Êgaraniinaay di êbabul êliibray yakanenim
5
Ban nijuk êliibray di kaŋenaku kûriraku kata anaw aleehom di hulhikahu yabooñim, yaŋiicim tîyaŋ, di dâada, ban di ekanenumi seelu seemo hutok di sigaba. 2 Nijuu'joon amalaakaw abaam sembaasu a ya âŋaaŋulom ma arink ma ya âanul: “Aymoom ajommi ma âkotul seelu use sata êliibra'uye ma âbabuu'yo?” 3 Be bajut an akeel hatiya di emitay, di etaamay, palimo dâada di etaamay aalim âbabul êliibra'uyu, palimo poop ma ajiker wahaw wândom. 4 Ña nikaaw lhînŋa mata ma bajutum an akeel ajommi ma âbabul êliibra'uyu, palimo poop ma ajikee'yo. 5 Be annahaanaw aahu ata di yahaana'uyu naanom: “Aatuba ukaaw; mata Êŋaŋay yata di êbajoorumay yata Judaa, yagam yata di huhaarahu hata David, ehate ban wahaw peh, yoo yeelim êkotul seelu usu ma êbabul êliibra'uyu.”6 Ña nijuk Êgaraniinaay yanaamoom non êgaraniina yabujeenim, yoo ma ejummi di tutaru tata hulhikahu, ban di ebaj usiinaw hutok di ugaba, di poop kûkilaku hutok di kugaba, kaamom uynumaw hutok di ugaba wata Emitay, waboñim be di etaamay pooyo. 7 Ña di êkayil bi eŋar êliibray di kaŋenaku kûriraku kata anaw ammi ma aleehom di hulhikahu. 8 Na esooyom, ña wahaw uwu ubakiiraw waroŋaaw, di poop yahaanay kaamom anabawo di ebakiir, di kûtiigen kayooŋ êgaraniina'uyu. Ban anoowan ata di buko, oo ma asoom aarpa, di siboolasu sata ûuru, soo ma semmi huc ebaaliinay, yagam kalhawaku ka bukanaku kanapaaku kulhawem Emitay. 9 Koo ma kuyeeŋem kañaaŋaku kunkulaku ma ya kêenul:
“Aw ujommi ma usoh êliibray ma ûkotul seelu,
mata aw ubujim ma ûnoomum di hûsimahu hatayi bukanaku kata âmbasuk peh, di kata sîbajoorumasu peh, di kata eheet peh, di poop kata elob peh be bata Emitay.
10 Ma ugawiil kuga kîyyaku, di bumaaŋenaabu bata Emitay
ma kugoroor be bata yo, di kuga poop yahaanay yata etaamay.”
11 Be na ya ijikeem wahaw uwu, ña nijam kurimaku kata kumalaakaku lhay kaaliitum kupini, kârimmi similiyoŋasu, di similiyoŋasu lhay, koo ma kuŋoomemmi hulhikahu, di poop wahaw uwu ubakiiraw waroŋaaw, di poop yahaana'uyu, 12 ma ya kûŋaaŋulo ma kêenul:
“Êgaraniinaay yabujim, yoo ejommi ma eyab sembaasu, di husaanumahu, di majaalhaamu,
di jâbinkenaju, di êriibiinaay, di poop kasalaku.”
13 Nijam poop wahaw peh wa Emitay êwwemmi wata hatiya di emitay, di wata di etaamay, di waawu wammi dâada di yo, di wata di kasamaaku, di poop wahaw peh wândom, ma ya wemmi:
“Anaw aleehom di hulhikahu, di poop êgaraniinaay,
kujoone ma kusali, di kûbinkeni, di kuwuli êriibiinaay, di poop sembaasu be nanoonan.”
14 Ña wahaw uwu ubakiiraw waroŋaaw, ya wêenul: “Amiin!” Ña yahaana'uyu di kûtiigen ma kûbinkenool.