Jako nâjuut
48
Ban piyo maa, bukanaku di kukay ki keen Jose: “Ampayi omu bo ma âjuutum.” Ña Jose naŋar kuñoolool egabaay Manasees, koo di Ephrayiŋ ma nki ajukulool. 2 Na kûrimbom, anaw nakay ki aan Jako: “Jijaa, añooli Jose nakaylo bi ajuki.” Ña Jako naga di sembe ma amunten ma alhaalo ma aleeho di elalay. 3 Ban naan Jose: “Emitay yata Sembaasu yoo êcalhommi di êsukay yata Lûs di etaamay yata Kanaaŋ, ban di ewulom hûpiiraahu. 4 Ma yeenom: Înje mbi igawi ma ubajoor, ma kuŋilaku katayi mbi kumeeŋ noon, ma êbajoorumay yatayi mbi ega sîsukasu lhay. Ban mbi iwul etaama'uye êbajoorumay yatayi ma kuŋaa'yo be nanoonan. 5 Moo, kuñooli egabaay ka ubaam ûde Ejiptu bala înje îriiŋul, kaamom Ephrayiŋ, koo di Manasees, mbi kuga kûmbaam, ma kuga kuñoolom non ma ibaam Rubeŋ, koo di Simiyoŋ. 6 Moo, ûbajul jaa joon kakeel, di kuga katayi, be mbi kuyab di bacacoorerabu bata kutiyiil kaamom Ephrayiŋ, koo di Manasees. 7 Be iñaayi aamom Rakeel, na ûcaalhumulom di êsukay yata Padaŋ naket d'înje di buruŋabu di etaamay yata Kanaaŋ, ûli ma uhuutulom Ephraata. Ña nihokoo'to di buruŋabu bata Ephraata yaamom Beleŋ.”Jako nawul hûpiiraahu Jose koo di kuñoolool
8 Ban na Jako ajuum kuŋila'uku kata Jose, narinkool aanool: “Kama buke yaymoomi?” 9 Jose naanool: “Buke kuñoolom ka Emitay ewulommi ube di êsuka'uye!” Ña Jako naanool: “Uŋallomiil be ute, ma mbi iwuliil hûpiiraahu.”
10 Be Jako mata huhallenahu, kûkilaku katawool di kuga hûp. Ña Jose naŋar kuñoolool be ta ampawool ammi, ña ampawool nalhomiil, ban nâpooniil. 11 Ban naan Jose: “Malhegen înje inongent kaan mbi ilaañ ijuki joon, be Emitay egawom nijuki be di kuñooli.” 12 Ña Jose nateeŋen kuñoolool di kuboŋaku kata ampawool, ban nâtiigen to ma aya hûriiŋahu hatawool di etaam. 13 Ban nalaañeniil be to, ma aga Manasees ajuum kaŋen kûrir kata ampawool, najuumen Ephrayiŋ kaŋen kumay. 14 Be na Jako añuurum uŋenaw watawool ma awuliil hûpiiraahu, ña nahulhoor uŋenaw watawool ma aga kaaku kûriraku di Hûkowahu hata Ephrayiŋ agam âtitaw, naŋar kaaku kumayaku aga di hûkowahu hata Manasees araheem, 15 ban ña nañaaniil ma aaniil:
“Emitay ya simpawom Abrawoŋ, koo di Isaki
kûynemmi,
yaamom yasisenewommi,
kata kaŋ na ibajim be jaat, ewul balaa'ube hûpiira.
16 Amalaakaw amellhenewommi di buhiira,
awul bala ube hûpiira,
ma mbi bukanaku kuwolho kañaaŋaku kûmbaam, di kata Abrawoŋ, koo di Isaki matayiil.
Ban poop di kubajoor,
ma êbajoorumay yatayiil mbi emeeŋen etaamay.”
17 Be na Jose ajuum maama ampawool ahulhoorum uŋenaw watawool ma aga kaŋenaku katawool kûriraku di Hûkowahu hata Ephrayiŋ agam âtitaw, ña sûumutool. Ña na âcaalhen kaŋenaku kata ampawool kûriraku di Ephrayiŋ agam âtitaw, ma aga koo di Hûkowahu hata Manasees araheem. 18 Ban naanool: “Ampoom ntuwa moomu. Di ume mbi uga kaŋenaku katayi kûriraku, mata oo araheem.”
19 Be ampawool naanool see. Ban naanool: “Jimpaa, înje nîmire wahaw wa îgawumom. Manasees êbajoorumay yatawool mbi eyej, be atiyool ume inŋetaaw, mbi aga an âamak; êbajoorumay yatawool mbi ega sîsukasu lhay.”
20 Huka'uhu Jako nawul hûpiiraahu Ephrayiŋ, koo di Manasees ma aaniil: “Ute be kayooŋ, bukanaku kata Israyel mbi ya kuñaan bukanaku, di kûwool uñaaŋaw watawuul ma kêenul: ‘Emitay mbi ewuli hûpiiraahu non ma egam Ephrayiŋ, koo di Manasees.’ ” Ban naga Ephrayiŋ ma ayab kayooŋ Manasees.