Emitay yoo di hulhikahu hata yo
4
Ban na câatom, nijuk êtingaay yâbabulim hatiya di emitay, nijam hurimahu hûtiyaarahu halhoom noon kârim, ma heenom: “Ûŋoolul be ute ma mbi eeli îyisi wahaw wa mbi uga ban di uga.”2 Ña too kaŋ cab Buynumabu bata Emitay di been d'înje huc, ña nijuk hulhikahu hatiya di emitay, anaw oo dôo ma aleehom. 3 Anaw umu aleehom di hulhika'uhu haanaahu hatawool, di hunaamoor noon ewaalisay yaaneyim jaaspi, di yaayu poop yaaneyim sardoonika, ban dôo di hulhikahu'uhu, di baa'dô enabay yaŋoomenhom yanaamoorum non ewaalisay yaaneyim esmeraalda. 4 Di hulhika'uhu, di baa'dô poop kulhikaku kaaku keemo anabawo di kubakiir kaŋoomenhom, di kulhika'uku di baj bumaaŋenaabu keemo anabawo di ebakiir kâlehodom di ko, di kûjupo wañaw ûtumpaay, ban di kûnkuuho sînkuuhaasu sata bûgaalabu sata ûuru. 5 Dôo di hulhika'uhu ya câalhumuu'dô kurimaku, di bâpumbenerabu bata uraranjuunaw. Kayooŋ di hulhika'uhu, di baa'dô kusoyaku hutok di kugaba ka ya kâlum, kaamom uynumaw hutok di ugaba wata Emitay. 6 Kayooŋ hulhika'uhu poop, di baa'dô wahaw wanaamoom non kasamaaku kata ujukoorumaw kanaamoom non kristal. Di tutaru tata hulhika'uhu, di poop urebaw wata ho, di baa'dô wahaw wâwwenim ubakiir waroŋaaw, wabaam kûkilaku lhay kayooŋ, di poop kujeeŋanda.
7 Wahaw wâwwenim wa ijuum kâtiyaar, unaamoor non êŋaŋ, waawu wagabutaw di unaamoor non hûmuuna, waawu wâhaajutaw buulabu bata wo, di bunaamoor di bata ajamaat, waawu ubakiirenaw di unaamoor non hûjuupa hammi ma hûyitem. 8 Moo, wahaw uwu ubakiiraw waroŋaaw, wanoowan ubaje ugeŋaw hutok di kanor, urebaw ugabaaw wata wo peh, di poop dâada di deen huc kûkilaku; ban wahaw uwu tutulay di busonna, ûhepulendiit ma ya wêenul: “Aw anapaaw, Aw anapaaw, Aw anapaaw! Ata Emit akiim sembe peh, oo Anaw anapaaw, aamom âamiyaalitom, antom, a mbi âkayil.”
9 Na mbi wahaw uwu waroŋaaw, usal anaw ammi ma aleehom di hulhikahu, ammi ma arommi be nanoonan, ma ya ûbinkenool, ban ya uwulool êriibiinaay, 10 ña yahaana'uyu kaamom anabawo di ebakiir, di kûtiigen kayooŋ anaw umu ammi ma aleehom di hulhikahu, ma ya kusalool, ban ya kûcaalhen sînkuuhaasu sata bûgaalabu satayiil sata ûuru kayooŋ hulhika'uhu ma ya kêenul:
11 “Ata Emit âtooli, aw nujoone di êriibiinaay,
di kasalaku, di poop sembaasu;
mata aw ûwemmi wahaw peh,
ban poop di bâkinerabu batayi, bo ba wahaw uwu peh ûwuwenumim.”