Seelu di sîkotuli
6
Ña nijuk Êgaraniinaay ma êkotuum seelu yâtiyaaray yata di usu sagam hutok di sigaba, nijam poop wahaw waawu wata di uwu ubakiiraw waroŋaaw, ma ya uloom di sembe non kararanjuun ma ya wêenul: “Bila!” 2 Na ijikeem, nijuk epilinjay êtumpaay anaw ma ageeloyom, ban nasoh kaŋaagenaku; ban di kuwulool poop êñambiyaay, ma âcaalhul ma ya ahaat, ban nalaañ joon ya ahaat.3 Na Êgaraniinaay êkotuum seelu egabutay, nijam wahaw wagabutaw waroŋaaw ma ya wemmi: “Bila!” 4 Ña epilinjay yaayu di êcaalhul êyem, anaw ageeloyom, di kuwulool sembaasu ma âcaalhen kâsuumaayaku di etaamay ma aga bukanaku kubujoor. Ban di kuwulool kajaasiyaaku kâamak.
5 Na êkotuum seelu êhaajutay, nijam wahaw ûhaajutaw waroŋaaw ma ya wemmi: “Bila!” Na ijikeem, nijuk epilinjay elheen anaw ageeloyom oo ma asoom êpeesowumay di kaŋenaku. 6 Ban nijam non hurim di tutaru tata wahaw uwu waroŋaaw ubakiiraw ma ya hemmi: “Êkilaay yanor yata trîigu, mbi ejar non bancaamabu bata bugoroorabu bata hukahu hanor; sîkilaasu sîhaaji sata sebada, mbi sijar non bancaam bata hukahu hanor hata bugorabu, be aatuba ukajen êduuliinay, di poop bunukabu.”
7 Na êgaraniinaay êkotuum seelu ebakiirenay, nijam wahaw uwu waroŋaaw ma ya wemmi: “Bila!” 8 Na ijikeem, nijuk epilinjay yâyemmi haralh, anaw ageeloyom ya aani Eketay. Ban sambun sâbaworiit, soo ma sisoolhenem d'oo. Ban poop di kuwuliil sembaasu ma kukil kareb kaaku kubakiiraku kata etaamay, ma âbujum bukanaku kândom ujaasiyaaw, di bacaarabu, di kâjuutaku, di poop bânunkureŋabu bata di bujalabu wabujem.
9 Na êgaraniinaay êkotuum seelu ebakiirenay, nijuk dâada di Altar sâaroorasu sata bukanaku kabujim mata elobay yata Emitay, di poop mata ma kugam bukanaku kâynenaayaku kalobem elobay yata yo. 10 Ban ya kûŋaaŋulo ma kêenul: “Ata Emit, aw jakiim sembe peh, jagam anaw anapaaw, alhegenumaayaw, ûney na mbi uga batalenabu ma ugalen di buku kammi di etaamay kâhipum hûsimahu hâtooli?” 11 Ña ânoowan ata di buku, nawuli hûsabadoraaku hûtumpaay, ban di keeniil kuhepulen deh ma kukob kutiyiil, di poop kupaaliil kata di bugoroorabu bata Kristu, ka mbi kubuji non buko, be na mbi kûrir.
12 Ban na êkotuum seelu yagasom hutok di yanor, nijuk etaamay ma egogoroorum lhînŋa. Ña jaley nalaañ amuucen mib non huleesa halheene. Hulheeŋahu di hûyem non hûsim. 13 Bootabu di bûlowumul hatiya be di etaam non ma ehentelaay yabaam sembe êsaysenem phigeera, ña kaaku katatutum di kûlowul. 14 Ña hatiya di emitay di dinep ma ga non êliibray yabooñi. Kurimbiliŋaku peh, di aŋoomenooruwayi, di kulhoji ta kulakuwemmi. 15 Kîyaku kata di etaamay, di yahaanay, di yahaanay yata esellooraay, di busaanumuwaabu, di bukanaku kabaam sembe, di poop emiikeelay, di poop kaaku kagawutum emiikeel, di kûñooro di ûgoboŋaw wata kuwaaliisaku, di poop kurimbiliŋaku. 16 Ma ya kêenul kurimbiliŋaku, di kuwaaliisaku: “Jîlowumoli ma ooli ûñooro anaw ammi ma aleehom di hulhikahu, di poop Êgaraniinaay yammi di hubirikahu. 17 Mata hukahu hûriiŋe hata hubirikahu hatayiil; moo, ay mbi aali ayetoor di ho?”