Jose nalaso kutiyool
44
Ban Jose naan annahaanaw ata bugorooraabu bata di eluupay yatawool: “Umeeŋen kusaakaaku kata kûynaa'uku miñamu mata huriyahu, ma ugawiil maama kuyetoorum di mo, di kupeeno. Ban nulaañen ânoowan bancaamabu di husaakaahu hatawool. 2 Nuŋar poop jikoopaaju jûmbaam jata praata ubom di bancaamabu bata aahu agam âbeesumaw, ban nuga di husaakaahu hatawool.” Ña âynaaw umu naga mo non ma aloboom.3 Hata kajom na tigalom haa, di keenool buko ma keet, ña di kukay di simbaamasu satayiil ma keet. 4 Be na kugam kûcaa'dô di êsukay koo bâraagiyorut, Jose naan agorooraaw umu atawool: “Ukay ma usoolhen kûynaa'uku; ûriiŋ jaa usohiil, nooniil: ‘Kama miwuul anaw agawuul jak, di jigawool kôji? 5 Kama jîmirut kaan jikoopaa'uju joo ja annahaanaw ûmbaam asibenumem? Ban poop joo ja ajikerumem ma âmir wah? Wahaw wa jigam ûsuumut kaŋ kuur.’ ”
6 Na asohiim, nañaaŋeniil peh non ma Jose aloboom. 7 Be di keenool: “Annahaanaw, mata wa nûloboli ume? Ûli usokent uga mo. 8 Mata palimo bancaamabu ba utoom di kusaakaaku kâtooli Kanaaŋ, boo nulaañellim. Mo ma mbi ûmirum kaan ûli ugawut bûkuuta. Moo, ûli bu mbi uga ma ûkuut praata, be mante ûuru yata annahaanaw atayi? 9 Be nokoor jaa non an aahu d'ûli aŋaam jikoopaa'uju, nubujool, ban nûgawoli emiikeelay yatayi.”
10 Ña naaniil: “Mbi iga non ma jiloom. Anaw a mbi jikoopaa'uju jijuki di husaakaahu hatawool, oo mbi iga amiikeelaw ûmbaam, ma miwuul jeet.”
11 Ña buko peh di kûwalenul kusaakaaku katayiil cab cab, ban di kûbaahuu'ko. 12 Ña âynaaw umu nâhikul kusaakaaku katayiil, ma âcukumul di aahu araheem, ma âyooliwum di âbeesumaw. Be natoo'jo di hata Benjamiŋ. 13 Ña di kuruusul wañaw watayiil ma kukiisuu'wo, ban di kûjupen joon wahaw watayiil di simbaamasu ma kulaañ be dô di hânkijahu. 14 Be na Judaa koo di kutiyool kûrimmi, Jose oo baroŋ di eluupay, ña di kûtiigen ma kûsik di etaam ñata ta ammi. 15 Ña narinkiil aaniil: “Kama mata wa di jiga ume? Jîmirut kaan anaw non înje, neeliye ijiker nîmir wah peh an balobutom mo?”
16 Ña Judaa naanool: “Annahaanaw, ña ûli mbi ooni bu? Wa noolim ulob? Nooliye umelhoor ute ma ôonul ubajut kûbajumiñ? Emitay etaawemmi kûbajumiñaku kâtooli. Moo jaat ûli pôopoli, mbi uga emiikeelay yatayi.”
17 Be Jose naanool: “Mumulet bi iga mo; anaw a jikoopaaju jijukim di husaakaahu hatawool, oo mbi aga amiikeelaw ûmbaam, ma miwuul jeet di kâsuumaay be baabu di ampawuul.”
Judaa nâamiyoor Benjamiŋ
18 Be Judaa nakay ki âhug Jose ma aanool: “Annahaanaw, uñankiit ukobom ma iñaaŋeni hurim. Be ootuba ubirik d'înje, mata aw poop nubaje sembe non âyyaw. 19 Mata aw ûrinkolim mante âmpawoli omu to, ban poop nûrinkoli mante nubaje atiyaay akeel. 20 Ûli nooni âmpawoli omu to, be nahallene ban, di poop âtiyoli agam âbeesumaw a abaam di huhallenahu. Be atiyool nakete ban, ma di iñaayiil, oo diyoonool antom. Moo âmpawoli naboolaatool noon. 21 Be nôonoli uŋaliwool ma mbi ujukool. 22 Ûli nooni mumulet bi âcaalhul di uŋenaw wata âmpawoli, mata âkayil jaa, âmpawoli mbi aket. 23 Be nôonoli uŋallootool jaa, ootunki ujukurer buulabu batayi. 24 Momakiimom na ulammi ûriiŋ, nulob âmpawoli hurimahu ha ulobolim. 25 Be nûriiŋ huk haahu, nâanoli ûlaañul bi unoom miñamu mata huriyahu, 26 be ûli noonool: ‘Ampoom, mumulet bi ulaañ be bo, ûli bakayit di âtiyoli agam âbeesumaw. Mata ukaayut jaa d'oo, non mumulet bi ujuk buulabu bata âynaaw umu.’ 27 Be âmpawoli nâanoli: ‘Inja miwuul jîmire kaan apañoorom Rakeel, kuŋilaku egaba nabajommi, 28 ban aahu alee'ban. Be înje nêenul ênunkureŋay ebujoom, mo ma ijukutumoom be jaat. 29 Moo jiŋar jaa ume joon, ma wah wakeel ugawool di buruŋabu, mbi jigawom ma ihallemmi ban ume, iket di hulhooŋoorahu.’ 30 Moo mata ma âmpawoli yâarooray yatawool yemmi d'oo, ulaañ jaa 31 ma âmir kaan ukaayut d'oo, mbi aket. Ma aket jaa, ûli mbi ukiimo nahoki di hulhooŋoorahu. 32 Ban âmpawoli, di uŋenaw wûmbaam nawalleloom. Mata înje eenoom ilaañut jaa d'oo, hûbajumiña'uhu nikii'ho be nanoonan. 33 Momakiimom nilhawi ma uñankiit, ma înje ilako ute ma iga amiikeelaw atayi, ma uwalhoo'bo ma aat di kutiyool. 34 Mata mumulet bi ilaañ ki itoo'bo âmpawoli, bakayit d'oo. Uñankiit mata îkint ijuk ampawom di hulhooŋoorahu.”