Kutiy Jose di kulaañ be Ejiptu
43
Be bacaarabu di buhaŋ masoo'no êsukay di sembe. 2 Ña na miñamu mata huriyahu ma kunoomulom Ejiptu mubawom, Jako naan kuñoolool: “Jijaa, mbi jilaañ joon be Ejiptu ma nki jînoomul wahaw wata huriyahu.” 3 Be Judaa naanool: “Ampoom, ûli moo nuñaaŋenim kaan, âynaaw ata bo âhangulolim ma âanoli na mbi ulaañ be bo, ukaayut jaa di âtiyoli, aatubi âjegoli. 4 Moo, ugawool jaa ma ukay d'oo be bo, non nki ûnoomul wahaw wata huriyahu! 5 Be ulat jaa d'oo, ûli otutubo, mata âynaaw umu naane mumulet bi uhank bo ûli bakayit di âtiyoli.”6 Ña Jakoa naaniil: “Kama mata wa ma jigawumommi buhiira'ube, ma jiñaaŋenool kaan jibaje atiyaay aahu ammi ube?” 7 Ña di keenool: “Ampoom, âynaaw umu oo âniihuloorolim mata batiyaayabu bâtooli, di poop mata bukanoli; ma ârinkoli mante âmpawoli naroŋ to. Ban nârinkoli joon mante nubaje atiyaay aahu. Ña nuñaaŋenool, mata oo ârinkolim! Ûli unamulent kaan mbi âanoli, na mbi oon ulaañ be bo nukay d'oo.”
8 Be Judaa naanool: “Ampoom uwaa'bo Benjamiŋ ma ukay d'oo ma nki ûnoomul wahaw wata huriyahu ma aatuba mbi uketaal bacaarabu ulaal di kuñoololaal. 9 Mata mbi alako di kaŋenaku kûmbaam, moo miñ makeel mugawool jaa ma ilaañellootiyool, noon hûbajumiña'uhu di hulako d'înje be nanoonan. 10 Malhegen kaleteen ma upiyom ume, ûli ma ulaañellom ban hugabutahu.”
11 Be ampayiil Israyel naaniil: “Yoo, kama ma jiloom umu, mbi jeen jikay di jiŋar wahaw wajakaaw wata ube di etaama'uye: balsamu yinŋet, di jîkum jinŋet, di muheeñamu, di miira, di nosis sata pistaseera, di poop amenduwiña, jiga di kusaakaaku ki jiwul âynaaw umu. 12 Be mbi jiŋar bancaamabu bayejum, ma nki jilaañenool baaba agawuluum di kusaakaaku. Mata mante oo atilimbemmi. 13 Ban di jiŋar atiyuul ma jilaañ be baabu di âynaaw umu. 14 Moo Emitay yata Sembaasu mbi esisenuul ma ega âynaaw umu ma añankiituul ma âwalhenul atiyuul aahu, ban di jîlaañul poop di Benjamiŋ. Be ga jaa non ma ilako to baakut aŋil, makeel mulee'to.”
Jose di kuri tanor koo di kutiyool
15 Ña kutiy Jose di kuŋar wahaw wajakaaw wata di etaamay yatayiil, di bancaamabu bayejum, di poop Benjamiŋ, ma kulaañ be Ejiptu baabu Jose. 16 Na Jose ajuum kutiyool ma kuŋallom Benjamiŋ, ña naan agorooraaw ata yanŋool: “Ukay di kûynaa'uke be yaŋom ûriiŋ nubuj encaamay ma mbi uri jaat tanor di buko situtula.”
17 Ña agorooraaw umu naga non ma Jose aloboom ma aŋariil be yanŋool. 18 Be na agam oo ma akayem di buko be di eluupay yata Jose, ña di kûkoli, di kunong ma kêenul: “Ulaal ma kuŋallolaam ume be ube, nîynene mata bancaamabu bata ma, ba kulaañellom di kusaakaaku katoolaal na ukaylaam bûtiyaar, moo nîynene mbi kuwatatenolaal, ban di kûlowumolaal ma kuŋar simbaamasu satoolaal, ban di kugawolaal emiikeelay yatayiil.” 19 Ña di kukay ki kûhug agorooraaw umu ata Jose di êtingaay yata eluupay ma 20 keenool: “Annahaanaw, uñankiit ûli nûkine ulobaal. Ûli ube nukaayelom hunoomahu hata wahaw wata huriyahu, 21 be na ootum ûriiŋ tiŋatu ta uhepulemmi, nuhelh kusaakaaku kâtooli, nûjuu'dô bancaamabu bâtooli pôopoli jememem; moo boobe ba ulallom di bo, 22 ban nûŋarul poop baabu ba mbi ûnoomum wahaw wata huriyahu. Be ûli ûmirut anaw agabom di kusaakaaku kâtooli.”
23 Ña agorooraaw umu ata di eluupay yata Jose naaniil: “Jîwaayen, aatuba jîkoli! Nîynene kaan Emitay yatawuul, yaamom yata ampawuul, yoo yagam bancaama'ubu di kusaakaaku katawuul. Mata înje niyaayaam bancaamabu batawuul.” Ban nâcaalhenul Simiyoŋ ma aŋarool ki aga ta kemmi.
24 Ña âynaaw umu naŋariil be di eluupay yata Jose, âriiŋ nawuliil mumelamu ma kukulhen ûkandumaw watayiil, ban di kunebej di eluupay; ban poop nawul simbaamasu satayiil sihen. 25 Ña ban kutiy Jose di kubandoor wahaw wajakaaw wa kuŋallom bi kuwulool, mata ma kujammi kaan buko mbi kuri jaat tanor d'oo situtula. 26 Ña na Jose ârillom di eluupay, kutiyool di kuwulool wahaw uwu wajakaaw wa kuŋalloom, ban di kûtiigen ma kuya kûriiŋaku katayiil di etaam. 27 Ña Jose narinkiil mante koku to kâsuumaay, ban naaniil: “Annahaanaw a jilobommi matawool aamom ampawuul, bu nagabom? Naroŋ to?” 28 Di keenool: “Âmpawoli aamom agorooraaw atayi, naroŋ to, omu to kâsuumaay.” Ban di kûñup joon ma kusaapool.
29 Be na Jose ya âjikeriim, najuk atiyool aamom Benjamiŋ a kuwoogum iñaawaay, di ampawaay, ña narinkiil aaniil: “Soŋo atiyuul agam âbeesumaw oome a jilobommi matawool?” Ban naan Benjamiŋ: “Jimpaa, Emitay mbi ewuli hûpiira.” 30 Ban Jose nanongoor mata atiyool Benjamiŋ nañankiit, ña nanebej di êwaanaatay yaayu âriiŋ nakaaw dô. 31 Ban namunten ma asoh bûyegetabu batawool, nâbuuhul ban nâcaalhul, ma aaniil: “Jigab ma kuri.”
32 Ña di kugab Jose diyoonool, ban di kugab poop kutiyool diyooniil. Ban di kugab poop kata dô Ejiptu diyooniil, mata buko ñôñoy kari tanor di bukanaku kagam êbrewwi. 33 Ña kugorooraaku katawool di kugawiil ma kuleeho kujooŋoor di Jose, ban di kuleeheniil ma kugawiil bûraherooray, ma kûcukum di aahu araheem be kaan di aahu âtitaw. Ña di kujaahali ma ya kujikeroor. 34 Be di kugabiil di wahaw wata huriyahu hata Jose. Be di kuga wata Benjamiŋ ma uhaŋ wata kutiyool ñeemo hutok. Ña di kuri, ban di kujaken; ña di sûumiil mâamak di Jose.