Jose nâyis kutiyool kaan oo atiyiil
45
Ña Jose ma abajutum amunten ta êsukay yemmi, ña nalob lhînŋa ma aan bugorooraabu batawool: “Jîcaalh miwuul peh!” Na bugorooraabu batawool kûcaam, ña Jose nañaaŋen kutiyool kaan oo atiyiil, 2 ban nâŋaaŋulo ma ya akaaw, poopii bukanaku kata dô Ejiptu di kujamool ma akaawem. Ña bukanaku kata yaŋ âyyaw poop di kujam mo. 3 Ban naan kutiyool: “Înje Jose. Ampoom naroŋ to?” Be kutiyool ma kûkolim, an alobut.4 Ña Jose naaniil: “Waasi jîhugulom.” Ña di kûhugool. Ña naaniil: “Înje atiyuul a jinommi ma kuŋallom be ube Ejiptu. 5 Be aatuba jîkoli, aatuba jiwatatenooro poop mata ma jinoomommi ma kuŋallom be ube, mata Emitay ebollommi be ube ma iyabuluul kayooŋ ma mbi imelhen êsukay ma keetubi kuket. 6 Mowme gawe ban ujaañaw ugaba na êsukay peh kemmi di bacaarabu. Be waawu urombo hutok, wa an aatubi awañ ma ajal. 7 Emitay egawommi ma iyabuluul kayooŋ, ma êbajoorumay yatawuul yetuba êbuyo di etaamay ma mbi jiroŋ mata sembaasu sata yo. 8 Moo ntuwa miwuul jigawommi îkayil be ube, be Emitay egawommi ma iga annahaanaw amakum âyyaw. Ma agawom annahaanaw ata siluupasu sata kâyyaku, di poop ata etaamay peh yata Ejiptu. 9 Moo jiñaah cab ki jeen ampoom, înje neene ‘Emitay egawom ube ma iga annahaanaw amakum âyyaw ata Ejiptu, moo âkayil be ube, be aatuba âpiyowul. 10 Âkayil jaa, mbi kukin di kuñoolool, di poop ebajulankenay yatawool di bantaabu bata Gosen ma ukotoor, nâŋarul poop sîgaraniinaasu, di sibaasu, di wah waawu peh wa abaam. 11 Înje mbi îkuumenool, di kuñoolool peh di ujaañaw uwe hutokay wâreesewuum wata bacaarabu. Moo jiloboo'mo ma âkayil ma bacaarabu beetuba bubujool di kuñoolool, di poop uncaamaw watawool.’
12 “Malhegen înje Jose înje oome a jijikerem di ume, Benjamiŋ poop oome omajukem d'înje, moo jîmire kaan înje atiyuul emmi ma ilobem di miwuul. 13 Nki jiñaaŋen ampoom maama înje emmi ma ibaam êriibiinaay di êsuka'uye yata Ejiptu, di jiñaaŋenool poop mata wahaw peh wa jijuum, ban di jiga cab ma jiŋallool be ube.”
14 Ban nalhom atiyool Benjamiŋ di sembe. Ña oo poop nalhomool, ban ya kukaaw. 15 Ban Jose nâpoon kutiyool poopiil ma ya akaaw. Ña inkit kutiyool di kulob d'oo.
Pharawo najam kaan kutiy Jose koku dô Ejiptu
16 Be na âyyaw ajammom yanŋool kaan kutiy Jose kukaylo be dô Ejiptu, ña buko di bugorooraabu batawool, di sûumiil noon. 17 Ña naan Jose: “Oon kutiyi kûjupen wahaw watayiil di simbaamasu satayiil ma kulaañ be di êsukay yata Kanaaŋ, 18 ma nki kûŋarul ampawuul, di poop bukanaku katawool peh be ûde. Înje mbi iwuliil karebaku kahammi majak kata di etaamay yûmbaam, ma mbi kuri husaanumahu hata etaama'uye. 19 Ban nooniil kuŋar sisareetasu ûde Ejiptu dâ nki kûjupul ampayiil, di kupañooriil, di poop kuñooliil. 20 Be nooniil keetubi kunongoor mata wahaw watayiil wa mbi kûbetuu'bo di êsukay yatayiil, mata mbi iwuliil wahaw wahammi majak wata ûde di êsuka'uye.”
21 Ña kuñool Jako di kuga non ma âyyaw alobiim. Ña Jose nawul kutiyool sisareetasu ban nawuliil wahaw wa mbi kuri di buruŋabu. 22 Ban nawuliil anoowan ekompila, be Benjamiŋ nawuloo'so hutok, ban nawulool bancaamabu bârimmi sîteemeerasu sîhaaji sata praata. 23 Nawul poop ampayiil simbaamasu kunŋen, ma sîjup wahaw wajakaaw wata dô Ejiptu wa awuloom, ban nawulool poop saasu kunŋen, sâjupum trîigu, di kûmburuwaaku, di poop wah waawu wata huriyahu wa mbi âriyil di buruŋabu. 24 Be na kugam ma kukay, Jose naaniil: “Aatuba mbi jicec di buruŋabu!”
25 Ña di keet be di êsukay yatayiil ki kutoo'bo ampayiil. 26 Na kûrimmi di keenool: “Ampoom, Jose omu to ma arommi, oo agam amakaaw ata âyyaw ata Ejiptu.” Ña ampayiil di gawool jamalaŋ, naaniil: “Ay! Jose omu to ma arommi? Înje îynent!” 27 Be na ya kuñaaŋenoom maama Jose alobuliim, ban poop najuk sisareetasu sa awuloom bi akayum be bo Ejiptu, ña nkit nâynen ma bûyegetabu batawool bulolen. 28 Ña naaniil: “Ña yeje! Kama malhegen añoolom Jose, omu to ma arommi. Mbi ikay ma nki ijukool bala iket.”