Kaytaku be bata grîsiya yata Saardu
3
“Uŋiic be bata amalaakaw ata grîsiya yata Saardu ma oonool: ‘Ûde hurimahu hata anaw abaam uynumaw hutok di ugaba wata Emitay, di poop sootasu hutok di sigaba. Moo, nîmire wahaw wa ugawem. Mata bukanaku ya kêenul aw umu ma urommi, be aw umu ma ukeem. 2 Moo, utonko ma ûtiken kareb kaaku kammi ma kurommi, ma keetubi kuhabelo ma kuket, mata nijuke kaan wahaw wa ugam ujakut kayooŋ di Emitay yûmbaam. 3 Moo, uwollho wahaw wa kulhikitenim, di waawu wa ujammi; usoo'wo ma uwatatenooro. Mata ugawut to jaa bûyegetabu batayi, ootubi ûmir hukahu ha mbi îkayumul be baabu d'aw, mata mbi îwubi non âkuuta. 4 Malhegen di grîsiya yata Saardu, baje bukanaku kinŋet kândom kasementum wañaw watayiil. Moo, mbi kureboor d'înje koo ma kulhiimom wañaw wâtumpaayaaw, mata kujoone di wo. 5 Mata anaw ahaatum, mo ma mbi âjupeni wañaw wâtumpaayaaw, ban poop kañaaŋaku katawool keetubi kupasureri di êliibray yata eroŋay; ban mbi îwool kañaaŋaku katawool kayooŋ Ampawom, di poop kumalaakaku katawool.’6 “Moo, anaw abaam ûjaŋay, najam maama Buynumabu bata Emitay bulobem di mo sîgrisiyaasu.”
Kaytaku be bata grîsiya yata Philadeelphiya
7 Uŋiic be bata amalaakaw ata grîsiya yata Philadeelphiya ma oonool: “Ûde hurimahu hata anaw anapum, naga poop anaw alhegenumaayaw, aakum ekullhulumay yata David. Aamom a mbi akullh, an aatukaali akullhul; nakullhul, an poop aatukaali akullh. 8 Înje nîmire wahaw wa ugawem di wo. Nîmire kaan ubajut sembe, be ya usoh elobay yûmbaam, ulatut poop kañaaŋaku kûmbaam. Moo, nîbabuli ban êtingaay ya an aaliitum abab. 9 Moo, bukanaku kata di eluupay yata kâmebooraku kata Esatanaay kacalem ma kêenul buko jûdewwi ban kugawutiil, mbi igawiil ma kûkayil bi kûtiigen di ûkandumaw watayi, ma mbi kûmir kaan malhegen înje nîkini. 10 Mata ma usoom elobay yûmbaam ma ujuum tir, momakiimom ma mbi ipooyumi di hûlaamahu hâreesewuum be bata âmbasuk peh, ma hulaso bukanaku kammi di etaamay.
11 “Be leetubi piyo nîkayil; moo, usoh jak wahaw wa ookum, ma an aatuba abot ênkuuhaay yata bûgaalabu batayi. 12 Mata anaw ahaatum, mbi igawool ma aga êlanday yata di eluupay yata Emitay yûmbaam, da atunki âcâalhurer. Ban mbi iŋiic kañaaŋaku kata Emitay yûmbaam d'oo, di poop kañaaŋaku kata êsukay yata Emitay, yaamom Jerusaleŋ yunkulay, ya Emitay yûmbaam mbi êwalenumul hatiya di emitay, di poop kañaaŋaku kûmbaam kunkulaku.
13 “Moo, anaw abaam ûjaŋay, najam maama Buynumabu bata Emitay bulobem di mo sîgrisiyaasu.”
Kaytaku be bata grîsiya yata Lawodiseeya
14 Uŋiic be bata amalaakaw ata grîsiya yata Lawodiseeya ma oonool: “Ûde hurimahu hata anaw aaneyim Amiin, agam anaw alobem malhegen, âynenaayaw, dâ wahaw peh wa Emitay êwwemmi ûcaalhumulom. 15 Înje nîmire wahaw wa ugam; mata uheput, ûhaahut poop. Be haŋ majak ma uhepeen, be mante nûhaaheen. 16 Be magam aw umu ma ulewum; ûhaahut, uheput poop, momakiimom ma mbi îlhacumuli di butumabu bûmbaam. 17 Mata aw umu ma oonem di mo nusaanumuwe, nubaje wah peh, makeel mulet ma ubajutum; be ûmirut kaan aw anaw âlaamum, âsukateenom, âñankiitenim, âpuumum, ban aw umu to way. 18 Moo, ma icecenumim ma ooli unoom d'înje ûuru yagawim di sambunasu ma ehaŋ majak, ma mbi ooli ubaj husaanumahu halhegenumaayahu, ban nunoom poop d'înje wañaw wâtumpaayaaw ma ukoko ma aatuba mbi upuño mata ma ontom way; nunoom poop bubuunabu uga di kûkilaku katayi, ma mbi ooli ujuk jak. 19 Mata înje ya iwaŋ, nitar poop bukanaku peh ka îkimmi. Moo, uga to bûyegetabu batayi ma uwatatenooro. 20 Moo, înje ume di êtingaay ma ikokongenem, anaw ajammi hurimahu hûmbaam ma âbabul, ninebej di eluupay yatawool, ma iri dânor d'oo, oo poop nari dânor d'înje. 21 Moo, anaw ahaatum, mbi igawool ma uleeho tanor di kâyyaku kûmbaam, non ma înje poop ihaatum, nuleeho tanor di Ampawom di kâyyaku katawool.
22 “Anaw abaam ûjaŋay, najam maama Buynumabu bata Emitay bulobem di mo sîgrisiyaasu.”