32
Ña Jako poop, najaŋen ma akay. Be oo ma akayem, kumalaakaku kata Emitay di kûkayil ki kupam. 2 Na Jako ajukiim, nâanul: “Ûde buyooŋabu bata esellooraay yata Emitay. Ña nâwool tiŋa'utu Manayiŋ.”aJako naboñ bukanaku be baabu Êsawu
3 Ban Jako naboñ bukanaku be di êsukay yata Sêyir di bantaabu bata Edoŋ, baabu di atiyool Êsawu, 4 ma nki keenool: “Annahaanaw, Jako agam agorooraaw atayi, naane, baabu Laboŋ nakayum ki akin, ma alako bo be maame, 5 be nabaje sibaasu, di simbaamasu, di sîgaraniinaasu, di sijaameenasu, di poop emiikeelay kagam yîinaay di kaaku kagam yaaraay. Momakiimom ma âboñumulolim ma ulobi ma mbi uñankiit ma uyaañuwool di kâsuumaay.”
6 Na bukana'uku ka abommi kulallom, di keenool: “Nulobulo mo ban atiyi, be ômareesewuum di yîinaay kârimmi sîteemeer sibakiir (400) ma nki jipaam.”
7 Ña Jako nâkoli noon poopii abajut aga, ña nâgiit bukanaku katawool, di sîgaraniinaasu, di sibaasu, di kameelusii satawool, ma aga waasaaw ugaba. 8 Mata ma anongum nâanul: “Êsawu âkayil jaa bi atiik kaasaaku kaaku, kaaku di kumelh.”
9 Ban nalhaw Emitay ma aan yo: “Emitay yata ampawom ahaan Abrawoŋ, di poop ampawom Isaki, ATA EMIT, malhegen aw oonommi ilaañ be di êsukay yûmbaam ta bukanom kemmi, ma mbi ugawom ibaj hûpiiraahu. 10 Malhegen înje ijoonut hûpiira'uhe peh ha uwulommi ma ûyisom kaan aw anaw alhegenumaayaw. Mata na îcaalhom di êsukay yûmbaam ma îtipul kaalaku kata Jordoŋ, huginkumahu keb nisohulom, be jaat nibaje waasaaw ugaba. 11 Moo, uñankiit ma uhikulom di atiyom Êsawu, mata înje ma îkolim ka mbi abujom di kupañoorom, di poop kuñoolom. 12 Mata aw oonommi mbi uwulom kâsuumaayaku, ban mbi uga êbajoorumay yûmbaam emeeŋ non hulhuus hata kasamo ha ajamaat aaliitum apin.”
13 Ban Jako namoo'to; ban najot di uncaamaw watawool wa nki awul atiyool Êsawu. 14 Nâcaalhen sijaameenasu sagam sicancasu sîteemeer sigaba (200), di sîjikelasu anabawo (20); sîgaraniinaasu sagam sicancasu sîteemeer sigaba (200), di saasu sîinaasu anabawo (20); 15 kameelusii saraahenem, seemo anabawo di kunŋen (30); di sibaasu bukanaku egaba (40), di kûmuunaaku kunŋen (10); simbaamasu sagam saaraasu seemo anabawo (20), saasu sîinaasu seemo kunŋen (10). 16 Ban naŋaa'wo peh awul bugorooraabu batawool, ma agawiil anoowan di hûtekenahu hatawool, ban naaniil: “Jiyabom kayooŋ ma jikay dilo, be kûtekenaku mbi jiga ko ma kûrangoor.”
17 Be ban naan aahu ayaam kayooŋ: “Na mbi jipaam di atiyom Êsawu, arinki jaa aani: ‘Kama aw agorooraaw ata ay? Ûbey nukaayem be? Ay akiim uncaamaw uwe poowo?’ 18 Noonool: ‘Wata agorooraaw atayi Jako, oo abolliwom uŋar. Be ômareesewuum.’ ”
19 Ban naloo'mo aahu agabutaw, di aahu âhaajutaw, di poop kaaku peh kâyoolim ma aaniil: “Na mbi jipaam di Êsawu, di jilobool hurimahu hanorahu. 20 Ban mbi jeenool poop înje agorooraaw atawool, înje mâreesewuum kujeŋandawuul.” Mata Jako oo anogum nâanul aboñ atiyool wahaw uwu, mante nayaañuwool di kâsuumaay. 21 Ña mo ma âboñummi wahaw uwu peh ma uyabool kayooŋ, ban oo namoo'to.
Jako di kûkuuj di Ata Emit
22 Be di huka'uhu hukaru, Jako nalhaalo ma aŋar kupañoorool egabaay, di emiikeelay katawool egabaay kagam yaaraay, di poop kuñoolool kunŋen di anor, ma kuyab tiŋatu tâlahutum ma kûtip kaalaku kata Jabooki. 23 Na agawiim kûtip, di poop wahaw peh watawool, 24 ban oo nalako to diyoonool. Ña âynaaw aahu nâkayil ki kûkuuj be kaŋ na jaley atitijemmi. 25 Be na âynaaw umu âmiim kaan mumulet ba ayetoor d'oo, ña nagor kâtakilhaku kata Jako ma âkulhuu'ko. 26 Ban naan Jako: “Uwalhenom ma ikay mata jaley oo ma ma atitijen.” Be Jako naanool: “Eetubi iwalheni ma ukay aw bañaanutom.”
27 Be âynaaw umu narinkool aanool: “Kama aw nooneyim bu?” Naanool: “Înje neeneyim Jako.” 28 Ña naanool: “Maame mbi uwaa'ko, ma ôomi Israyel,b mata ma jîkuujum di Emitay, di poop bukan kaaku nuhaatiil.”
29 Be Jako naanool: “Uñankiit, kama aw nooneyim bu?” Be âynaaw umu naanool: “Mata wa ma urinkumem d'înje kañaaŋaku?” Ña ban âynaaw umu nañaanoo'to.
30 Ña Jako nâanul: “Nijuke Emitay di kûkilaku kûmbaam, be iketut.” Ña naga tiŋa'utu kañaaŋaku kata Peniyel.c 31 Na jaley agam natitijene, Jako nâcaa'to Peniyel ma akay oo ma âjankisem, mata ma kâtakilhaku katawool kûkulhulom. 32 Momakiimom be jaat, êsukay yata Israyel, kûtokoñoriitum hukilahu hata ñata di kâtakilhaku, mata ma âynaaw umu agoom hukilahu hata kâtakilhaku kata Jako, di kûkulhulo.