Isaki nakin di êsukay yata Jerar
26
Ban bacaarabu di busoh joon êsukay non ma busohemmi taate êsukay nata Abrawoŋ. Ña Isaki nakay be Jerar di etaamay yata âyyaw ata philistewwi aaneyim Abimeleeki. 2 Âriiŋ huk haahu, ATA EMIT nâcallhool ma aanool: “Aatuba ukay be Ejiptu, mbi ukay kulako di êsukay ya mbi îyisi. 3 Be ulako ûde di êsuka'uye para. Mata înje mbi ipooyi, ban mbi iwuli etaama'uye pooyo, miwuul di êbajoorumay yatayi, ma iga non ma inuurum taate ampayi Abrawoŋ kaan mbi igawool. 4 Mbi iga êbajoorumay yatayi ma emeeŋ non boot, ban mbi iwuliil etaama'uye pooyo. Bukanaku kata âmbasuk peh, mbi kubaj hûpiiraahu mata êbajoorumay yatayi, 5 mata malhegen Abrawoŋ, ya ajam d'înje, ma aga non ma elobay yûmbaam eloom, di maama ilobewoom, di maama ilhikitenewoom, di poop maama kûboñaku kûmbaam kuloom.” 6 Ña Isaki nalako Jerar ma akin dô.7 Be na yîinaay kata êsuka'uyu kurinkoom mata apañoorool, nâkoli kaaniil Rebeeka apañoorool, ma aaniil âliinool. Mata oo anongum nâanul, ma apañoorool ajakum noon, mbi kubujool matawool.
8 Ban Isaki nalako dô piyo. Huk haahu Abimeleeki aamom âyyaw ata philistewwi nâjikerul di eyinumay, najuk Isaki koo ma kûraarem di apañoorool. 9 Ña nâwollool ma aanool: “Kama añakanaw umu taŋ, apañoori! Moo, mata wa ma ôonumolim âliini?” Isaki naanool: “Înje inongum kaan, mbi jêenul jibujom matawool.”
10 Abimeleeki naanool: “Mata wa nûgawoli ume? Mbi ugaween anaw aahu d'ûli agoreen apañoori, ban mbi ûgaweenoli ubaj hûbajumiñ.”
11 Ña Abimeleeki nalob êsukay peh ma aaniil: “Anaw a mbi aga wah wakeel âynaaw ume, koo di apañoorool, mbi abuji.”
12 Isaki nawañ kajaaña'uku, ATA EMIT nawulool hûpiiraahu ma ajal noon, ma wahaw wa ajalum uhaŋ esepeyay be êteemeer. 13 Ña husaanumahu hatawool hukoohuk ya huhanto, poopii naga asaanumaw âamak; 14 ma abaj sîgaraniinaasu, di sibaasu, di poop bugorooraabu lhay, poopii philistewwi di kûsibuwool. 15 Ña sinkoloŋasu sa bugorooraabu bata ampawool Abrawoŋ kuwokum, di kulhik so.
16 Abimeleeki naan Isaki: “Mbi ûcaalh ûde di êsukay yâtooli, mata jaat nûhaŋoli ban sembe.” 17 Ña Isaki nâcaa'dô ma akay ki ajuumen bûngungabu batawool di bûlahabu bata Jerar ma akin dô. 18 Ña sinkoloŋasu sa ampawool awokum ban naket, philistewwi di kulhik so, Isaki nâkaapuu'so, ban nalaañ aga so uñaaŋaw wa ampawool agasom.
19 Ban bugorooraabu batawool, di kuwok joon enkoloŋ yaayu, di ega êpungupungay, ban mumelamu mata yo di mûsuum noon. 20 Be bûtekenaabu bata dô Jerar, di kucec di kata Isaki, ma kêenul: “Mumela'ume ûli ukiimom.” Momakiimom Isaki naan yo Eseki,a mata ma kucecum mata yo. 21 Ña di kuwok yaayu joon, be di kucecum joon mata yo. Ña naan yo Sitna.b 22 Ña nallhoj be taatu ki awok yaayu. Be an acecumut joon mata yo. Ña naan yo Rewobot,c ma âanul: “ATA EMIT, haahe nawulolaal tiŋ tawuŋe, ma mbi uhaŋaal mayejaal.”
23 Ban nâcaa'to ma akay be Berseba. 24 Be huka'uhu hukaru, ATA EMIT nâcallhool ma aanool: “Înje, înje igam Emitay yata ampayi Abrawoŋ. Moo, aatuba ûkoli mata mbi ipooyi, niwuli hûpiiraahu, ban mbi iga êbajoorumay yatayi ehaŋ to mata Abrawoŋ.”
25 Ña Isaki nacookoor to Altar ma âbinken ATA EMIT. Ban najuumen to bûngungabu batawool; bugorooraabu batawool poop di kuwok to enkoloŋay.
Abimeleeki di kuga yaŋaayay koo di Isaki
26 Huk haahu Abimeleeki nâcaalhumul Jerar ma kukay koo di apaalool agam anamulenaaw atawool aaneyim Awsati, di annahaanaw ata esellooraay yatawool aaneyim Phikol, ma kukay ki kûjukoorul di Isaki. 27 Na kûrimbom Isaki narinkiil aaniil: “Kama bata wa jikaylom baabu d'înje? Inja miwuul jîkintommi makiim ma jiwaakoormulommi.” 28 Ña di keenool: “Malhegen ûli, nunamulene jak kaan ATA EMIT omu d'aw. Momakiimom ma ukaayumulom ma mbi ubajaal hurim ma ugawaal yaŋaayay. 29 Be mbi ûnuuroli kaan ootubi ûgawreroli makeel majakut, non ma ûli poop ugawulootim makeel ma ûcaalhul di kâsuumaayaku. Moo jaat, hûpiiraahu hata ATA EMIT hohu d'aw.”
30 Ña Isaki nagawiil epeetay ma kuri ban di kujaken. 31 Hata kajom urabaw, di kûcuuk mata yaŋaaya'uyu ma kuga anoowan nanuur, ban di kuwaasoor ma kulaañ di kâsuumaay.
32 Huka'uhu, bugorooraabu bata Isaki, di kûkayil kûriiŋul di keenool: “Enkoloŋay ya uwokum êbule.” 33 Ña Isaki nâwoo'yo Seba. Momakiimom ma êsuka'uyu eenumeyim Bersebad be jaat.