Isaki naan Êsawu agawool gîsaadu
27
Na Isaki agam nahallene, kûkilaku di kuga hûp, ña abajut ajuk jak. Âriiŋ huk haahu nâwool añoolool âtiyaaraw aamom Êsawu ma aanool: “Êsawu!” Ña Êsawu nâwool.2 Naanool: “Jimpaa, înje nihalhene ban, îmirut na eketay mbi eŋarom. 3 Moo, uŋar kaŋaagenaku katayi ma ukay ki ubujulom ênunkureŋ, 4 ban nubandoor yo ma ugawom gîsaadua yâsuume ya înje îkinem, ban nuŋallom yo ma iri, ban niñaani ma mbi ubaj hûpiiraahu bala iket.”
5 Be nownu, Rebeeka oo ma ajamem non ma apañoorool Isaki ya kuloom koo di añoolool Êsawu. Ña Êsawu nakay be jalhuuñaju bi awul ampawool.
Rebeeka koo di Jako di kubunten Isaki
6 Ban na Êsawu agam nakaye, Rebeeka naan Jako: “Jijaa, înje nijame ma ampawuul ya aloom da atiyi Êsawu ma aanool, 7 akay ki alhuuñulool ênunkureŋ ban nagawool gîsaadu yâsuume ma mbi ari ban nañaanool ma ATA EMIT awulool hûpiira bala aket. 8 Moo añoolom, utallhenom jak ma mbi uga maama mbi ilobi. 9 Ukay be di hûtekenahu ki ûŋarul mujaameen mugaba mâlagum, ma mbi îlew ampawuul gîsaadu yâsuume non ma âkinem. 10 Ban nuŋaroo'yo ma nki ari, ban nañaani ma mbi ubaj hûpiiraahu bala aket.”
11 Be Jako naan iñaawool: “Atiyom Êsawu omu ma âhaletum meeŋ, ban înje îhaletut. 12 Moo, ampawom mbi amamenom nanamulen kaan ntuwa Êsawu, ban mbi âanul înje emmi ibuntenool, ña nkit mbi igawool ma âñaanikoorom.”
13 Ña iñaawool naanool: “Moo jaa, kapaawa'uku di kulo d'înje, oo bâñaanikoori. Be ukay ki uga non ma ilobim, ma ûŋarul mujaameenamu.”
14 Ña Jako nakay ka âŋarul mujaameena'umu, ban iñaawool naga gîsaadu yâsummi non ma Isaki âkinem. 15 Ban naŋar wañaw wahammi majak wata Êsawu wa añakoom di eluupay, âjupen Jako. 16 Ban naŋar kabaŋaku kata mujaameenamu agaayen uŋenaw, di elhekejay yata Jako mata ma âhaletutum. 17 Ban naŋar gîsaadu uyu, di kûmburuwaa'uku ka acookoorum awulool.
18 Ña Jako nakay di yo, di kûmburuwaa'uku ki awul ampawool. Âriiŋ nâwoolool ma aanool: “Ampoom!” Ña ampawool nâwool, ban narinkool aanool: “Kama aw aymoom?”
19 Ña Jako naanool: “Înje Êsawu, añooli âtiyaaraw. Nigawe ban non ma ulobommi. Moo, ulhaalo ma utokoñ wahaw wa ibujulom, ban nuñaanom ma mbi ibaj hûpiiraahu.” 20 Be Ampawool narinkool aanool: “Jimpaa, kama uga bu ma uhilulom ume jalhuuñaju?” Jako naanool: “ATA EMIT agam Emitay yatayi asisenommi!”
21 Ña naan Jako: “Ûteeŋowul ma, ma mbi imameni mante malhegen aw kaŋ añoolom Êsawu, be mante ntuwa aw.”
22 Ña Jako nakay be to, ampawool namamenool, ban nâanul: “Hurimahu hunaamoore di hata Jako, be uŋenaw unaamoore di wata Êsawu.” 23 Ña ampayiil amanjutool mata ma uŋenaw ûhaletum non wata Êsawu, momakiimom ma añaanumoom. 24 Be nagam ma mbi añaanool, narinkool joon aanool: “Aw kaŋ noone aw Êsawu?” Naanool: “Aa, înje kaŋ.”
25 Ña Isaki naanool: “Jimpaa, uŋallom gîsaadu yata eluway ya ulhuuñulom ma iri, ban niñaani.” Ña nawuloo'yo ma ari, ban nawulool poop bunukabu ajaken.
26 Ban naanool joon: “Bila ma ûpoonom.” 27 Ña Jako nakay ki âpoonool. Ña najam huputahu hata wañaw wa Jako âjupom, ña nañaanool ma aanool:
“Huputahu hata añoolom hunokoore non bujal
ba ATA EMIT awule hûpiira.
28 Emitay ewuli empuuhay,
ma ulhaakaw watayi ubaj busees,
ma ubaj trîigub huc, di poop bunukabu bâjoobiyaabu.
29 Ban bâsukabu mbi kuga bugorooraabu batayi;
ma kûtiigen di ûkandumaw watayi.
Mbi uga annahaanaw ata kutiyi,
ma êbajoorumay yata iñaayi,
mbi kûtiigen di ûkandumaw watayi.
Ban bukanaku kâñaanikoorim, buhiiraabu mbi busohiil;
ma kaaku kañaanim sûum, mbi kubaj hûpiiraahu.”
30 Na Isaki añaanum Jako, ban na Jako aga nâcallho keb, atiyool nâriiŋul jalhuuñaju. 31 Ña naga poop gîsaadu yâsummi, ban naŋaa'yo ki awul ampawool, âriiŋ naanool: “Ampoom, ña ulhaalo ma utokoñ eluway yata ênunkureŋay ya ibujulom ma mbi uñaanom.”
32 Ña ampawool narinkool aanool: “Kama aw aymoom?” Naanool: “Înje Êsawu, aamom añooli âtiyaaraw!”
33 Ña Isaki di muriyool noon poopii na aboboken lhînŋa, ña nâanul: “Kama aymoom awulommi eluway yata ênunkureŋay ya itokommi, ban niñaanool mowme bala ûnebejul? Ban niñaanoo'ban, ma Emitay ewulool hûpiiraahu haatumbi hûcaalhurer.”
34 Na Êsawu ajammi ma, ampawool aloboom umu di muriyool noon, ña nakaaw ma âruuren lhînŋa ma aanool: “Ampoom, mbi uñaanom poop ma mbi ibaj hûpiira!”
35 Be ampawool naanool: “Atiyi akaylom ma abuntenom. Moo niwuloo'ban hûpiiraahu hatayi.”
36 Ña Êsawu nâanul: “Jako, mo ma kugawumoom kaŋ kañaaŋa'uku. Mata uhe hugam hugabutahu ha abuntenommi. Kâtiyaar nabuntenom ma aŋar hiŋahu hûmbaam hata karaheraku. Nki uhe nabuntenom ume joon ma aŋar hûpiiraahu hûmbaam! Ban narink ampawool ma aanool: Ampoom, hûpiira hakeel hulet ha oolim poop uñaanom ma ibaa'ho?”
37 Be ampawool naanool: “Nigawoo'ban ma mbi aga annahaanaw atayi, ban nigawool ma kutiyool bi kuga bugorooraabu katawool, ban poop niwulool trîigu, di bunukabu bâjoobiyaabu. Moo jimpaa, mbi igawi bu?”
38 Be Êsawu naanool: “Ampoom, kama kañaan kanor keb nubaam? Uñankiit uñaanom poop.” Ban nâruuren ma ya akaaw.
39 Ña ampawool naanool:
“Jimpaa, aw mbi ukin di etaamay yaakutum busees,
ban poop yeekut empuuh.
40 Mbi ûriyum kajaasiyaaku katayi,
be mbi uga agorooraaw ata atiyi;
be hukahu na mbi ûlaam,
mbi ûlhaalowul ma umelh di kaŋenaku katawool.”
41 Ña Êsawu nabirik noon, di Jako mata ma ampayiil añaanoom umu. Ña nalob di bûyegetabu batawool ma âanul: “Magam âmpawoli oo ma ma aket, na mbi uhokool ban, ñikulañu ñibawo, nibuj poop Jako.”
42 Na Rebeeka ajammi kaan mo ma Êsawu anongum, ña naboñ ma kûwollool Jako ban naanool: “Jimpaa, atiyi nâkine ma mbi abuji! 43 Moo, mbi uga non ma mbi ilobi. Utey be di êsukay yata Araŋ baabu di âliinom Laboŋ, 44 ma nki ulako bo be na mbi hubirikahu hatawool hubawo. 45 Na mbi hubrikahu hatawool huga hubawe ma âwuken maama ugawoom, înje nîboñul anaw ma ûlaañul be ute. Mata îkint ma jiket hukahu hanorahu ma iwalh.”
46 Ban Rebeeka nakay ki alob di ampayiil Isaki, ma aanool: “Isaki, înje nipooñe ban cam, kûsampulom buke kagam êtewwii. Moo, Jako ayab jaa poop anñaakan non buke kagam êtewwii, ña yoo yeemom iket ma igaylo.”