Jose nañaaŋen mata sîyawutasu
40
Ban huk haahu, bugorooraabu egaba kata âyyaw ata Ejiptu di kutil d'oo, kaamom annahaanaw ata bukalhaabu bata bunukabu, koo di ata bubolaabu bata kûmburuwaaku katawool. 2 Ña nabirik di buko kaŋ lhînŋa, 3 nasohiil ki akullh di ekullhay yammi di eluupay yata annahaanaw ata bupooyaabu, daamom dâ Jose akullhim. 4 Ña annahaanaw umu, naga Jose ma ya âjikerii'dô ma acookooriil. Be di kulako dô piyo. 5 Huk haahu hukaru, buku egabaay kâkullhidom, di kûyawut; be sîyawuta'usu silobut miñ manor.6 Na tigam tititijene, Jose nakay ka ayuugelliil, na ârimmi nalaso kaan ûyegetaw watayiil ulet ma ûsummi. 7 Ña narink yahaana'uyu kakulhim ma aaniil: “Kama mata wa ma jîgawummi ume ñânkiiteni?” 8 Di keenool: “Sîyawutasu nûyawutum jaat, be an alet a mbi ânamulenoli mata so.” Ña naaniil: “Emitay keb yeelim enamulen an mata sîyawut. Jilobom ma maama jîyawutum.”
9 Ña umu agam annahaanaw ata bukanaku kakalhem âyyaw bunukabu, naanool: “Înje îyawutum, nijuk buyaajabu bawollhem ûuba ma bujummi bujooŋoor d'înje, 10 ban di bubaj saanasu sîhaaji. Be na utojaw ya uleepulom, di bûrumpen ma buwolh utokosaw wata ûuba satatum ban. 11 Be înje ma irunkum ekoopaay yata âyyaw. Ña nîhalul uuba ma iguncen yo di ekoopa'uyu ma iwul âyyaw.”
12 Ña Jose naanool: “Aw sîyawutasu satayi: saana'usu sîhaajiyaasu, sa ujuum umu soo sigam kukaku kûhaaji. 13 Mata ute be kukaku kûhaaji, âyyaw mbi âcaalheni ûde, ma alaañeni di bugoroorabu batayi bata jakalhalaju jata bunukabu batawool non ma ugaweenem. 14 Be na mbi uga aw umu di kâsuumaayaku, uñankiit oonenom ma ulob âyyaw mûmbaam, mante neeli îcaalh ûde, 15 mata malhegen înje kûcaalhellom di êsukay yâtooli di sembe, palimo poop ûde, igawut wah wakiim ma êemummi ûde di ekullhay.”
16 Ña na annahaanaw umu poop ata bubolaabu bata kûmburuwaaku ajammi ma Jose añaaŋemmi jak mata sîyawuta'usu, oo poop naanool: “Înje sûmbaam, înje îyawutum nipeeno musaawamu mûhaaji mata kûmburuwaaku kâtumpaayaaku. 17 Ban di jaaju jalakom hatiya, muriyaayamu kaŋ peh ma bubolaabu bata kûmburuwaaku kucookoorem kuwul âyyaw, moo dôo. Be ban basuwaabu boo dôo ma buriyem di mo.”
18 Ña Jose naanool: “Sîyawutasu satayi, musaawa'umu mûhaajaamu moo mugam kukaku kûhaaji. 19 Mata ute be kukaku kûhaaji, âyyaw mbi âcaalheni ûde ma atij hûkuwahu hatayi, ban naŋari ki arenden di huyaajahu ma basuwaabu butokoñi.”
20 Nagam kukaku kûhaaji, âyyaw naga bugorooraabu peh batawool epeetay yata hukahu hata na abajim. Ña nâcaalhenuu'no annahaanaw umu ata bukalhaabu bata bunukabu, di poop umu ata bubolaabu bata kûmburuwaaku, 21 ban nalaañen aahu ata bukalhaabu bata bunukabu di bugoroorabu batawool. 22 Be umu agam annahaanaw ata bubolaabu bata kûmburuwaaku, nakuumool non ma Jose añaaŋemmi mata sîyawutasu satawool.
23 Be ban annahaanaw umu ata bukalhaabu bata bunukabu bata âyyaw, nâwuken mata Jose.