ÊLIIBRAY YATA
APOKALIPSI
Elobay yâtiyaaray
1
Di Êliibra'uye, dô da wahaw wa Emitay ewuum Jesus Kristu ma âbaahul bugorooraabu batawool wahaw waatumbi upiyo di uga. Ma âboñul amalaakaw atawool ma añaaŋen wo Joŋ agam agorooraaw atawool. 2 Ña Joŋ nalob wahaw uwu peh wa âbaahulim, ma añaaŋen elobay yata Emitay, di mata Jesus Kristu, di poop wahaw peh wa âyisoom. 3 Moo, anaw a mbi apisen kayta'uke, di poop bukaaku ka mbi kujam eloba'uye yata kûboñaku kata Emitay, ban di kusoo'yo kubaje hûpiira, mata tire kâriiŋ ma wahaw uwe uga.Joŋ najaalhen sîgrisiyaasu sagam hutok di sigaba sata Aasiya
4 Înje Joŋ, înje iŋiiculom kayta'uke be bata sîgrisiyaasu saamom hutok di sigaba sammi di bantaabu bata Aasiya. Moo, nîkine ma Emitay ewuluul kañankiitaku, di kâsuumaayaku kata yo, yaamom yagam Emitay yâamiyaalitom kata kaŋ niŋanu, ya mbi êkayil, di poop uynumaw waamom hutok di ugaba wammi kayooŋ di hulhikahu hata yo; 5 di poop Jesus Kristu agam ajuumaaw alhegenumaayaw, aamom agam anaw âtiyaaraw alhaalellim di kuketaaku, agam annahaanaw ata kîyyaku peh kata di etaamay; aamom aboolaatolaam, ma apakenolaal di kûbajumiñaku, mata hûsimahu hatawool. 6 Ma agawolaal kîyyaku, di poop bumaaŋenaabu ka mbi kugoroor be bata Emitay yagam Ampawool, mata oo akiim sembaasu, di êriibiinaay be nanoonan. Amiin.
7 Be mbi âkayil di uwiiñaw ma an peh ajukool, be di bukanaku kayawoom. Moo, siheetasu sata âmbasuk peh, mbi sikaaw matawool. Mo ma mbi ga no. Amiin.
8 Momakiimom Ata Emit agam Emitay yatoolaal nâanul: “Înje igam Alpha, niga poop Omega, daamom hûcukumahu, di hûbanumahu, agam anaw Akiim Sembe Peh, ata jaat, âamiyaalitom, a mbi âkayil.”
Emitay di êbaahul Joŋ
9 Înje Joŋ, jaamom atiyuul, jagam apaaluul ja ubomaam hûlaamahu mata kâyyaku kata Emitay, mata jakobaju ja ukobaalem di Jesus. Înje koo kusohommi ma kugawom di aŋoomenooruwaaw aaneyim Paatumus, mata elobay yata Emitay, di poop mata malhegenumaayamu ma Jesus Kristu aloom. 10 Di hukahu hata Ata Emit, Buynumabu batawool di been d'înje huc, ña nijam hurimahu kujeeŋandawom halhoom non hata kârim, 11 haanommi: “Wahaw wa mbi ujuk, nuŋiic wo di kaytaku, ban nubon ko be di sîgrisiyaasu saamom hutok di sigaba sammi di sîsuka'use: Yata Ephesu, di yata Esmiirna, di yata Pergamu, di yata Tiyatiira, di yata Saardu, di yata Philadeelphiya, di poop yata Lawodiseeya.”
12 Ña nîtiiwo ma ijiker anaw alobulom d'înje. Be na igam nîtiiwuwe, ña nijuk sihikitenumasu hutok di sigaba sata ûuru. 13 Be di tutaru tata sihikitenuma'usu, nijuk anaw anaamoorum non añool ajamaat, âjupom êsabadooraay ebalh be di etaam, ban nakoko kabaŋaku kata ûuru di êsigiray. 14 Walaw wata hûkuwahu hatawool, di ûtumpaay peretet non ehul, kûkilaku katawool di kûjeel non sambun; 15 ûkandumaw watawool, di uga wajwaj non mañ maaneyim hûgebaayahua mâwuyenim di êphuurna; hurimahu hatawool, di hulhoo'non mumel maloloboore. 16 Ban nasoh di kaŋenaku katawool kûriraku sootasu hutok di sigaba, di butumabu batawool ya câalhumuu'dô elaamay yayabum noon; buulabu batawool di buga wajwaj non jaley ajuumene.
17 Be na ijukoom, ña nilo to di ûkandumaw watawool non an akete. Ña naga kaŋenaku katawool kûriraku d'înje ma aanom: “Sâakoli! Înje igam anaw âtiyaaraw, niga poop anaw âbanumaw. 18 Înje igam anaw arommi; malhegen niketenketemmi be jaat injumu ma irommi be nanoonan. Ban înje eekum ekulhulumay yata eketay, di poop yata tiŋatu ta bukanaku kakeem kemmi. 19 Moo, uŋiic wahaw uwe wa ujuum waamom wata jaat, di waawu wâreesewuul. 20 Moo, ûde wahaw wañoorim wata mata sootasu'usu saamom hutok di sigaba sa ujuum sa asoom di kaŋenaku kûriraku, di poop sihikitenumasu sata ûuru; soota'usu saamom hutok di sigaba, soo sigam kumalaakaku kata sîgrisiyaasu saamom hutok di sigabaasu. Sihikitenuma'usu sata ûuru sa ujuum poop, soo sigam sîgrisiyaa'usu saamom hutok di sigabaasu.”