Jose nakay di ampawool ki âyis âyyaw
47
Ban Jose nakay ki añaaŋen âyyaw ma aanool: “Ampawom, di kutiyom kûcalho ban di etaamay yata Kanaaŋ di sîgaraniinaasu, di sibaasu, di poop wahaw peh watayiil, koku ban di bantaabu bata Gosen.” 2 Ban Jose naŋar kutiyool hutok ma kukay be baabu âyyaw ma nki âysool kutiyool. 3 Na kûrimmi, âyyaw narinkiil aaniil: “Miwuul wa jîgoroorem?” Di keenool: “Ây, ûli bugoroorabu bâtooli jîtekenaju jata sîgaraniinaasu non sîmpawoli.” 4 Ban di keenool joon: “Ûli ukaylom bi ulako ûde, mata di êsukay yâtooli Kanaaŋ bacaarabu bobu dô meeŋ, ban wah ulet wa mbi uncaamaw wâtooli uhen. Moo uñankiit ûwalholi ma ulako di bantaabu bata Gosen.”
5 Ña âyyaw naan Jose: “Ampayi koo di kutiyi koo kukaylom ki kutooki ube di êsukay yata Ejiptu. 6 Moo etaamay yata Ejiptu yoyu di uŋenaw watayi, ugawiil ma kulako karebaku kahammi majak di bantaabu bata Gosen. Be ga jaa poop non, bukan kakeel koku to di buko, kâmiim mata jîtekenaju, nuñankiit ma ugawiil ma kuga yahaanay yata bûtekenaabu bûmbaam.”
7 Ban Jose nâŋarul ampawool ki âyis âyyaw. Ña Jako nañaan âyyaw ma mbi abaj hûpiiraahu. 8 Na añaanoom, ban âyyaw narinkool aanool: “Nubaje ujaañaw weemo bu?” 9 Jako naanool: “Nibaje ujaañaw êteemeer di anabawo di kunŋen (130), înje ma iyuuŋoorem. Be ujaañaw uwe uyejut, mata utookut wata simpoom, ban ibajut kâsuumaay.” 10 Ban Jako nañaanool joon, ban nâcaalh ma aat.
11 Ña Jose nawul ampawool, di kutiyool tiŋatu tahammi majak di etaamay yata Ejiptu, tammi karebaku kata di etaamay yata Ramasees ma kukin bo, non ma âyyaw aloboom. 12 Ban Jose nâkuumen ampawool, di kutiyool, di poop bukaniil peh, ma ya awuliil wahaw wata huriyahu non ma keemom sanŋiil.
Bacaarabu di bûriiŋul di etaamay yata Ejiptu
13 Be mata ma bacaarabu buhahum, ña wahaw wata huriyahu di ubawo di etaamay peh yata Ejiptu, di yata Kanaaŋ, poopii bukanaku di kulaapo. 14 Ña Jose nanken ma ya anoom wahaw wata huriyahu bukanaku kata Ejiptu, di kata Kanaaŋ, ban naŋar bancaamabu ki aga di kâyyaku. 15 Be na bancaamabu batayiil bubawom, ña bukanaku kata Ejiptu di kukay ki kutoo'to Jose ma keenool: “Annahaanaw, ûwuloli wahaw wata huriyahu ma aatuba uket bacaarabu, mata bancaamabu bâtooli bubawe ban.” 16 Be Jose naaniil: “Ki jîŋarul uncaamaw watawuul ma mbi inoomuu'wo di wahaw wata huriyahu, mata ma bancaamabu batawuul bubawom.” 17 Ña êsukay yata Ejiptu ya kuŋar sipilinjasu, di sîgaraniinaasu, di sibaasu, di simbaamasu ki ya kunoomool ma kubaj wahaw wata huriyahu. Ña di kajaaña'uku, di kubaa'no kuri, mata ma kunommi uncaamaw watayiil di wahaw wata huriyahu. 18 Na kajaaña'uku kugam kubawe, di kulaañ joon be baabu Jose kûriiŋ di keenool: “Annahaanaw, ûli ootubi ûñooroori. Malhegen bancaamabu bâtooli bubawe ban; uncaamaw wâtooli peh, wowu ban di uŋenaw watayi. Moo jaat, ubajut ban makeel; kumuumaku kâtooli, di poop ulhaakaw wâtooli nookum ute keb. 19 Moo, mata wa ma mbi ûketum? Uñankiit ûnoomoli, nunoom poop ulhaakaw wâtooli, ma ûli mbi uga emiikeelay yata âyyaw; ban nûwuloli esepey ma aatuba mbi uket, ma etaama'uye etuba elako to hâa baakut an.”
20 Ña mata ma bacaarabu buhahum, bukanaku kata Ejiptu di kunoom ulhaakaw watayiil peh. Ña Jose nanoom wo peh awul âyyaw. Ña etaamay peh, di ega yatawool. 21 Ban naga bukanaku peh kata Ejiptu ma kuga emiikeelay yata âyyaw. 22 Be anoomut ulhaakaw wata bumaaŋenaabu, mata âyyaw awuleyiim wahaw wata huriyahu. 23 Ban Jose naan êsukay: “Jaat ninoomuu'ban, be di ulhaakaw watawuul iwul âyyaw, moo mbi iwuluul esepeyay ma nki jiwañ ulhaakaw. 24 Be na mbi jijal, di jîgiit wahaw wa jijaalum ma jiga wo kugiitaku hutok, ban di jiŋar haahu hatokemmi jiwul âyyaw, ma miwuul jiŋar uku kubakiiraku jîgawum esepeyay, di poop huriyahu hatawuul di kuñooluul.”
25 Ña êsukay di keenool: “Ûli nûmire kaan aw ûmelhenolim di bacaarabu, moo ma ûwulolim ume kâsuumaayaku, ûli mbi uga emiikeelay yata âyyaw.”
26 Ña Jose naga ma jâgiita'uju jiga mûndeemaanamu ma bukanaku kata Ejiptu kugawem be jaat. Ma ya kuŋar bûgiitabu butokenabu, kuwul âyyaw. Be ulhaakaw wata bumaaŋenaabu keb ugawutum wata âyyaw.
27 Ña kuñool Israyel di kulako di êsukay yata Ejiptu ma kukin di bantaabu bata Gosen, ban di kubaa'bo ulhaakaw. Ña di kubajoor bo ma kumeeŋ noon. 28 Be Jako nalako di êsukay yata Ejiptu ujaañaw kunŋen di hutok di ugaba (17), ña ujaañaw watawool peh di uga êteemeer di bukanaku egaba, di hutok di ugaba (147). 29 Be na agam nahuute kaket, ña naboñ ma kûwollool añoolool aamom Jose, âriiŋul naanool: “Uñankiit, nîkine ûhunen kaŋenaku katayi di huboŋahu hûmbaam,a ban nunuur kaan malhegen mbi ugawom jak, ma aatuba mbi uhokom ûde Ejiptu. 30 Na mbi iket ma ikay ki îtoo'dô simpoom, noot d'înje ki uhok di husaahahu ta kuhokim.” Ña Jose naanool: “Mbi igawi non ma ulobommi.” 31 Be Jako naanool: “Unuur ma!” Ña Jose nanuur. Ban Jako nâsik to di elalay yatawool.