Judaa koo di âsampulool Tamar
38
Ban nownu Judaa nâcaalh ta kutiyool kemmi ma akay ki alako di eluupay yata âynaaw ata êsukay yata Adulaŋ aaneyim Iram. 2 Na ârimbom, najuk añool âynaaw ata êsukay yata Kanaaŋ aaneyim Suwa, ña nayabool. 3 Na añakanaw umu ayabulom harahu aga naroŋe, di kuga aŋilaw umu kañaaŋaku kata Er. 4 Ban nâyabul haahu joon, na aroŋum, di kuga aŋilaw umu kañaaŋaku kata Onaŋ. 5 Ban nalaañ aharet joon, na agam naroŋe, di kuga aŋilaw umu kañaaŋaku kata Selaa. Be na aŋilaw umu abajim, Judaa oo ma akayum ban ki akin di êsukay yata Kesib.6 Ban Judaa nâpaamenul anñaakanaw ki añoolool âtiyaaraw ayab; añakanaw umu naaneyim Tamar. 7 Be añoolool umu âtiyaaraw aamom Er ya âgawikoor, ña ATA EMIT nabujool.
8 Ña Judaa naan Onaŋ: “Mbi uga non ma ugawaalem ma utun apañoor atiyi ma êbajoorumay yatawool etuba êbuyo.” 9 Be Onaŋ ma âmiim kaan kuŋilaku ka mbi kubaj keetubi kuga katawool, ña ya aga kutal di añakanaw umu, ya abet esepeyay yatawool di etaam ma aatuba bi abaj atiyool kuŋil. 10 Ña mata ma ya agam miña'umu majakutum, ATA EMIT poop nabujool.
11 Be Judaa nâkoli ka mbi Selaa aket poop non kutiyool, ña naan âsampulool Tamar: “Mbi ulaañ para be baabu di ampayi, be na mbi Selaa akooben. Ña Tamar nakay ki alako bo.”
12 Ban piyo maa, apañoor Judaa naket aamom añool Suwa. Be na ñikulañu ñibawom, di kukay koo di apaalool aamom Ira ata êsukay yata Adulaŋ, be Timna ma nki kûjukul bukanaku kambom ma kukentem di buhalabu bata sîgaraniinaasu satawool. 13 Ña anaw nañaaŋen Tamar aanool: “Jijaa, âsampuli omareesem be Timna ma nki akent buhalabu bata sîgaraniinaasu.” 14 Be Tamar ma âmiim kaan Selaa nakoobene ban, ban kugawutool ma ayabool, ña nâcaalhen wañaw wa alhiimom wata hûkutaahu, ban nâhooloor ma âhipenoor, ban nakay ki aleeho di êtingaay yata êsukay yata Enayiŋ di buruŋabu bata be Timna.
15 Na Judaa ajukoom ma âhipenoorum, di gawool non Tamar êkusumay. 16 Be anamulent kaan âsampulool, ña nakay ki atookoo'to ma aanool kukay ki kukumen. Be Tamar naanool: “Ukumena jaa, mbi uwulom wa?” 17 Judaa naanool: “Mbi iga ban nibolli jijameenaju.” Be Tamar naanool: “Mbi uwulom wah wakeel isoh para be na mbi ubollom jo.” 18 Judaa narinkool aanool: “Wa mbi iwuli para usoh?” Naanool: “Uwulom kârimbu yatayi, di hûruukahu, di hûtekenumahu ha ookum.” Ña Judaa nawulool wahaw uwu, ban di kukumen. Ña Tamar natakaj. 19 Ban naat, âriiŋ nâcaalhen bew ya âhipenoorum, ma alaañ alhiimo wañaw wata hûkutaahu.
20 Be Judaa naga ban naboñ jijameenaju apaalool ata Adulaŋ ma nki awuu'jo añakanaw umu, ma âyabul wahaw uwu wa awuloom, be nâriiŋ atookutoo'to. 21 Ña narink yîinaay kata to ma aaniil: “Jijukutom añakanaw agam êkusumay aleehuwem ute di buruŋabu bata Enayiŋ?” Be di keenool: “Anñaakan agawe êkusum, âleehuworiit ute.” 22 Ña nalaañ âriiŋ naanool: “Ijukut to anñaakan. Ban poop bukanaku kata to, keene anñaakan agawe êkusum, âleehuworiit to.”
23 Be Judaa naanool: “Be! Alee'to? Yoo, magam jijameenaju niboñim utookutoo'to, ña uwalhoo'bo di wahaw uwu ka mbi êsukay êlhuwola.”
24 Be na kulheeŋaku kûhaaji kugam kubawe, anaw nakay ki aan Judaa: “Jijaa, âsampuli Tamar omu ma agam non êkusum, omma di harahu.” Ña naanool: “Wa, har? Jîcaalh d'oo be tîyaŋ ma nki aboli.”
25 Be na kugam kôkacaalhem d'oo be tîyaŋ, naboñ be baabu âsampulool ki keenool: “Âsampuli naane anaw akiim kârimbu uye, di hûruuka'uhe, di poop hûtekenuma'uhe, aharetenoom. Moo umanj wo ma mante nûmir anaw akiiwom?”
26 Ña Judaa namanj wo, ña nâanul: “Malhegen âsampulom nakooŋe d'înje, mata igawutool ma kuyaboor di añoolom Selaa.” Ña Judaa naga ban, nki alaañut akumen joon d'oo.
27 Be Tamar na hukahu hatawool hûrimmi, nanamulen kaan magabaamu na aakum. 28 Na agam ma aroŋ, aŋil aahu nâcaalhenul jiŋenaju. Ña abuunenaaw naŋar kaweyaku kâyemaaku ma akok di jiŋena'uju, ma âanul: “Ume agam âtiyaaraw.” 29 Be na agam nalaañene jiŋenaju, atiyool nâcaalhul. Ña abuunenaaw naanool: “Bu nugawe ma ûgawul bûlh?” Ña di keenool Peres.a 30 Ban nkit poop atiyool akokim kaweyaku kâyemaaku, nâcaalhul. Ña di keenool Zera.b