12.000); 8 yata Zebuloŋ, sînjunnaasu kunŋen di sigaba (12.000); yata Jose, sînjunnaasu kunŋen di sigaba (12.000); yata Benjamiŋ poop, sînjunnaasu kunŋen di sigaba (12.000).Bukanaku hatiya di emitay
9 Ban nagam wahaw uwu uhulhe, nijuk buyooŋabu bâamak bata bukanaku ka an aaliitum apin. Di buyooŋa'ubu bukanaku kata âmbasuk peh, di kata siheetasu peh, di kata êsukoosuk, di poop kata silob peh, koo ma kujummi di hulhikahu hata Emitay kayooŋ Êgaraniinaay, ban di kûjupo tûmpaay, ma kusoh ugasaw 10 ma ya kûŋaaŋulo lhînŋa ma ya kêenul:
“Kapakaku kûcaalhumul di Emitay yatoolaal,
yammi ma eleehom di hulhikahu, di poop Êgaraniinaay.”
11 Kumalaakaku peh koo ma kujummi ma kuŋoomen hulhika'uhu hata Emitay, di yahaana'uyu, di wahaw uwu ubakiiraw waroŋaaw. Ban di kuya kûriiŋaku katayiil di etaam ma ya kûbinken Emitay 12 ma kêenul:
“Amiin! Emitay yatoolaal, yoo ekiim kasalaku,
di êriibiinaay, di majaalhaamu, di kañankiitaku,
di hûpiiraahu, di sembaasu, yakiim wahaw peh be nanoonan. Amiin!”
13 Ña annahaanaw aahu ata di buko narinkom aanom: “Buke kâjupom ume wañaw wâtumpaayaaw yeymoom? Ûbey kûcaalhumulom?”
14 Ña neenool: “Ata Emit, aw ûmiim matayiil.” Ña naanom: “Buke bukanaku kâcaalhumulom di hûlaamahu, kakullhemmi wañaw watayiil di hûsimahu hata Êgaraniinaay ma kuga wo ûtumpaay. 15 Momakiimom ma kêemummi kayooŋ hulhikahu hata Emitay, ma ya kusal yo tutulay, di busonna di eluupay yata yo; ma anaw umu aleehom di hulhikahu, mbi agaayeniil di bagoogaayabu batawool. 16 Moo, bacaar, di basiben, beetunki busohureriil joon, palimo baley, di êhaaha, yeetubi eboliil. 17 Mata Êgaraniina'uyu yaleehom di hulhikahu, mbi ega âtekenaaw atayiil ma mbi ya eŋariil be di uyelenooraaw wata mumelamu mata eroŋay. Ban Emitay di ebees mukulamu peh di kûkilaku katayiil.”