Jako di kujukoor di atiyool Êsawu
33
Ban Jako najaŋen ma aat. Be na agam lhâar, naŋanden atiyool Êsawu oo ma âkayewuum di yîinaay kârimmi sîteemeerasu sibakiir (400). Ña Jako nâgiit kuñoolool ma agayiil waasaaw, ban nagawiil kuŋilooŋiil di iñaayiil. 2 Ban naga emiikeelay egabaay katawool di kuñooliil, ma kuyab kayooŋ Leeya koo di kuñoolool, ban naga Rakeel koo di añoolool Jose, ma kuyoolo. 3 Be oo Jako, nayabiil kayooŋ. Nagam nahuute atiyool, nâtiigen ma aya hûriiŋahu hatawool di etaam ñeemo hutok di ñagaba.4 Be atiyool Êsawu nâteyil ki kupam, na ârillom nalhomool, ban nâpoonool; ña di kukaaw poopiil. 5 Be na Êsawu agam lhâar, najuk yaaraay koo di balaabu, ña narink atiyool aanool: “Kama buke yeymoom kâsoolhenewuum d'aw di ume?” Jako naanool: “Buku kuñoolom ka Emitay ewuum înje agorooraaw atayi mata mâsuumamu mata yo.”
6 Be na emiikeela'uyu, koo di kuñooliil kûrillotom, ña di kûtiigen ma kuya kûriiŋaku di etaam ma kusaapool. 7 Ban Leeya di kûriiŋul koo di kuñoolool, di kûtiigen ma kuya kûriiŋaku di etaam ma kusaapool. Ban Rakeel poop di kûriiŋul koo di añoolool, koo poop di kuga mo, ma kusaapool.
8 Ban Êsawu narink Jako aanool: “Kama hûtekena'uhu ha ipamulom di ho, be bata wa?” Jako naanool: “Înje iwuliwom ma mbi uñankiitom.”
9 Be Êsawu naanool: “Aati uŋaa'wo, mata înje nibaje uncaamaw lhay.”
10 Be Jako nalat ma âniiŋoorool ma aanool: “Uñankiit ma uŋaa'wo, mata înje iwuliwom. Ban ma ijikerem d'aw, nunaamoorom non Emitay yo ya ijikerem di yo, mata jaat nuñankiitom ma uyaañuwom di kâsuumaay. 11 Moo uñankiit ma uŋar wahaw wa iŋallom iwuli, mata Emitay eñakiitommi ma ewulom wahaw peh wa îkimmi.” Ña Jako nâniiŋoorool ii, ña naŋaa'wo.
12 Ban Êsawu naanool: “Ña uga ma ukaya; be înje mbi iyabi kayooŋ.” 13 Be Jako naanool: “Annahaanaw, aw nujuke balaabu bûtiitiye, ban sibaasu di sîgaraniinaasu sosu ma siraahenem, moo iga so jaa ma sirees hûlh palimo huk hanor, mbi siket. 14 Moo, haŋ majak ma uyabom kayooŋ, înje nikobul reeha ma îreesunenul balaabu, di uncaamaw be na mbi îriiŋuu'bo di êsukay yata Sêyir ba ommi.”
15 Ña Êsawu naanool: “Ma uloom umu, ña kama ukobom ma iwuli bukan kaaku kata di bukana'uke kûmbaam, ma mbi jîreboorul.” Be Jako naanool: “Bi îgawum wa? Aati, maama uñankiitommi yeje.”
16 Ña di huka'uhu, Êsawu nalaañ be di êsukay yata Sêyir. 17 Be Jako oo nakay be di êsukay yata Sukoti, âriiŋ naga bo eluupay, ban naga bo poop ûngungaw wata uncaamaw watawool. Mo ma âgawummi tiŋa'utu kañaaŋaku kata Sukoti.a
18 Mata na Jako alaañumulom Padaŋ-Araŋ, nakay be di êsukay yata Sikeŋ di etaamay yata Kanaaŋ, be nâriiŋ bo kâsuumaay; ban nacookoor bo ûngungaw watawool ñata di êsuka'uyu. 19 Be tiŋa'utu ta agam ûngungaw uwu, oo anontom êteemeer yata praata di uŋenaw wata kuñool Amoor, aamom ampaw Sikeŋ. 20 Ban naga to Altar, ban naga yo kañaaŋaku kata Emitay, yaamom Emitay yata Israyel.