Jose nañaaŋen mata sîyawutasu sata Pharawo
41
Ban na ujaañaw ugaba ugam ubaye, âyyaw ata Ejiptu aamom Pharawo, nâriiŋ huk haahu nâyawut ma ajuum ñata kaalaku kaaneyim Niilu. 2 Piyowut najuk sibaasu hutok di sigaba sijak, ban di sîlag ma sîcaalhewuum di kaala'uku sîriiŋul ya sihen to mahosamu. 3 Be na ya sihemmi, nâjukul poop saasu seemo hutok di sigaba sakojom, ban di silhaalh, ma sîcallhom poop di kaala'uku ki sijuum ñata ta usu semmi ma sihenem di to. 4 Be ban usu sakojuwaasu ban di silhaalh, ya sitokoñ usu sajakaasu, ban di sîlag. Ña natonko.5 Na agam naŋote nâyawut joon, najuk trîigu hâcaalhemmi di hubaj ujaabaw weemo hutok di ugaba, ban batoojerabu bata wo di bujak ban di bûnaat. 6 Ban najuk joon ujaab waawu weemo hutok di ugaba wâcaalhemmi poop di trîigu uhu, wa ehentelaay yata ba jaley âcaalhumewuum egam ma uramp, di uhoot. 7 Be ban ujaaba'uwu wahootaaw ya umer waawu wajakaaw ban di ûlag. Ña na atonkom, nanamulen kaan oo âyawutum.
8 Be na titijemmi, âyyaw umu bûyegetabu batawool di bûgun, ña nâwoolul buwaasenaabu, di poop bukanaku kajaalhuwaaku kata dô, ma alobiil mata sîyawuta'usu, be an aaliit añaaŋenool mata so.
9 Ña annahaanaw ata bukalhaabu bata bunukabu batawool naanool: “Ây, înje nibaje hûbajumiñ. 10 Malhegen na ubrikum d'ûli, ûli di annahaanaw ata bubolaabu bata kûmburuwaaku, nûŋaroli ki ukulh di ekullhay yammi di eluupay yata annahaanaw ata bupooyaabu. 11 Be nûriiŋ huk haahu, ûli pôopoli nûyawut, be sîyawutasu sâtooli silobut miñ manor. 12 Ña ajaajuwaw aahu a ûkulhooridom agam êbrew aamom amiikeelaw ata Potiphaar, nulobool mata sîyawuta'usu, nâñaaŋenoli mata so. 13 Be non ma âñaaŋenolim, moomu poop kaŋ magam. Ña înje nilaañelli bi igoroor, ma apaalom akuuci.”
14 Ña âyyaw naboñ ma kûŋarul Jose. Ña di kûcaalhellool cab di ekullhay, ban di kuweelhool hulempahu, ban di kûjupenool wañ waawu, ban di kuŋarool ki kuwuloowool. 15 Âriiŋ âyyaw naanool: “Înje, înje îyawutum, be an alet aalim añaaŋenom mata so, be nijame kaan aw anaw âyawut jaa ma alobi mo, nuñaaŋenool mata so.”
16 Be Jose naanool: “Ây, ntuwa înje iñaaŋenem mata sîyawut. Emitay eñaaŋenem mata so, moo yoo mbi eñaaŋeni hârirahu hata so.”
17 Ña âyyaw naan Jose: “Înje îyawutum, nijuum di kakotenaaku kata kaalaku kata Niilu. 18 Ña nijuk sibaasu seemo hutok di sigaba sîlag, ban di sijak, ma sîcallhom di kaala'uku sîriiŋul ya sihen to. 19 Be na ya sihemmi, nîjukul poop saasu hutok di sigaba sakojom, ban di silhaalh, ma sîcallhom di kaala'uku. Be noo kaŋ noo, ijukorut sibe sakojo mo non soo ûde di etaamay yata Ejiptu. 20 Ña sibaa'usu sakojuwaasu, ban di silhaalh, di sitokoñ usu sâlagaasu. 21 Be palimo poop ma sitokonsom, an aaliit ajuu'so nanamulen kaan wah sitokoñe, mata sîlagut. Ña ban nitonko.
22 “Iga niŋote, nîyawut joon, nijuk trîigu hâcaalhemmi ma hubaj ujaabaw weemo hutok di ugaba, ban di ujak, ban batoojerabu bata wo di bûnaat. 23 Ban nijuk joon ujaab waawu wâcaalhemmi poop di trîigu uhu weemo hutok di ugaba, wa ehentelaay yata ba jaley âcaalhumewuum egam ma uramp, di uhoot. 24 Ña nijuk ma ujaabaw uwu wahootaaw ban di ulhaalh, ya umeem uwu wajakaaw ban di ûnaat. Be na iloomom buwaasenaabu, an aaliit añaaŋenom mata so.”
25 Ña Jose naanool: “Ây, sîyawutasu sa ûyawutum wahaw wanoraw. Emitay yoo êyisim wahaw wa mbi ega. 26 Moo, sibaa'usu saamom hutok di sigaba, ban di sijak, soo sigam ujaañaw hutok di ugaba; ujaabaw uwu waamom poop hutok di ugaba, ban di ujak, woo ugam poop ujaañaw hutok di ugaba. Moo sîyawuta'usu peh, sosu ma siloom mata wahaw wanoraw. 27 Be saasu poop sagam hutok di sigaba sakojuwaasu, ban di silhaalh sasoolhellom usu sâlagaasu, di poop ujaabaw uwu waamom hutok di ugaba wakojuwaaw ban di uhoot, wa ehentelaay yata ba jaley âcaalhumewuum egam ma uramp, dôo peh ujaañaw hutok di ugaba wâreesewuum wata bacaarabu.
28 “Moo Ây, wahaw ilobim ume malhegen. Mata Emitay yoo êyisim wahaw wa mbi ega. 29 Ujaañaw hutok di ugaba wôwareesewuum wa mbi êsukay kujal, 30 ban nkit ujaañaw uwu wata bacaarabu di ûriiŋul di etaamay yata Ejiptu. Be di ujaañaw uwu wata bacaarabu, êsukay mbi kûwuken ujaañ waawu wata hupooñahu, mata bacaarabu mbi bûsohikoor êsukay. 31 Mata ma bacaarabu mbi bûhahikoor, an aatubi awolho kaan nalakuweene di ujaañ wata hupooñ. 32 Moo, ma ûyawutum wahaw uwu wanoraw ñagaba, mata ATA EMIT omu ma anongum kaan mânooman mbi aga wahaw wa âyisim, ban poop omu ma ahakemmi kaga wo.
33 “Moo ây, jake ma ujot anaw âmiilankemmi, ban najaalho, ma ugawool aga annahaanaw a mbi amaki di etaamay peh yata Ejiptu. 34 Ban nujot poop yahaanay yaayu ka mbi ya kuŋar bûgiitabu butokenabu bata wahaw peh wajalim di êsuka'uye di ujaañaw uwu wata hupooñahu. 35 Ban di ujaañaw uwu wata hupooñahu, bukana'uku kajotim, mbi ya kûŋarul wahaw uwu wata huriyahu, kuga di siluupasu sata êsukay sammi di uŋenaw watayi. 36 Ña na mbi ujaañaw wata bacaarabu ûriiŋul, wahaw wañakim di uŋari ma êsukay keetubi kuket bacaarabu.”
Âyyaw naga Jose ma aga annahaanaw amakoom
37 Na Jose aloom umu, ña âyyaw di bucolenaabu batawool di sûumiil noon hurima'uhu. 38 Ña narink bucolenaa'ubu ma aaniil: “Soŋo pîya mbi ooliyaal ubajaal ûde di êsukay yatoolaal an non ume, a buynumabu bata Emitay bemmi d'oo?” 39 Ban nâtiiwo ma aan Jose: “Magam Emitay egawim ma ûmir wahaw we peh, ban poop an alet ajaalhuwe non aw, 40 mbi igawi ma uga amakaaw ûmbaam di kâyyaku, ma êsukay peh mbi ya kujam d'aw. Be înje keb mbi iga annahaanaw atayi mata ma igam âyyaw.”
41 Ban âyyaw naan Jose: “Mowme nigawi ban uga annahaanaw ata di êsuka'uye.” 42 Ña nâcaalhen ekopay yatawool, aga di kaŋenaku kata Jose, ban nagawool alhiimo wañaw wata ehulay yajakaay, ban nagawool poop kaseelaku kata ûuru di elhekejay. 43 Ban naga Jose âjupo di esareetay egabutay yatawool, ban naga bukanaku ma ya kûŋaaŋulo ma ya kêenul: “Jileegenool!” Ña âyyaw nagawool ma aga annahaanaw ata di etaamay peh yata Ejiptu.
44 Ban âyyaw naan Jose: “Înje igam âyyaw ata êsuka'uye, be mumulet bi an aga ûde miñ makeel aw baanutool aga mo.” 45 Ban âyyaw nagawool kañaaŋaku kaaneyim Zaphenaati-Paneeya, ban nawulool Asenaati ayab, aamom añool Potiiphera agam amaaŋenaaw ata êsukay yata Om. Ña Jose ya areesoor di etaamay peh yata Ejiptu.
46 Na Jose agam ujaañaw anabawo di kunŋen, no na âcukum bugoroorabu bata Pharawo aamom âyyaw ata Ejiptu. Ña nâcaalh ma ya areesoor etaamay peh yata Ejiptu. 47 Di ujaañaw uwu hutok di ugaba wata hupooñahu, êsukay di ejal no noon. 48 Ña di ujaaña'uwu, Jose nabom wahaw peh wata huriyahu di etaamay yata Ejiptu tiŋ tanor. Be naga di êsukoosuk, nâmeb bo wata bo tiŋ tanor. 49 Ña Jose nâmeb wahaw wata huriyahu poopii di mumeeŋ non hulhuusahu hata kasamo. Ña poopii aaliit apin mo, mata ma kubajut kuliik mo.
50 Be bala ujaañaw uwu wata bacaarabu ûriiŋul, Jose oo babajee'ban kuŋilaku egaba koo di apañoorool Asenaati, aamom añool Potiiphera agam amaaŋenaaw ata êsukay yata Om. 51 Ña Jose naga añoolool âtiyaaraw kañaaŋaku kata Manasees, mata ma ammi: “Emitay yoo egawommi îwuken hûlaamahu ha îlaamum, di poop eluupay yata ampawom.” 52 Aahu agabutaw nagawool poop kañaaŋ kata Ephrayiŋ, mata ma ammi: “Emitay ewulom kuŋilaku di etaamay ta ilakom di hûlaamahu.”
53 Ban ujaañaw uwu hutok di ugaba wata hupooñahu di etaamay yata Ejiptu di ubawo. 54 Ña ujaañaw uwu hutok di ugaba wata bacaarabu di ûriiŋul non ma Jose abiim ba alobiil. Ña bacaarabu di busoh sîsukasu peh, be êsukay yata Ejiptu buko di kubaj kuri. 55 Be na êsukay yata Ejiptu kugam kujaalho poop bacaarabu, ña bukanaku kata dô di kukay ki kukaawoor âyyaw mata huriyahu. Be ya aaniil: “Jikay ki jitoo'bo Jose, maama mbi alobuul, di jiga mo.”