Jako nañaan kuñoolool
49
Ban Jako nâwoolul kuñoolool, kûriiŋul naaniil: “Kuñoolom bilawaal jîhugom, ma iñaaŋenuul wahaw wa mbi jijuk kajom.2 Kuñoolom, jîmeboor ma jitallhen;
di jijam wahaw wa înje ampawuul Israyel mbi ilobuul.
3 Rubeŋ, aw añoolom âtiyaaraw,
aw ugam sembaasu sûmbaam, aw anaw a ibaam înje baroŋ di hûsimahu hûmbaam,
di kuñoolom peh aw uhammi magawooro,
nuhaŋ poop mabaj sembe;
4 ban ûtalhenoriit non mumel mateye,
moo, ujoonut ban uga anaw ahammi kutiyi,
mata ma upuñenommi ma ukumen di apañoorom
di elalay yûmbaam ma usik yo.
5 Simiyoŋ, koo di Levi, buko batiyaayabu;
ya kuŋar ujaasiyaaw watayiil kûlesum.
6 Moo, îkint êemi di hunongahu hatayiil,
îkint êemi poop di sîcuukasu satayiil,
mata na kubirikum, di kubuj bukanaku;
ban di hûraarikoorahu hatayiil, di kûpar kûmuunaaku ma kuginken ko.
7 Moo buhiiraabu mbi bûlowumiil mata hubirikahu hatayiil,
mata ma hubrikahu hatayiil hujakutum;
ma hugayiil kules bukan.
Be înje mbi iwaasiil di etaamay yata Israyel;
ma iwaasiil
di êbajoorumay yata Jako.
8 Judaa, aw kutiyi mbi kusali,
ban di kûtiigen ma kusaapi;
ban mbi uheek kûsuumutaaku katayi,
ma usoh ñîrogañu ñatayiil.
9 Añoolom, aw Êŋaŋay nugam
ya mbi êcaalh di êbujul bânunkureŋabu,
ban di êlaañul ki ekumen;
añoolom aw non kaŋ non êŋaŋ yanke.
Moo ay mbi asoken
alhaalen yo ta ekumemmi?
10 Ban poop hutampaŋahu hata âyyaw heetubi
hûcaalh di kaŋenaku kata Judaa,
êbajoorumay yatawool, eetubi ebanen an a mbi alako
di kâyyaku be kaŋ na mbi Siloo âkayil,
a mbi âmbasuk peh kujam d'oo.
11 Mbi akok embaamay yatawool di buyaajabu bata ûuba;
hintahu hata yo, nakok ho di kaanaku kahammi majak kata bo.
Wañaw watawool, mbi âkulhenum wo bunukabu,
bûjupaabu batawool, nâkulhenum bo hûsimahu hata ûuba.
12 Ban poop kûkilaku katawool, mbi kûyem mata bunukabu;
ûŋiiŋaw watawool, di ûtumpaay mata miilhamu.
13 Zebuloŋ, oo mbi akin ñata kasamaaku,
etaamay yatawool mbi ega kuyaaku kata usaanaaw;
ban poop mbi ekay be kaŋ Sidoŋ.
14 Isakaar, oo embaamay yabaam sembe,
yahepulemmi ta wahaw wata bûpeenaabu wemmi.
15 Be na ejuum kaan etaamay
ta ehepulemmi ejake,
ban di êsuum,
ña di êtiigen ma kupeenen yo
ma erok non amiikeel.
16 Daŋ, oo mbi aga atallenaaw ata bukanaku katawool,
non bukan kaaku kata di êbajoorumay yata Israyel.
17 Oo anaw âkoliyenim non elun yammi di buruŋabu
ta bukanaku kuyabem,
ya mbi erum kâkandumaku
kata epilinjay
ma anaw ageeloyom
âlowul be kujeeŋanda.
18 Moo ATA EMIT, aw nikobem d'aw ma upakenom.
19 Gaadi, oo bukanaku mbi kunebejool ma kutiikool,
be mbi asoolheniil ma ayawiil.
20 Aseer, oo etaamay yatawool mbi ebaj muriyaayamu
mâsuumaamu, ma mbi mukay be baabu di âyyaw.
21 Naphtali, oo hûkuwelahu
hâwaayemmi habajem
kuŋilaku kajakaaku.
22 Jose oo buyaajabu bawolhem noon,
bammi ñata ta êboojiinaay yemmi;
ba saanasu sata bo sirayoorum
ki sitoo'bo hukalahu.
23 Kûsuumutaaku katawool mbi kunebejool di uŋaagenaw
ma kutiikool di sembe;
24 be uŋenaw watawool mbi ubaj sembe
ma asoh kaŋaagenaku katawool lit,
mata Emitay yata Sembaasu yata Jako, yaamom yasisenem
bukanaku kata Israyel, ban di ega ebangalay yatayiil.
25 Mata Emitay yata ampawool, yaamom Emitay yata Sembaasu, mbi yeenenool
ma ewulool hûpiiraahu
ha mbi hûcaalhumul hatiya di emitay,
di hûcaalhumul poop di mâlahaamu,
ban di ewulool poop hata ebajay,
di poop hata hupooñahu.
26 Hûpiiraahu hata ampayi,
huhaŋe hata simpawom,
huhaŋe hata kurimbiliŋaku kapiyaaku.
Hûpiira'uhu, mbi hulako hatiya di
Hûkowahu hata Jose, ma hulako di
hûriiŋahu hatawool, oo aamom
âwojulim di kutiyool.
27 Benjamiŋ oo eŋiiriŋay yarumem salh;
bûjomaru, di etokoñ ênunkureŋay ya ebuum,
baheperabu, di ewaas eluway.”
28 Moma Jako aloonom kuñoolool kunŋen di egabaay, na añaanum anoowan di buko.
Eketay yata Jako
29 Ban Jako naan kuñoolool: “Înje mbi iket ma nki itoo'bo simpawom. Be mbi jiŋarom ki jihok dânor di buko, di êluŋay yammi di kalhaakaku kata Ephroŋ agam êteew, 30 baamom Makpela, ñata êsukay yata Manre di etaamay yata Kanaaŋ, taamom ta Abrawoŋ anommi di kaŋenaku kata Ephroŋ âgawum husaahahu. 31 Too ta Abrawoŋ, koo di apañoorool Saara kuhokim, di poop añoolool Isaki, koo di apañoorool. Too ta înje poop ihokum apañoorom Leeya. 32 Be kalhaaka'uku di êluŋay yândom, yoo enoomim di uŋenaw wata kuŋilaku kata Eti.” 33 Na Jako aloom umu kuñoolool, ban nalaañen ûkandumaw watawool di elalay, ña nawalo ma atoo'bo simpawool.