22
Ban amalaakaw umu nâyisom kaalaku kata mumelamu mata eroŋay majaaŋum nom kajukoorum kagam walhalhalh, ma ya mâcaalhumulom di hulhikahu hata Emitay, di poop Êgaraniinaay. 2 Di tutaru tata êsuka'uyu, di poop urebaw poowo wata kaala'uku, buyaajabu bata eroŋay di bulako bo bawollhem muriyaayamu ñeemo kunŋen di ñagaba kajaañoojaañ, mata ulheeŋooleeŋ di buwolh hanor. Ban utojaw wata bo bubuunabu be bata âmbasuk peh. 3 Moo, deetinki bajuree'dô kapaawa, mata di êsuka'uyu, hulhikahu hata Emitay, di Êgaraniinaay mbi hulako dô, ma bugorooraabu bata yo mbi ya kûbinken yo, 4 di kujuk buulabu bata yo, di kûriiŋaku katayiil di ŋiici kañaaŋaku kata yo. 5 Mata dôo leetubi baj tijone, momakiimom joonut ma elampa êlu dô, palimo ehikitenum, palimo jaley, mata Ata Emit aamom Emitay, majaaŋaamu matawool mbi muhikiteniil, ma mbi kulako di kâyyaku be nanoonan.Jesus mbi âlaañul
6 Ban amalaakaw naanom joon: “Eloba'uye, elobay yâynenaayay, yagam elhegenumaayay. Moo, Ata Emit aamom Emitay yata uynumaw wata buñaaŋenaabu bata kûboñaku kata yo, yoo ebollom amalaakaw ata yo ma âyis bugorooraabu bata yo wahaw waatumbi piyo di uga.”
7 Jesus nâanul: “Jijaa, înje eetukapiyo kâlaañul; moo, bukanaku kasoom elobay yata buñaaŋenaabu bata kûboñaku kata Emitay yammi di kayta'uke, kubaje hûpiira.”
8 Înje Joŋ, înje ijammi wahaw uwe, ban nijuu'wo poop; be na ijanwom, ban nijuu'wo, ña nîtiigen di ûkandumaw wata amalaakaw umu a ya âyisonwom ma îbinkenool. 9 Be naanom: “Jijaa, aatuba uga ume, mata înje agorooraaw ata Emitay non aw, di kutiyi, di buñaaŋenaabu bata kûboñaku kata Emitay, di poop bukan kaaku kasoom elobay yammi di êliibra'uye. Moo, ûbinken keb Emitay.” 10 Ban naanom joon: “Aatuba ûñoor elobay yalobim yammi di êliibra'uye, mata etaŋay ehuute kâriiŋ. 11 Moo, anaw âhoŋum, nanken di mâhoŋamu matawool, aahu agawem wahaw wasetutum, nanken di wo, aahu acolum, nanken di macolamu matawool, aahu anapum, nanken poop di manapaamu matawool.”
12 Ban Jesus nâanul joon: “Jijaa înje êetukapiyowul, mbi îlaañul ma mbi incaam ânoowan non ma agoroorum. 13 Mata înje igam Alpha, niga Omega, aamom Anaw Âtiyaaraw, di poop Anaw Âbanumaw, niga poop Hûcukumahu, di Hûbanumahu.”
14 Moo, bukanaku kakullhemmi wañaw watayiil di hûsimahu hata Êgaraniinaay kubaje hûpiira, mata mbi kubaj buruŋ ma kuri di muriyaayamu mata buyaajabu bata eroŋay, ban mbi kunebej di sîtingaasu sata êsuka'uyu. 15 Be bukanaku kâgawikoorem non silhokaasu, di kusaayaku, di bukanaku kakayem kâmooraaku, di buŋaalaabu, di buwaasenaabu, di bukanaku kâkimmi mûcalamu, ban poop ya kucal, mbi kulako tîyaŋ.
16 “Moo, înje Jesus iboñulom amalaakaw ûmbaam ma añaaŋenuul wahaw uwe di sîgrisiyaasu. Mata înje igam huhaarahu hata êbajoorumay yata David, niga poop Yootay yâjeelaay yata urabaw.”
17 Ña Buynumabu, di âbutuwaaw di kêenul: “Bila!” Anaw ajammi eloba'uye poop nâanul: “Bila!” Moo, anaw a basibenabu busoom nâkayil, anaw akimmi mumelamu mata eroŋay, nayaa'mo bancaamut makeel.
Hûbanumahu
18 Moo, înje Joŋ, înje ma isalhenem di bukanaku peh kajammi kûboña'uke kata Emitay kammi di kayta'uke. Anaw a mbi abaŋen wah wakeel di ko, Emitay poop mbi ebaŋen hûlaamahu d'oo halobim mata ho di kayta'uke. 19 Anaw a mbi âcaalhen elob yakeel yâlobidom, Emitay poop mbi êcaalhen bûgiitabu batawool di muriyaayamu mata buyaajabu bata eroŋay, di poop êsukay yata yo yanapaay ya êliibra'uyu eloom mata yo.
20 Anaw aloom wahaw uwe nâanul: “Malhegen, eetubi ipiyo nîlaañul.”
Amiin! Ata Emit aamom Jesus, ûkayil!
21 Moo, kañankiitaku kata Ata Emit kulako di miwuul peh. Amiin.