Sikeŋ namoop Diina
34
Huk haahu Diina aamom añool Jako koo di Leeya, nakay ki âjukul kupaalool ûjuraw wata di êsuka'uyu. 2 Na ârimbom, Sikeŋ aamom añool Amoor agam êvew, agam annahaanaw ata êsuka'uyu najukool, namoopool ma akajenool. 3 Be ban bûyegetabu bata Sikeŋ di bulo di Diina, ma âkinool noon, ña nalob d'oo sûum. 4 Ban nakay ki alob di ampawool Amoor ma aanool: “Oonenom ma mbi iyab añool Jako.”5 Na Jako ajammi kaan mo ma Sikeŋ agam Diina, kuñoolool koo di bujalabu ma kûtekenem di uncaamaw, ña napato be na keetulom. 6 Be Amoor aamom ampaw Sikeŋ, nakay ki kûlobul di Jako. 7 Be na kuñool Jako keetulom jîtekenaju di kujam mo, ña di muriyiil noon di Sikeŋ, mata ma amoopum âliiniil, ma aga miñamu majakutum ma Israyel kûgaworiitum. 8 Be Amoor naaniil: “Malhegen añoolom Sikeŋ omu ma âkimmi añooluul noon. Moo, jiñankiit jiwulowool ma ayabool. 9 Jiga mo jaa, nugawaal eluupay, ma mbi ya jiyab kûñoololi, ûli poop nuyab katawuul. 10 Ban di jilako ûde ma jikin. Etaamay yooye, jeeliye jinoom ulhaakaw wa jîkimmi, di jilanñoor poop non ma jîkimmi.”
11 Ban Sikeŋ naan ampaw Diina di kûliinool: “Waasi jiñankiitom, mbi iwuluul wahaw peh wa jilobommi. 12 Ban jeeliye poop jibaŋen bancaamabu bata bûyababu, di poop wah waawu wa jîkimmi, mbi iwuluu'wo. Be sam înje iyabool.”
13 Be kuñool Jako ma muriyiim ma Sikeŋ amoopum âliiniil ma akajenool, ña di kubunteniil 14 ma keeniil: “Ûli mumulet bi uga mo, mata ooliit uwul âliinoli anaw agawutim huhaanaahu hata yîinaay ayab, mata uga mo jaa, d'ûli epuñaay yâamak. 15 Be ma mbi oonuul aawo, mbi jiga non ûli; ma yîinaay yatawuul peh, kugawi huhaanaahu hata yîinaay. 16 Jiga mo jaa, mbi uwuluul kûñoololi jiyab, ûli poop nuyab katawuul. Nukinaal tanor, ma ugawaal êsuk yanor. 17 Be jilat jaa huhaanaa'uhu, nûyabul âliinoli ma ôotuu'd'oo.”
18 Ña Amoor koo di añoolool Sikeŋ, di kêenul aawo. 19 Ña Sikeŋ, mata ma âkimmi noon añool Jako, ban poop ma agam anaw a kuhammi ma ga hûkow di eluupay yata ampawool, ña too kaŋ cab, naaniil aawo. 20 Ban di kukay koo di ampawool be di êtingaay yata êsukay, ki kulob di bukanaku katayiil ma keeniil: 21 “Bukanaku kata Jako, bukan kâsuume. Uwalhaaliil ma kukin di etaamay yatoolaal ma kulanñoor, mata etaamay yatoolaal ewuŋe. Ban mbi ooliyaal uyabaal kuñooliil, koo poop di kuyab katoolaal. 22 Be keene mbi kêenul aawo ma ukinaal tanor ma ugawaal an anor, ulaal bâkineraal ma yîinaay yatoolaal peh kugawi huhaanaahu hata yîinaay non buko. 23 Moo, kukin jaa di etaamay yatoolaal, uncaamaw, di wah waawu watayiil, weetubi uga watoolaal? Oonaayiil aawo.”
24 Ña yîinaay peh kâkindom, di kuyab hurimahu hata Amoor, koo di Sikeŋ, ma yîinaay peh kata dô kugawi huhaanaahu hata yîinaay.
Simiyoŋ koo di Levi di kutiik bukanaku kata Sikeŋ
25 Na kugawim huhaanaahu hata yîinaay kuga kukaku kûhaaji, na ñîkil âyemem, ña Simiyoŋ koo di Levi, kaamom kuñool Jako, kagam iñaayiil anor di Diina, di kuŋar ujaasiyaaw ma kûwub bukanaku kata Sikeŋ ma kunebejiil, kûriiŋ di kubuj yîinaay peh. 26 Di kubuj poop Amoor, di añoolool Sikeŋ, ban di kûyabul âliiniil ma kûkayil d'oo. 27 Ña kuŋil kaaku poop kata Jako, di kujunjum sihuluŋaayasu ma kukay be di hankahu da âliiniil amoopim ki kûŋarul miñamu matayiil peh ma kukay di mo. 28 Ma kusoh sîgaraniinaasu, di sibaasu, di simbaamasu, di poop wah waawu peh wândom di êsukay, di poop waawu wammi di mûsuk maamu, ma kukay di wo. 29 Di kuŋar poop yaaraay, di balaabu batayiil, di poop wahaw peh wajakum walakom di siluupasu satayiil.
30 Ña Jako naan Simiyoŋ koo di Levi: “Jaat jigawom buhiiraabu bâamak. Jigawe ban ma mbi bukanaku kata ûde, kagam kananewwii, di perisewwii, kubirik d'înje. Ban ulaal ma uyejutaam, mbi kûkayil ma kusikumolaal ma kûbuyolaal.”
31 Be di keenool: “Kama jake ma agam umu âliinoli? Ûriiŋ noon êkusum nagawe?”