Jose oo di eluupay yata Potiphaar
39
Malhegen na kûynaa'uku kata êbajoorumay yata Ismayel kuŋaam Jose be Ejiptu, kûriiŋ di kunoomool di kaŋenaku kata âynaaw aaneyim Potiphaar agam an âamak ata êsuka'uyu, ban naga joon annahaanaw ata bupooyaabu bata âyyaw aaneyim Pharawo. 2 Be mata ma ATA EMIT ammi d'oo, ña nabaj hûpiiraahu di eluupay yata âynaaw umu dâ alakom. 3 Ña annahaanaw umu nanamulen kaan ATA EMIT omu d'oo; mata wahaw peh wa agawem, ya ujak. 4 Ña Potiphaar di sûumool Jose noon, ña nagawool ma aga annahaanaw ata di eluupay yatawool ma awalenool wahaw peh di uŋenaw watawool. 5 Be na agam nawalene eluupay, di poop wahaw peh watawool di uŋenaw wata Jose, ña ATA EMIT nawul Potiphaar hûpiiraahu di eluupay, di poop kalhaakaku katawool. 6 Ña na Potiphaar agam nawalhenool wahaw uwu peh, ña makeel mulantool joon, mante huriyahu keb. Be Jose najak ajaajow, ban najuum kaŋ sap.7 Ña apañoor Potiphaar nayond Jose, ña nâriiŋ huk haahu naanool: “Jose, bila ma ukumena!” 8 Be oo naanool see, ban naanool: “Malhegen apañoori annahaanaw ûmbaam, ban nâynenom, momakiimom ma awalenumommi eluupay yatawool, di poop wahaw peh wa abaam. 9 Ban ûde di eluupa'uye, an alet agam annahaanaw ahaŋommi. Ban poop wah ulet ûde wa aanommi mumulet bi igoo'wo, mante aw keb jagam apañoorool. Moo înje bu mbi iga wahaw uwe wâkojom ume? Iga mo jaa, mbi ibaj kûbajumiñaku di Emitay.” 10 Be añakanaw umu hukoohuk ya anken di eloba'uyu. Be Jose nalat, ban âkinoriit poop kûhugoor.
11 Di kûriiŋ huk haahu, Jose nanebej di eluupay ma nki agoroor, be bugorooraabu batayiil an balee'to. 12 Ña añakanaw umu, nasoh bûjupaabu bata Jose ban naanool: “Bila ma ukumena!” Be Jose namellh ma atey be tîyaŋ, ma abetool bûjupaabu batawool.
13 Na añakanaw umu ajuum ma Jose abetoom bûjupaabu ma atey be tîyaŋ, 14 ña nâwoolul bugorooraabu batayiil ma aaniil: “Ntuwa poop êbrew umu aŋallim be ûde, oo ma ammi agawom kagelaku. Âkayil ki atookom di êwaanaatay yûmbaam naane ma amoopom, ma îruuremmi. 15 Be ma ajammi ma îruuremmi, nabetom bûjupaabu batawool ma atey be tîyaŋ.”
16 Ña añakanaw umu nañak to bûjupaa'ubu be na apañoorool ârillom. 17 Ña nañaaŋenool non ma añaaŋemmi kaaku ma aanool: “Amiikeelaw umu agam êbrew a uŋallom omu ammi agawom kagelaku, nâkine ma amoopom. 18 Be na îruuremmi, nabetom bûjupaabu batawool ma atey be tîyaŋ.”
19 Ña na Potiphaar ajammi ma apañoorool aloboom kaan mo ma Jose agawoom, ña nabrik d'oo lhînŋa, 20 ña nasohool ki akullh di ekullhay da bukanaku ka ây akullhum kemmi. Be palimo oo dôo di ekullhay, 21 ATA EMIT nañankiitool, ña nabaj hûpiiraahu ma annahaanaw ata ekullhay sûumoowool. 22 Ña naga Jose ma aga annahaanaw ata bukanaku kâkullhidom, di poop ugorooraw peh wâgaweyidom. 23 Be mata ma ATA EMIT awuum Jose hûpiiraahu, ña akullhaaw umu ânongoororiit makeel mata ugorooraw wa agawewoom aga. Mata wahaw peh wa agawem, ya ujak.