30
Na Rakeel âmiim kaan aaliit abaj aŋil, ña sûumutool Leeya. Ña naan Jako: “Uwulom kuŋil, mata ugawutom mo jaa, mbi iket.” 2 Ña Jako nabrik d'oo. Ña narinkool aanool: “Kama înje igam Emitay? Inja yoo ewulutim aŋil.”3 Ña Rakeel naanool: “Ña kama uŋar amiikeelaw ûmbaam Biila uyab, ma mbi abajom kuŋil îgut.”
4 Ña Rakeel nawulool amiikeelaw atawool aamom Biila ayab. 5 Amiikeelaw umu nâyabul harahu. Na aroŋum, nâcaalhul di aŋilaw îinaaw. 6 Ña Rakeel nâanul: “Emitay ejame hurimahu hûmbaam ma egawom batalenabu di atiyom.” Moo aŋilaw ume, mbi âami Daŋ.a
7 Piyowut Biila nâcaalhul joon di aŋil aahu îinaaw. 8 Ña Rakeel nâanul: “Nîkuuje di atiyom meeŋ, be nihaatool.” Moo aŋilaw ume mbi âami Naphtali.b
9 Be na Leeya âmiim kaan najuume, ña naŋar amiikeelaw atawool Ziilpa, awul Jako ayab. 10 Ña Ziilpa nâyabul harahu, na aroŋum nâcaalhul di aŋilaw îinaaw. 11 Ña Leeya nâanul: “Nibaje hûpiira.” Ña nagawool kañaaŋaku kata Gaadi.c 12 Piyowut Ziilpa nâcaalhul joon di aahu îinaaw. 13 Ña Leeya nâanul: “Sûumom noon, mata yaaraay mbi ya keenom înje umu di êsuumaay.” Ña nagawool kañaaŋaku kata Aseer.d
14 Kûriiŋ nata ejalay yata trîigu, Rubeŋ nakay be butat, âriiŋ nâbaju'bo muriyaayamu maaneyim mandraagorae ki awul iñaawool. Na Rakeel ajuumom, naan Leeya: “Uñankiit uwulom di mandraagora uyu ya añooli abajulim!”
15 Be Leeya naanool: “Kama uyejent ma ubotum apañoorom? Nki nûkin joon uyab di mandraagora uye?” Ña Rakeel naanool: “Ña uwulom di yo ma mbi apañoorolaal âkayil jaat ki aŋot baabu d'aw.”
16 Na Jako aatulom butat baheperabu, Leeya nakay ki ayaañowulool di buruŋabu ma aanool: “Jaat baabu d'înje mbi uŋot, mata nincaame ban Rakeel mandraagora sata añoolom.” Ña nakay ki aŋot bo. 17 Emitay di ejam Leeya ma aharet, na aroŋum nâcaalhul di aŋilaw îinaaw atokemmi. 18 Ña nâanul: “Emitay encaamom mata ma iŋaam amiikeelaw ûmbaam iwul apañoorom.” Ña nagawool kañaaŋaku kata Isakaar.f
19 Piyowut nâcaalhul joon di aahu îinaaw, agawiim hutok di an anor. 20 Ña nâanul: “Emitay ewulom wah wâamak. Mowme apañoorom mbi âkayil ma ulako tanor, mata nibajool kuŋilaku hutok di an anor.” Ña nagawool kañaaŋaku kata Zebuloŋ.g
21 Piyowut nâcaalhul joon di aŋil aahu aaraaw, ña nagawool kañaaŋaku kata Diina.
22 Ban Emitay di êwolhowul Rakeel ma ejam hulhooŋooruwaahu hatawool, ma egawool aali abaj aharet. 23 Ña naharet ma âcaalhul di aŋilaw îinaaw. Ña nâanul: “Emitay egawom ma ñipuñaañu ñûmbaam ñibawo.” 24 Ña nagawool kañaaŋaku kata Jose,h ma âanul: “ATA EMIT mbi abaŋenom joon aahu.”
Laboŋ naan joon Jako alako yanŋool
25 Na Jose abajim ban, Jako naan Laboŋ: “Înje nîkine eet be di êsukay yûmbaam, 26 moo mbi ikay di kupañoorom, di poop kuñoolom, mata matayiil nigoroorumim. Mata aw nûmire jak maama igoroorim.” 27 Be Laboŋ naanool: “Uñankiit ma ulakuwa ute, mata nilasuwe, nîmir kaan ATA EMIT nawulom hûpiira matayi. 28 Moo oonom jaa mimmuman mbi incaami, nincaami mo.”
29 Ña Jako naanool: “Malhegen aw nûmire jak maama igoroorim, ban poop nujuke ma uncaamaw watayi ugam. 30 Mata nownu na înje îrillom, uncaamaw watayi uyejut no, be jaat uyeje, mata ATA EMIT nawuli hûpiiraahu mata bugoroorabu bûmbaam. Moo, înje ûney mbi igoroor be bata eluupay yûmbaam?”
31 Be Laboŋ naanool: “Aw ûyisom wahaw wa mbi incaami!” Ña Jako naanool: “Înje îkint wah wakeel. Be maama mbi ilobi, oonom jaa aawo, nîteken joon uncaamaw watayi. 32 Be mbi ikay mowme ki îjukul uncaamaw watayi peh, ma mbi îcaalhen sîgaraniinaasu, di sijaameenasu peh sagam tambatab, di saasu sagam pacapac, di poop saasu salheenaasu, ma mbi siga bancaamabu bûmbaam. 33 Be kajom, ûkayil jaa bi ujuk waawu wûmbaam, ûjuu'dô sîgaraniinaasu, di sijaameenasu sagawutum tambatab, di saasu sagawutum pacapac, di poop saasu salheenutum, nûmir kaan înje îkuutusom.”
34 Ña Laboŋ naan Jako: “Ma uloom umu, jake.” 35 Ña huka'uhu, Laboŋ nâcaalhen sijaameenasu saaraasu, di kûjikelaku kagam tambatab, di saasu sagam kumaacaku kâtumpaayaaku, di bâgaraniinaabu balheenaabu, awul kuñoolool kuteken. 36 Ma Jako âteken saasu sakatunom sagam sata Laboŋ. Be nagawiil ma kûrangoor ebankay ya an aalim arees kukaku kûhaaji.
37 Ban Jako nâŋarul maanamu mata buyaajabu baaneyim alamu, di mata abaleyra, di poop mata bunjaakaabu, ma ahiil mo, ma aga mo kuŋiicaku. Be ma dâada tûmpaayum, ña di muga kuŋiicaku kâtumpaayaaku. 38 Ban naŋar maana'umu aga ta uncaamaw usibenem. Ma mbi uncaamaw ween usiben uŋooloor, di ujooŋoor di maana'umu. 39 Ña uncaamaw uwu ya ubaj saasu sagam tambatab. 40 Ban Jako naŋar saasu sîinaasu aga bûto, ma aŋar saasu saaraasu sagam tambatab, di poop saasu salheenaasu, abom di sata Laboŋ. Ña Jako nabaj hûteken haahu hagam hatawool. 41 Ban ya aga huk peh na mbi saasu saaraasu sahammi mâlag, siga so saŋooloorem di kûjikelaku, naŋar maana'umu, aga ta sisibenem ma mbi ya sijooŋoor di mo. 42 Be na mbi saasu sâlagutum seen sisiben, âgaworiit mo. Ña satawool di sîlag, ma sata Laboŋ sisil. 43 Ña Jako nasaanumo noon, ma abaj sijaameenasu lhay, di sîgaraniinaasu, di simbaamasu, di kameelusii, di poop emiikeelay.