Jako natey alholool Laboŋ
31
Be Jako najam ma kuŋilaku kata Laboŋ ya kemmi: “Joko naŋare ban wahaw peh wata âmpawoli, moo jaat nasaanumuwe ban matawool.” 2 Ban poop najuk ma bagawerabu bata Laboŋ, bûbutiyoorum di baabu bûtiyaarabu.3 Ña ATA EMIT naan Jako: “Ulaañ be di etaamay yata kubajayi ta bukani kemmi, mata înje mbi isiseni.”
4 Ña Jako naboñ ma kupañoorool kukay ki kutookool butat ba âtekenem di bo. 5 Na kûrillom naaniil: “Înje nijikere bagawerabu bata ampawuul, alet najikerom non kâtiyaar. Be Emitay yata ampawom yoyu di înje. 6 Ban miwuul jijuke jak non ma igoroorum ampawuul di sembe. 7 Be palimo moo poop, nabuntenom ma atiinoor bugalabu bûmbaam ñeemo kunŋen; be Emitay ewulutool buruŋ ma agawom kôji. 8 Mata ampawuul na mbi âanul mbi ancaamom sîgaraniinaasu sagam tambatab, ña kuñawaayaku di kubaj kuŋilaku kagam tambatab. Âanul jaa poop mbi ancaamom saasu sagam pacapac, ña kuñawaayaku di kubaj saasu sagam poop pacapac. 9 Ña mo ma Emitay egam ma eŋar uncaamaw wata ampawuul ewulom. 10 Mata haahu nata na uncaamaw uŋooloorem, nîyawut ma ijuk kûjikelaku kagam tambatab, di poop kaaku kagam pacapac ma ya kuŋoom saasu saaraasu. 11 Ña Amalaakaw ata Emitay nâwoolom di sîyawuta'usu ma aanom: ‘Jako! Ña nîwool.’ 12 Naanom: ‘Uga lhâar ma ujiker kûjikela'uku kaŋoolem di umu saasu saaraasu ma kugam tambatab, kaaku di kuga pacapac. Înje nijuke maama Laboŋ agawem d'aw. 13 Înje, înje igam Emitay yâcallhim di êsukay yata Betel, ta ûyum êduuliinay di huwaaliisahu ma ulob wahaw wa ommi mbi ugawom. Moo, ubandoor ma ulaañ be di êsukay ba ubajim.’ ”
14 Ña Rakeel koo di Leeya di keenool: “Ûli ulee'ban di wahaw wata âmpawoli. 15 Ban ya âgawoli poop yanŋool non ûli emaasooraay. Ban oo ânoomolim d'aw ban nari bancaamabu. 16 Moo wahaw wa Emitay eŋaam di kaŋenaku katawool ewuli, watoolaal di kuñoololaal. Moo, aw uga non ma Emitay elobim.”
17 Ña Jako naga kuñoolool, di poop kupañoorool ma kugeelo kameelusii, 18 ban naŋar uncaamaw watawool, di poop husaanumahu hatawool peh ha abaam di êsuka'uyu yata Padaŋ-Araŋ, ma aat be baabu di ampawool di êsukay yata Kanaaŋ.
19 Be na Laboŋ âcaam ma nki âkentul buhalabu bata sîgaraniinaasu satawool, ña Rakeel na âkuut bâkiinabu batawool. 20 Jako poop nagum Laboŋ agam aramew, ma agawutool âmir kaan mbi aat. 21 Ña nakay di wahaw watawool peh wa abaam, ma âtip kaalaku kata Ewphratis ma akay be karebaku kata kurimbiliŋaku kata Jileyadi.
Laboŋ nasoolhen Jako
22 Be na Jako akayum kuga kukaku kûhaaji, di kuñaaŋen Laboŋ kaan Jako nateye ban. 23 Ña nâwool bukanool ma kusoolhenool. Be di kuga kukaku hutok di kugaba, di kusohool di karebaku kata kurimbiliŋaku kata Jileyadi. 24 Be hukaru, Emitay di elob di Laboŋ agam aramew di sîyawutasu ma yeenool: “Laboŋ uga to hûkuwahu hatayi; aatuba ôonul ulob Jako miñ makeel.”
25 Na Laboŋ asoom Jako, oo ma ajuumemmi bûngungabu batawool di hurimbiliŋa'uhu, ña Laboŋ, di kujuumen to poop watayiil koo di bukanool. 26 Ban narink Jako aanool: “Kama mata wa nugawom ume? Ugumulom ma ûŋarul kuñoolom non emiikeel kasohuli bata hutiik? 27 Kama mata wa ma oonutommi aw ma oot, ma ugumom, ma mbi igaween epeetay yata bêetabu batayi? Ma mbi ûyimpeenaal sîngirasu, di aarpa, ma uyeeŋaal di êsuumaay? 28 Jijaa ma ugawommi îpoonut kuñoolom, di poop ebajulankenay yûmbaam. Uga non an atatut? 29 Moo neeliyeene igawi kôji, be Emitay yata ampayi eenommi huken busonna, iga to hûkuwahu hûmbaam, ma etuba êenul ilobi miñ makeel. 30 Be nokoor jaa noon aw ûkimmi oot, mata ma unongoorum eluupay yata ampayi, moo mata wa nûkuutul bâkiinabu bûmbaam?”
31 Ña Jako naanool: “Înje, înje îkolim nêenul mante pîya mbi uyab kuñooli di sembe. 32 Be anaw a mbi ujuk bâkiinabu batayi d'oo, mbi aket. Bukanolaal poop kooke kajumolaam ume, ujiker wahaw peh, ujuk jaa poop wah wakeel wagam watayi, nuyaa'wo.” Be Jako âmirut kaan Rakeel âkuutubom.
33 Ña Laboŋ nanebej di bûngungabu bata Jako, di bata Leeya, di poop bata emiikeela'uyu egabaay, be ajukuloot dô makeel. Ban nanebej poop di bata Rakeel. 34 Be Rakeel oo ma aŋaam ban bâkiina'ubu aga di husaakaahu ha kulakowmem hatiya di kameelu, ban naleeho dô. Ña ampawool nâhikuloor di bûngungabu batawool peh, be ajukuloot makeel.
35 Be Rakeel naan ampawool: “Annahaanaw, aatuba ubrik d'înje, mata ma ûrillom ilhaalowut. Înje omu ma îñoyim momakiimom.” Ña Laboŋ napaam dô peh, ajukut bâkiinabu batawool.
36 Ña Jako nabrik di Laboŋ, nacec ma aanool: “Ña ûyisom ma wahaw wa igawim wajakutum? Ûyisom kûbajumiñaku ka ibaam d'aw, makiim nusolhenumulom di hubrikahu? 37 Magam nûhikuloore ban wahaw wûmbaam poowo, ña ûŋarul wahaw watayi wa ujuum wa iŋaam, ma uga wo ute ma bukanola kammi ute kugawola batalenabu. 38 Ban di ujaañaw uwu anabawo (20) wa igoroorum di eluupay yatayi, bajut ejaameen di êgaraniina yatayi yawalene, ban poop iŋarut yakeel itokoñ. 39 Saasu sa bânunkureŋabu bubujem di bujalabu, di poop saasu sa bûkuutaabu kûkuutem tutulaaru di busonnaaru, ya ugawom incaami so. 40 Ban nîlaamulaamum noon, mata tutulay baleyabu ya bubaj, busonnaaru ñonkañu ya ñibaj, ban poop îbajoriit iŋot. 41 Înje nigawe ujaañaw anabawo (20) yanŋi. Nitekeni ujaañaw kunŋen di ubakiir ma iyab kuñooli. Nîtekeni poop ujaañaw hutok di kanor, ma eeli ibaj poop encaam. Be palimo moo poop, nutiinor mata jancaamaju jûmbaam ñeemo kunŋen. 42 Be kaleteen Emitay yata ampawom ahaan Abrawoŋ yaamom ya ampawom Isaki âkoliyem yaamiyoorommi, malhegen mbi ugaweenom eeteen bo tîikoorom. Be ma ejuum hûlaamahu ha îlaamum, di poop bugoroorabu ba igoroorum, momakiimom ma ewanŋumim jaat di sîyawutasu.”
Laboŋ koo di Jako di kuga yaŋaayay
43 Na Jako aloboom umu, ña Laboŋ naanool: “Kupañoori buke, kuñoolom, kuñooli buke poop kuñoolom, hûtekena'uhe poop ha ookum hûmbaam. Moo wahaw wa ookum ute peh wûmbaam. Moo bu mbi iga mata kuŋila'uke, di ebajulankena'uye yûmbaam? 44 Bila ma uloba ma ugawa yaŋaayay ma mbi ûriituwa kajom ma ugawa batalenabu.”
45 Ña Jako naŋar huwaaliisahu ajuumen ma aga êmanjumay. 46 Ban naan bukanool: “Jîmeb kuwaaliisaku.” Ña di kûmeb kuwaaliisaku ma kuga ko hûñuncenahu, ban di kuri to. 47 Ban Laboŋ naga to kañaaŋaku kata Jegar Saaduta,a be Jako na aga to kañaaŋaku kata Galeedi. 48 Ban Laboŋ nâanul: “Hûñuncena'uhe hata kuwaaliisaku hoo hugam jaat êmanjumay yata yaŋaayay yatoola.” Momakiimom ma jîgawumim kañaaŋaku kata Galeedi. 49 Ban nâanul joon: “Mbi teeni poop Mispab mata Emitay yoo mbi epooyola, na mbi ûrangoora. 50 Moo, ûgaykoor jaa kuñoolom, ban nûyabul yaaraay yaayu, palimo an alakowut to ma ajuk, be ûmir kaan Emitay egam ajuumaaw atoola.” 51 Ban Laboŋ naan Jako joon: “Hûñuncena'uhe hata kuwaaliisaku, di poop huwaalisa'uhe ha ijuumemmi, kooke tutaru tatoola; 52 koo mbi kuga ajuumaaw atoola, ma înje mumulet bi îtipuu'ko be baabu d'aw ki igawi makeel. Aw poop mumulet bi ûtipuu'ko be karebaku kûmbaam ki ugawom makeel. 53 Moo, uhuusula jaa, Emitay yata Abrawoŋ, di Nawor,c yaamom Emitay yata simpayiil, mbi egawola batalenabu.” Ban Jako nanuur Emitay yaamom ya ampawool Isaki âynemmi. 54 Ña Jako nabuj encaamay hatiya di hurimbiliŋa'uhu âwaasenum Emitay, ban nâwoolul bukanool ma kuri to, ban di kumoo'to.
55 Kûriiŋ hata kajom bûjomaru bîb, Laboŋ nâpoon kuñoolool, di ebajulankenay yatawool, ban nañaaniil ma kubaj kâsuumaayaku, ban nalaañ ma aat.