Jose koo di kutiyool
37
Ban Jako nakin di etaamay yata Kanaaŋ baamom ba ampawool alakom.2 Be êbajoorumay yatawool mo ma egam:
Na Jose agam ujaañaw kunŋen di hutok di ugaba, ya kukay jîtekenaju jata sîgaraniinaasu di kutiyool kaamom kuñool Biila, koo di Ziilpa, kagam kupañoor ampawool.
Be Jose ya añaaŋen ampayiil wahaw wajakutaaw wa kutiyool kugawem.
3 Malhegen Jako di kuñoolool peh, Jose nahaŋ ma ga di êsigiray yatawool, mata ma abajoom di huhallenahu. Ña nagawool bûjupaabu bubalh bajakum noon, ban di buga kumaacaku kanokoorutum. 4 Na kutiyool kûmiim kaan ampayiil nahaŋ ma ga Jose di êsigiray yatawool, ña di kubirik d'oo, ban kûloboriit d'oo hurim hajake.
5 Kûriiŋ huk haahu Jose nâyawut, ban nañaaŋen so kutiyool. Ña di kuhaŋ mabrik d'oo. 6 Na añaaŋeniim sîyawuta'usu naaniil: “Kutiyaay jitallhen ma iñaaŋenuul. 7 Înje îyawutum, ya ukokaal kubasaku butat kata trîigu, be hubasahu hûmbaam di hulhaalo ma hujuum, katawuul di kuŋoomen ho, ban di kûsik kujooŋoor di ho.”
8 Ña kutiyool di keenool: “Awwa, soŋo nûkine ôonul aw mbi uga âyyaw âtooli?” Ña mata sîyawuta'usu, di poop hurima'uhu ha alobiim, ña di kuhaŋ mabrik d'oo.
9 Kûriiŋ huk haahu Jose nâyawut joon, nañaaŋeniil ma aaniil: “Înje îyawutum nijuk jaley, di hulheeŋahu di sootasu seemo kunŋen di yanor, ma sîsikulom ma sijooŋoor d'înje.” 10 Be na añaaŋemmi ampawool sîyawuta'usu, ña ampawool nâlhusool ma aanool: “Sîyawut bu usu? Soŋo ûli di iñaayi, di kutiyi, mbi ûtiigen ma ûsik be di etaam matayi?” 11 Ña kutiyool di kûnongikoor matawool, be ampawool naga miña'umu ma aloboom di hûkuwahu hatawool.
Jose, kutiyool di kunoomool
12 Na kûrimmi huk haahu, kutiy Jose di kuteken sîgaraniinaasu sata ampayiil be ñata êsukay yata Sikeŋ. 13 Ña Jako naan Jose: “Inja nûmire kaan kutiyi koku ñata Sikeŋ ma kûtekenem di sîgaraniinaasu? Bila ma iboñi be bo.” Ña Jose naanool aawo.
14 Ña naanool: “Ukay ki ûjikerul kutiyi, di uncaamaw maama kugam, ban nûlaañul ma uñaaŋenom.” Ña Jose nâcaa'to di bûlahabu bata êsukay yata Ebroŋ ma akay be bo.
15 Na ârimbom ya areesoor bo ma ya apaamiil, ña âynaaw aahu najukool, narinkool aanool: “Jimpaa, kama wa nupaamem di wo?” 16 Naanool: “Kutiyom koo ka ipaamem di buko!”
17 Âynaaw umu naanool: “Kutiyi kûcaalhe ban ute. Be nijame ma kemmi ma kukay be di jîsukaju jata Dotaŋ.” Ña Jose najaŋen be bo ki atookii'bo. 18 Be na kutiyool kuŋandelloom, ña di kutabulhenoor maama mbi kuga ma kubujool. 19 Ban ya kêenul: “Yoo, inja âyawutaaw omma âkayewuum di umma! 20 Mbi ubujaalool, ban nubetaalool di hunkoloŋa'uhe; ban mbi oonaal ênunkureŋay etokoñoom, ma mbi ujukaal mata sîyawutasu satawool sa alobolaam mata so.”
21 Be na Rubeŋ ajammi ma kuloom umu, nâkin ma amellhen Jose, ña naaniil: “Kutiyaay aatuba ubujaalool. 22 Mata wa ma mbi jibujumool? Kama moo jaa, di jibetool di hunkoloŋa'uhe hammi di ekinkay, be jeetuba jêenul jigorol.” Rubeŋ ma âlobumom, mata ma âkimmi amellhenool di kutiyool, ma mbi alaañenool be baabu ampayiil.
23 Ña na Jose ârintom, kutiyool di kusohool ma kûjupulool bujupaa'ubu batawool bata kumaacaku, 24 ban di kuŋarool kubet di hunkoloŋa'uhu haakutum mumel.
25 Be na kugam kokariyem, di kûŋandenul kayooŋaku kata êbajoorumay yata Ismayel koo ma kûcaalhumewuum di êsukay yata Jileyadi, koo di kameelusii satayiil ma kûjupulom muheeñamu, di balsamu, di miira, ma kukay be di êsukay yata Ejiptu. 26 Ña Judaa naan kutiyool: “Ubujaal jaa atiyolaal ume ban nûñoorooraal, ña nubajaa'to wa? 27 Ña yoo yeemom unoomaalool bukana'uku kata êbajoorumay yata Ismayel, ma ootuba ubujaalool mata oo atiyolaal a uwoogaam hûsim.” Ña kutiyool di keenool aawo. 28 Ña na Bulanñooraa'ubu kata êsukay yata Midiyaŋ kugam kokahulhem, ña kutiyool di kûcaalhellool di hunkoloŋa'uhu ma kunoomiiwool anabawo yata praata. Ña kûynaa'uku di kuŋarool be Ejiptu.
29 Be na Rubeŋ alallom, nakay ki âjikerul atiyiil di hunkoloŋa'uhu, âriiŋ atookutoo'dô, ña naruusul wañaw watawool mata ma muriyoom, 30 ban nakay ki atoo'bo kutiyool âriiŋ naaniil: “Kutiyaay, atiyolaal alee'dô di hunkoloŋahu! Ña înje, bu mbi iga?”
31-32 Ña kutiyool di kubuj êjikelay, ban di kuŋar hûsimahu hata yo ma kûsimen bûjupaa'ubu bata atiyiil, ban di kubom bo bukaaku be baabu di ampayiil kûriiŋ di keenool: “Ûli, ubu nujukulom bûjupaa'ube. Moo, umanj bo ma, mante bata añooli?”
33 Ña Jako namanju bo nâanul: “Ûde bûjupaabu bata añoolom! Moo manooman ênunkureŋay ebujoom, ban di etijerool etokoñ.” 34 Ña Jako naruusul wañaw watawool, ban nakoko husaakaahu ma akaaw añoolool kukaku lhay. 35 Ña kuñoolool peh kîinaaku, di kaaku kaaraaku, di kûkayil bi kulob d'oo ma amunten, be nalat ma aaniil: “Mbi ikaaw añoolom be kaŋ na mbi iket, ma îtookoo'dô.” Ña ya akaawool.
36 Be kûynaa'uku kata Midiyaŋ, di kuŋar Jose ki kunoomulanken di kaŋenaku kata Potiphaar, agam an âamak ata êsukay ban naga joon annahaanaw ata bupooyaabu bata âyyaw aaneyim Pharawo ata Ejiptu.