Jako nakay be di êsukay yata Padaŋ-Araŋ
28
Ban Isaki nâwool añoolool Jako ma añaanool ma mbi abaj hûpiira, ban naanool: “Jimpaa, aatuba uyaburer anñaakan ata ûde Kanaaŋ, 2 be ukay be di êsukay yata Padaŋ-Araŋ baabu ampayi ahaan Betuwel abaam iñaayi. Ûriiŋ nuyaa'bo di kuŋilaku kata Laboŋ aamom âliin iñaayi. 3 Ma mbi Emitay Yahammi Wahaw Peh, ewuli hûpiira, ma ubaj kuŋilaku lhay, ma mbi êbajoorumay yatayi eyej, ma ega bâsukabu bameeŋe. 4 Mbi Emitay ewuli hûpiiraahu non Abrawoŋ, di poop êbajoorumay yatayi, ma mbi uŋar etaama'uye ya ewuum Abrawoŋ, da ommi humaasoorowutaahu.”5 Ña Isaki naga Jako ma akay be di êsukay yata Padaŋ-Araŋ baabu Laboŋ, âliin Rebeeka aamom añool Betuwel agam aramew. 6 Be Êsawu najam kaan ampayiil oo añaanum Jako ban nagawool akay be di êsukay yata Padaŋ-Araŋ ma nki ayaa'bo anñaakan. Ban najam poop kaan na añaanoom naanool aatuba aan ayab anñaakan ata di êsukay yata Kanaaŋ. 7 Nâmir poop kaan Jako nayabe hurimahu'uyu hata kubajawool ma akay be di êsuka'uyu. 8 Ban poop ma Êsawu âmiim kaan Isaki âkint yaaraay yata Kanaaŋ, 9 ña nakay ka atoo'bo bukanaku kata Ismayel aamom añool Abrawoŋ. Âriiŋ nayaa'bo anñaakan aahu, aaneyim Malati, âliin Nebayoti kagam kuñool Ismayel.
Jako Emitay di êbaahulool ma ajuk ejagiray
10 Ban Jako nâcaalhul di êsukay yata Berseba ma akay be Araŋ. 11 Be oo baroŋ di buruŋabu, jaley najon, ña najuk tiŋ taatu naŋot to. Be na ammi aŋot, naŋaa'to huwaaliisahu âkagoorum. 12 Na aŋotum, nâyawut ma ajuk ejagiray yajuumenim di etaam be hatiya di emitay. Ña najuk kumalaakaku kata Emitay ma ya kuŋoom, di kûwalowul di ejagira'uyu. 13 Be ATA EMIT oo dô hatiya hûg ejagira'uyu, ña naanool: “Înje ATA EMIT ata ampayi ahaan Abrawoŋ, di Isaki agam ampayi, moo etaama'uyu da ukumemmi umu, mbi iwuli yo, di poop êbajoorumay yatayi. 14 Mbi iga êbajoorumay yatayi emeeŋ non hulhuus; bukinabu batayi mbi bulako di urebaw poowo; kayooŋ, di kujeeŋanda; kaŋen kûrir, di poop kaŋen kumay. Moo âmbasuk peh, mbi kubaj hûpiira matayi, di poop mata êbajoorumay yatayi. 15 Ban poop tiŋootiŋ ta ukaayum, mbi ipooyi. Ban mbi igawi ma ûlaañul be ute di etaama'uye. Mata mbi ipooyi be na mbi igawi wahaw wa ilobim di wo.”
16 Ña na Jako atonkowlom, nâanul: “Malhegen ATA EMIT omu ute, be înje îmirent mo!” 17 Be ma âkolim nâanul: “Tiŋa'ute tîkoliyeniye! Nîynene kaan ute, eluupay yata Emitay! Moo, ute êtingaay yata be hatiya di emitay.”
Jako naŋar huwaaliisahu ha âkagoorummi âgawum êmanjumay
18 Na Jako alhaalowulom bûjomaru bîb, naŋar huwaaliisa'uhu ha âkagoorummi ajuumen ma aga êmanjumay, ban naŋar êduuliinay âyu hô. 19 Êsuka'uyu ya keen yo Lûs, be Jako naan yo Betel.a
20 Ban Jako nanuur ma âanul: “Malhegen Emitay esisenom jaa be ba ikayem be, ma ewulom wah wata huri, di wañaw wa mbi ikoko, 21 ban îlaañul jaa be di eluupay yata ampawom di kâsuumaay, ATA EMIT mbi aga Emitay yûmbaam. 22 Moo, huwaalisa'uhe ha ijuumemmi ume, hoo mbi huga Eluupay yata Emitay. Ban wahaw peh wa ewulommi wârimmi kunŋen, mbi îcaalhen wanor iwuu'yo.”