Huhokahu hata Jako
50
Na Israyel agam nawaluwe, Jose nalhomool ma ya akaaw, ban ya âpoonool. 2 Ban naan bubuunenaabu katawool kalakonom di bugoroorabu kucookoora ehuluŋaayay ma etuba ekuuñ. Ña bubuunenaabu di kucookoor ehuluŋaayay yatawool non ma Jose alobiim. 3 Be di kuga kukaku bukanaku egaba (40) koo ma kucookoorem di ehuluŋaayay non ma kugawem di mûndeemaanamu matayiil. Ña bukanaku kata Ejiptu di kukaawool kukaku bukanaku êhaaji di kunŋen.4 Na ñikulañu ñigam ñibawe, Jose nakay ki alob di yahaanay kata di eluupay yata âyyaw ma aaniil: “Jiñankiit ma jeenom âyyaw, 5 înje neene ampawom agawommi inuur di kaan, na mbi aket, mbi iŋarool ki ihok di êluŋay ya oo acookoorum di etaamay yata Kanaaŋ. Moo añankiit awulom buruŋ, ma iŋarool be bo ki îhokul, ban nîlaañul.” 6 Ña âyyaw naanool: “Ukay ki uhokulool non ma agawim unuur.”
7 Ña Jose nakay ki âhokul ampawool. Be yahaanay peh yata êsukay yata Ejiptu, di yahaanay yata di eluupay yata âyyaw, 8 di bukanaku peh kata di eluupay yatawool, di kutiyool, di poop kata di eluupay yata ampawool, di kukay d'oo be huhokahu. Ña di êsukay yata Gosen, di ŋañuno keb balaabu, di sîgaraniinaasu, di poop sibaasu. 9 Kata poop sisareetasu, di sipilinjasu, di kusisenool poop. Ña bukanaku kasisenoom, di kumeeŋ noon.
10 Be na kûrimmi tiŋatu ta kûmabulem trîigu, taaneyim Ata di tammi ñata kaalaku kata Jordoŋ, ña di kukaawoo'to lhînŋa. Ña Jose naga ma ampawool akaawi kukaku hutok di kugaba. 11 Be na bukanaku kagam kananewwii, kakimmi di etaama'uyu kujuum ma bukanaku kata Ejiptu ya kukaawum lhînŋa, ña di kêenul: “Ñikula'uñe ñata bukanaku kata Ejiptu, ñîhaahe noon!” Ña di kuga tiŋa'utu kañaaŋaku kata Abel-Misrayiŋ, daamom ñikulañu ñata bukanaku kata Ejiptu.
12 Ña kuŋilaku kata Jako di kuga non ma alobiim, 13 ma kuŋarool be di etaamay yata Kanaaŋ ki kuhok bo di kalhaakaku kata Makpela, kammi ñata Manre, kaamom ka Abrawoŋ anommi di kaŋenaku kata Ephroŋ agam êteew, be huhokahu hata bukanaku katawool. 14 Ña na kuhokoom, ban Jose, koo di kutiyool, di poop bukanaku peh kasiselloom di kulaañ be Ejiptu.
Jose nâtiken kutiyool
15 Ban na kugam kuhoke ampayiil, kutiy Jose di kêenul: “Mante pîya atiyolaal Jose omu ma abirikum d'ulaal, ban mbi agawolaal kôji, ma agalen non ma ugawaaloom.” 16 Ña di kuboñ ma keenool: “Bala ampawolaal aket, 17 nâanoli mbi ooni, oo nalhawi ma uñankiitoli mata hûbajumiñahu ha ubaam d'aw. Moo, uñankiitoli mata ûli bugorooraabu bata Emitay yata ampayi.” Na kuñaaŋenoom umu, ña Jose nakaaw.
18 Be ban, kutiyool di kukay kûriiŋ di kutiigen ñata Jose ma kulhawool keenool: “Atii ûli oome, jaat ûli emiikeelay yatayi!” 19 Be Jose naaniil: “Aatuba jîkoli! Kama înje igam Emitay? 20 Malhegen jîkineene jigawom kôji, be Emitay di elat ma êtiiw mo, ma ega wahaw wajakum, ma bukan kameeŋe mbi kupak di eketay, non ma jijukem di mo jaat. 21 Moo, aatuba jîkoli, înje mbi îkuumenuul be di kuñooluul.” Ña Jose nalob di buko sûum, ña sîsigirasu satayiil di silolen.
Eketay yata Jose
22 Ban Jose di kulako dô Ejiptu buko di bukanaku kata ampawool. Be Jose nalako to ujaañaw êteemeer di kunŋen (110). 23 Ña najuk ebajulankenay egabutay yata añoolool Ephrayiŋ. Najuk poop yata Manasees, mata Makiir aamom añool Manasees, na kuñoolool kubajim, Jose napebiipebiim.
24 Ban Jose naan bukanool: “Înje mbi iket, be Emitay mbi êcaalhenuul ûde di êsuka'uye, ma eŋaruul be ba enuurum kaan mbi ewul Abrawoŋ, koo di Isaki, di Jako.” 25 Ña Jose naga bukanool ma kunuur ban naaniil: “Malhegen înje nîmire kaan, Emitay mbi yenenuul ma jikay. Be na mbi jeen jikay, di Jîcaalhenul woolaw wûmbaam ma jikay di wo.”
26 Ña ban Jose naket oo ma agam ujaañaw êteemeer di kunŋen (110), ña di kucookoor ehuluŋaayay yatawool ma yetuba ekuuñ, ban di kuga yo di êneegaay ban di kuwalen yo dô Ejiptu.