Kaytaku be bata grîsiya yata Ephesu
2
“Uŋiic be bata amalaakaw ata grîsiya yata Ephesu ma oonool: ‘Ûde elobay yata anaw aakum di kaŋenaku katawool kûriraku sootasu hutok di sigaba, ammi ma areesem di tutaru tata sihikitenumasu saamom hutok di sigaba sata ûuru. 2 Înje nîmire wahaw wa ugam, bugoroorabu ba ugoroorum, di poop maama umuntemmi di hûlaamahu. Nîmire kaan ôoliyoriit umunten di bukanaku kâlhapitaaku, nîmire poop kaan ya ulaso bukanaku kaanem buko kumakaaku kata Jesus, ban kugawutiil, mata nûmire kaan buko ya kucal. 3 Nîmire kaan nûlaamulaamum noon ma ya umunten mata kañaaŋaku kûmbaam, ban poop ubeñowut.’4 “Be baje wahaw wa sûumutommi d'aw, mata mowme ûkinutom ban non ma ûkinommi kâtiyaar. 5 Moo, jake ma uwollho tiŋatu ta ulowumulom. Moo, uwatatenooro ma ulaañ uga non ma ya ugawemmi kâtiyaar, mata uwatatenoorowut jaa, mbi îkayil be baabu d'aw, ma nki îcaalhen ehikitenumay yatayi ta yemmi. 6 Be baje poop wahaw wajakaaw d'aw wa ugawem, mata ya ugiip wahaw wa nikolayiitayia kugawem non ma înje poop igiipewom.
7 “Moo, jake ma anaw abaam ûjaŋay, najam maama Buynumabu bata Emitay bulobem di mo sîgrisiyaasu. Anaw ahaatum, mbi iwulool ari di muriyaayamu mata di buyaajabu bata eroŋay, bammi di etoolay yata Emitay.”
Kaytaku be bata grîsiya yata Esmiirna
8 “Uŋiic be bata amalaakaw ata grîsiya yata Esmiirna ma oonool: ‘Ûde elobay yata anaw agam hûcukumahu, naga poop hûbanumahu, aamom akeem ban nâlhaalowul di kuketaaku.’
9 “Înje nîmire mata hûlaamahu hatayi, di poop hûsukateenahu hatayi, be aw umu ma usaanumom. Nîmire poop maama bukanaku kûgelikoorim kaanem buko jûdewwi, ban kugawutiil, mata buko kata di eluupay yata kâmebooraku kata Esatanaay. 10 Moo, aatuba ûkoli hûlaamahu ha mbi ûlaam. Mata Esatanaay mbi ega bukan kaaku kata di miwuul di ekullhay, ma mbi yeeli elasuwiil, ma jilako di hûlaamahu kukaku kinŋet. Be ujuum tir ma aatuba ubeño, palimo koo kubuji. Mata mbi iwuli ênkuuhaay yata bûgaalabu yata eroŋay.
11 “Anaw abaam ûjaŋay, najam maama Buynumabu bata Emitay bulobem di mo sîgrisiyaasu. Moo, anaw ahaatum, aatubi aket eketay egabutay.”
Kaytaku be bata grîsiya yata Pergamu
12 “Uŋiic be bata amalaakaw ata grîsiya yata Pergamu ma oonool: ‘Ûde elobay yata anaw aakum elaamay. 13 Nîmire tiŋatu ta ommi ma ukimmi; aw umu ta hulhikahu hata Esatanaay hemmi. Be aw umu ma usoom kañaaŋaku kûmbaam, ulatut kâynenaku ka ûynenommi. Ban palimo di kukaku na kubuum Antiipas di êsukay yatawuul ta Esatanaay êkimmi, agam anaw âynenaayaw, alobem mûmbaam, be ulatut kañaaŋaku kûmbaam. 14 Be nibaje wah wanor wa sûumutumommi d'aw, mata nubaje bukan kaaku kammi ma kusoolhenem di balhikitenerabu bata Balawoŋ, anamulemmi Balaaki ma aga bukanaku kata Israyel kulo di kûbajumiñaku, mata ma ya agawiim kutokoñ eluway yata keenaayaku, nagawii'poop ma ya kukay kâmooraaku. 15 Ban poop nubaje bukan kaaku kammi ma kusoolhenem di balhikitenerabu bata nikolayiitayi. 16 Moo, uwatatenooro! Mata ugawut mo jaa, leetubi piyo, mbi îkayil be baabu d'aw; ban mbi itiikumiil kajaasiyaaku kammi di butumabu bûmbaam.’
17 “Moo, anaw abaam ûjaŋay, najam maama Buynumabu bata Emitay bulobem di mo sîgrisiyaasu. Be anaw ahaatum, mbi iwulool muriyaayamu maamu maaneyim manaa mâñoorim. Ban poop, mbi iwulool ewaalisay ehiit da kañaaŋaku kunkulaku kuŋiicim ka an âmirutum, be keb anaw akiikom mbi âmiiko.”
Kaytaku be bata grîsiya yata Tiyatiira
18 “Uŋiic be bata amalaakaw ata grîsiya yata Tiyatiira ma oonool: ‘Ûde hurimahu hata Añool Emit a kûkilaku katawool kûjeelum non sambun, ûkandumaw watawool poop di uga non hûgebaayahu hagawe wajwaj. 19 Moo, nîmire wahaw wa ugawem; maama ûkimmi ajamaat, di maama ûynenommi, di maama ugoroorum, di poop maama umuntenem. Nîmire poop kaan mowme nuhaŋ magoroor di maama ugoroorum kâtiyaar. 20 Be baje wahaw wa îbirikummi d'aw, mata ma uwaabom añakanaw umu aamom Jesabeel ammi oo añaaŋenaaw ata kûboñaku kata Emitay. Ma ya alhikiten bugorooraabu bûmbaam, ma ya abunteniil ma kuga kûbajumiñaku kata kâmooraaku; nagawiil poop ma ya kutokoñ eluway yata uncaamaw wabujim di ûkiinaw. 21 Moo, înje niwuloowuloom etaŋ ma aali awatatenooro, be nalat ma ya akay kâmooraaku. 22 Be mbi igawool ma âjuut, bukanaku poop kakayem kâmooraaku d'oo, kuwatatenoorowut jaa mata wahaw wa kugawem d'oo, mbi kulo poop di hûlaamahu harem noon. 23 Moo, mbi ibuj kuñoolool, ma sîgrisiyaasu peh mbi sîmir kaan înje anaw âmirem wahaw peh wammi di bûyegetabu bata ajamaat, di poop waawu peh wammi di êsigiray yata ajamaat; momakiimom ma mbi încaamum anoowan maama agam.’
24 “Moo, miwuul jata Tiyatiira jalatum balhikitenera'ubu bajakutum, ban poop jîmirut mata wahaw wagam huhaanaahu hata Esatanaay, miwuul eetubi ipeenenuul wah wânaate. 25 Be jake ma jenken ma jisoh wahaw wa jeekum be na mbi îlaañul. 26 Be anaw a mbi ahaat, ma aga non ma înje îkimmi ii be di hûbanumahu, mbi igawool ma aga annahaanaw ata bâsukabu; 27 ban mbi âtekenumiil hûgolahu hata muhaañaayamu ma iwapiil non an awape elomp yateepumim bukap. 28 Ban poop non ma Ampawom awulommi sembaasu, mooma mbi iwulii'poop yootay yata urabaw.
29 “Moo, anaw abaam ûjaŋay, najam maama Buynumabu bata Emitay bulobem di mo sîgrisiyaasu.”