Jako nâriiŋ di enkoloŋay yata Araŋ
29
Ban Jako nakay be di sîsukasu sata bukanaku kakimmi ba Jalay âcaalhumewuum. 2 Oo ma areesem, najuk enkoloŋay di bujalabu, di poop kûtekenaku kûhaaji kata sîgaraniinaasu koo too ma kukumemmi ñata di enkoloŋa'uyu. Enkoloŋa'uyu to ta kugawesom sisiben, be yoo ma ebaahenim huwaaliisahu hâamak. 3 Mata ya kuga na mbi bûtekenaabu kûriiŋul peh di sîgaraniinaasu, ña di kûbaahuu'yo ma kuga so sisiben, ban di kulaañen ho to. 4 Be na Jako ârintom, narinkiil aaniil: “Kutiyaay kama miwuul ûbey?” Di keenool: “Ûli Jata êsukay yata Araŋ.” 5 Ña naaniil: “Jîmire pîya âynaaw a keenem Laboŋ, aamom añool Nawor?” Di keenool: “Aa, nûmirool!” 6 Naaniil: “Omu to kâsuumaay?” Di keenool: “Aa, omu to kâsuumaay. Jijaa añoolool Rakeel, ômareesewuum di umma di sîgaraniinaasu satawool.”7 Ña Jako naaniil: “Be tiroŋe para kâmeb sîgaraniinaasu. Moo jîwuu'so sisiben, ban di jilaañen so ma nki sihen.” 8 Be di keenool: “Ûli mumulet bi uga mo. Mbi ukob para be na mbi kûtekenaku peh kata sîgaraniinaasu kûmeboor ute, ban nkit huwaaliisahu hammi di enkoloŋay di hûcaalheni ma uwuu'so sisiben.”
Jako di kujukoor di Rakeel
9 Be Jako buko baroŋ ma kulobem di bûtekenaa'ubu, ña Rakeel nâriiŋul di sîgaraniinaasu sata ampawool, mata oo âtekenesom. 10 Be na Jako ajuum Rakeel oo ma âreesewuum di sîgaraniinaasu sata ampawool Laboŋ, aamom âliin iñaawool, ña nakay ki âbaahul enkoloŋay ban nawul sîgaraniinaasu sata Laboŋ sisiben. 11 Ban nâpoon Rakeel, ban nâŋaaŋulo ma akaaw. 12 Ban nañaaŋenool kaan buko bukanaku kanoraku, mata iñaawool âliinool ampaw Rakeel. Ña na aloboom umu, Rakeel natey ki aloo'mo ampawool.
13 Ña na Laboŋ ajammi mata Jako aamom añool âliinool, ña natey ki kupam. Na kupammi, nalhomool ma âpoonool, ban naŋarool be yanŋool. Na kûrimmi Jako nañaaŋenool wahaw wagaloom. 14 Ña Laboŋ naanool: “Malhegen aw añoolom kaŋ tîb!” Ña Jako nalako to hulheeŋ.
15 Ban Laboŋ naanool: “Aw noone ma ugam añoolom, mbi ugoroorom ebeebel? Ûyisom maama mbi incaami.”
16 Be Laboŋ, kuñoolool koo too egaba. Aahu araheem naaneyim Leeya, aahu âtitaw Rakeel. 17 Be Leeya kûkilaku katawool kusil, Rakeel buulabu batawool di bujak, ban bajuumerabu batawool poop di bujak. 18 Be ma Jako âkimmi Rakeel, ña naan Laboŋ: “Mbi igoroori ujaañaw hutok di ugaba ma mbi uwulom Rakeel iyab.”
19 Ña Laboŋ naanool: “Malhegen haŋ majak ma iwuliyool uyab, di maama mbi iwulool an aahu âbutim d'aw. Moo, ulako ute.” 20 Ña Jako nagoroor ujaañaw hutok di ugaba ma mbi ayab Rakeel. Be Jako mata ma âkinoom noon, ujaañaw uwu di ugawool non hîyyaay hanor.
Laboŋ nabunten Jako
21 Na ujaañaw uwu ugam ûriire, Jako naan Laboŋ: “Uwulom apañoorom ma iyab, mata ujaañaw utooke ban!” 22 Ña Laboŋ nâwoolul bukanaku kata dô ma aga epeetay yata bûsoñaabu bata añoolool. 23 Be na kûrimmi busonnaaru, Laboŋ naŋar Leeya agam añoolool âtiyaaraw ki awul Jako ayab. 24 Ban naŋar poop amiikeelaw atawool aaneyim Ziilpa awul Leeya ma aga agorooraaw atawool.
25 Na jaley atitijemmi, Jako nanamulen kaan kama Laboŋ Leeya na awuloom. Ña narinkool aanool: “Laboŋ, kama mata wa nugawom ume? Ban înje Rakeel nigoroorim matawool! Moo, mata wa nubuntenom ma uwulom Leeya?”
26 Ña Laboŋ naanool: “Ûli ube ûgaworiit batiyaayabu, aahu âtitaw nasing asoño aahu araheem. 27 Moo, ukob ma hîyyaaya'uhe hubawo hata bûsoñaabu bata Leeya, niwuli poop Rakeel uyab, ma mbi ugoroorom joon ujaañaw hutok di ugaba.”
Jako nayab Rakeel
28 Ña Jako naga non ma Laboŋ aloboom. Na hîyyaayahu hata bûsoñaabu bata Leeya hubawom, Laboŋ nawulool poop Rakeel ayab. 29 Ban naŋar poop amiikeelaw aahu atawool aaneyim Biila, awul Rakeel ma aga agorooraaw atawool. 30 Ña Jako nayab Rakeel. Be malhegen, oo nahaŋ mâkin di ki Leeya. Ña nagoroor joon Laboŋ ujaañaw hutok di ugaba. 31 Be ATA EMIT najuk ma Jako ahammi mâkin Rakeel, ña nawul Leeya kuŋilaku, ma awaa'bo Rakeel.
Kuŋilaku kata Jako
32 Piyowut Leeya nâyabul harahu, nâcaalhul di aŋilaw îinaaw, nagawool kañaaŋaku kata Rubeŋ,a ma âanul: “ATA EMIT nañankiitom mata najuke hûlaamahu ha emmi di ho. Moo, maame apañoorom mbi âkinom.” 33 Piyowut nâlancenul joon aahu îinaaw, nagawool kañaaŋaku kata Simiyoŋ,b ma âanul: “ATA EMIT najame kaan kûkintom, mo ma awulumommi joon aŋilaw ume.”
34 Piyowut nâlancenul joon aahu îinaaw, ña nâanul: “Maame apañoorom mbi âhugom, mata nibajool kuŋilaku êhaaji.” Momakiimom ma aanumoom Levi:c
35 Piyowut nâlancenul joon aahu îinaaw, ña nâanul: “Maame mbi isal ATA EMIT.” Momakiimom ma aanumoom Judaa. Ban ña najuum.