Kutiy Jose di kukay be Ejiptu
42
Na Jako âmiim kaan miñamu mata huriyahu momu Ejiptu, ña naan kuñoolool: “Jimpayi, kama mata wa ma jigawummi ume baŋ? 2 Ban înje nijame kaan miñamu mata huriyahu momu Ejiptu. Jikay be bo ma nki jînoomul, ka mbi bacaarabu bubujolaal.”3 Ña kutiy Jose kaamom kunŋen, di kukay be Ejiptu ma nki kûnoomul miñamu mata huriyahu. 4 Be Jako mata ma âkolim ka mbi âbeesumaw atawool Benjamiŋ miñ makeel mugawool, ña agawutool ma kukay di kutiyool. 5 Ña kuŋila'uku kata Jako, di kulako no di kaasaaku kata bukanaku kakayum be Ejiptu mata ma bacaarabu bulakonom di etaamay peh yata Kanaaŋ.
6 Be mata ma Jose aganom anaw amakum âyyaw ata Ejiptu, oo ya anommi bukanaku peh miñamu mata huriyahu. Ña na kutiyool kugam kûriiŋe ta ammi, di kûtiigen ma kuya kûriiŋaku katayiil di etaam. 7 Be na Jose ajukiim namanjiil, ña nâhooloor ma aga non âmirutiil, ma âhanguliil ma aaniil: “Miwuul ûbey jîcaalhumulom?” Di keenool: “Ûli di etaamay yata Kanaaŋ nûcaalhumulom bi unoom miñamu mata huriyahu.”
8 Jose oo ma amanjum jak kutiyool, be buko kumanjutool. 9 Ña nawolho sîyawutasu sa abiim bi âyawut matayiil. Ña naaniil: “Miwuul, bulasuwaabu bata sîsukasu. Miwuul, miwuul jikaylom bi jîlasuwoli ma jîmir mata êsukay yâtooli.”
10 Be di keenool: “Iyiy, annahaanaw, ntuwa moo. Ûli, ûli ukaylom hunoomahu hata miñamu mata huriyahu. 11 Ban ûli peh kuŋilaku kata an anor. Ugawut bûkanikoor; ugawut poop bulasuwaabu bata sîsukasu.” 12 Be Jose naaniil: “Ntuwa malhegen! Miwuul, miwuul jikaylom bi jîlasuwoli ma jîmir mata êsukay yâtooli.” 13 Di keenool: “Annahaanaw, malhegen ûli di batiyaayabu bâtooli noomoyeen kunŋen di egaba. Ûli peh âmpawoli anor; aahu agam âbeesumaw omu bo di âmpawoli di etaamay yata Kanaaŋ, be aahu ata d'ûli alee'ban.”
14 Be Jose naaniil: “Non ma ilobuum jaat, miwuul bulasuwaabu bata sîsukasu! 15 Be mbi iga ma îmir mante ma jiloom malhegen. Inuuruul kaŋ ây; mumulet bi jîcaalh ûde, âbeesumaw atawuul oo bakayiloot be ute. 16 Mbi ikulhuul ûde, ma an anor di miwuul akay ki aŋallool, ma mbi îmir mante maama jiloom malhegen. Be gawut jaa malhegen, inuuruul kaŋ ây, nîmir kaan miwuul bulasuwaabu bata sîsukasu.” 17 Ña naga ban nâkullhii'dô kukaku kûhaaji.
18 Be di hukahu hûhaajutahu, naaniil: “Înje anaw âkoliyem Emitay, moo jiga jaa non ma mbi ilobuul an aatukabujuul. 19 Nokoor jaa non miwuul bukanaku kalhegenumaayaku, di jiwalh ûde atiyuul aahu ma miwuul jikay di miñamu mata huriyahu be yaŋuul mata koku di bacaarabu. 20 Be mbi jîŋarul âbeesumaw atawuul, ma mbi îmir mante maama jiloom malhegen. Moo, jiga mo jaa an aatubi abujuul.” Ña di keenool: “Yoo, mbi uga mo!”
21 Be di kuga ban di kulob ma ya kêenul: “Jijuke, na atiyolaal ya alhooŋoorom ma ya awaasiyenoorolaal ma aanolaal, uñankiitaalool, be ulaal nulataal; momakiimom ma ûlaamumaalem di ume jaat.” 22 Be Rubeŋ naaniil: “Kama eenutuu'no aatuba jiga jimpaa makeel, di jilat? Moo, jaa bûkiraabu batawool busoholaal.” 23 Be kûmirut kaan Jose oo ma ajamem. Mata anaw oo too a ya anamulenoom. 24 Ña nâcaa'to ta kemmi ma nki akaaw. Ban nâlaañul be ta kemmi ma ya alob di buko. Be ban naboñ ma kusoh Simiyoŋ ma kugenkoo'to ta kemmi ma kujukool.
Kutiy Jose di kulaañ be Kanaaŋ
25 Ban Jose naan bugorooraabu kumeeŋen kusaakaaku katayiil miñamu mata huriyahu, ban di kulaañen ânoowan bancaamabu di husaakaahu hatawool, ban di kuwuliil poop wahaw wa mbi kuri di buruŋabu. Ña di kugawii'mo. 26 Ña di kûjupen miña'umu mata huriyahu di simbaamasu satayiil, ban di keet. 27 Be na kûrimmi tiŋatu ta kuhepulemmi ma kuŋot, aahu ata di buko nâbaahul husaakaahu hatawool ma awul embaamay yatawool eri, nâjuu'do bancaamabu batawool. 28 Ña naan kutiyool: “Be! Jijaa, înje kulaañellom bancaamabu, boobe di husaakaahu!” Ña buko peh di kûkoli ma ya kuboboken. Ña ya kurinkoor kêenul: “Kama ulaal way uwe? Mata wa Emitay di egawolaal ume?”
29 Ña na kugam kûriiŋe Kanaaŋ, di kuñaaŋen ampayiil Jako maama kugalobom peh ma keenool: 30 “Ampoom, âynaaw amakum âyyaw ata êsuka'uyu, âriiŋ na âhanguloli, ma âsoholi non bukan kalasuwem sîsuk. 31 Be noonool ûli ugawut bûkanikoor kalasuwem sîsuk. 32 Noonool poop ûli noomoyeen kunŋen di egaba jaa âmpawoli abaam, be aahu alee'ban, ma aahu agam âbeesumaw oo ambom di âmpawoli di êsukay yata Kanaaŋ. 33 Be nâanoli ma mbi âmir kaan ûli ugawut bûkanikoor, mbi anor ata d'ûli alako to, ma bukaaku kukay di miñamu mata huriyahu mata bacaarabu di eluupay, 34 ma nki ûŋarul âtiyoli agam âbeesumaw ma mbi âmir kaan ûli ugawut bûkanikoor kalasuwem sîsuk. Uga mo jaa, mbi âwalhenul âtiyoli, ban mbi âwalholi bo ma ya ulanñoor di etaamay yatayiil.”
35 Be na kugam kâkacaalhenem miñamu mata huriyahu di kusaakaaku, ña anoowan najuk di hatawool jimbootaaju jata bancaamabu batawool. Ña na kujuum munboota'umu mata bancaamabu, buko peh di ampayiil di kûkoli. 36 Ña ampayiil naaniil: “Ña jeene jiban kaŋ kuŋilaku kûmbaam peh? Jose nakete ban, Simiyoŋ alet ute. Ña nki ma jiŋar joon Benjamiŋ? Moo wahaw uwe peh, be d'înje!”
37 Rubeŋ naan ampayiil: “Ampoom, uwulommool di uŋenaw wûmbaam, mbi ilaañeliwool. Be ilaañellootiyool jaa, nuŋar kuñoolom egabaay ubuj.”
38 Be Jako naanool: “Añoolom aatutu bo, mata atiyool nakete ban, oo diyoonool aŋañunom. Jikay jaa ma miñ makeel mugawool di buruŋabu, mbi jigawom iket di huhallena'uhe ñânkiiteni.”