Kuŋil kaaku kata Abrawoŋ
25
Ban Abrawoŋ nayab anñaakan aahu aaneyim Ketura. 2 Ña di kubaj kuŋilaku kaamom: Zinraŋ, di Joksaŋ, di Medaŋ, di Midiyaŋ, di Isbaki, be di Suwa.3 Ban Joksaŋ nabaj Saaba, di Dedaŋ. Dedaŋ nabaj poop Asuriŋ, di Letusiŋ be di Lewmiŋ.
4 Midiyaŋ nabaj Ephaa, di Epheer, di Enooki, di Abida, be di Elda. Bukana'uke peh, kuñool Ketura aamom apañoor Abrawoŋ.
5 Be Abrawoŋ naŋar wahaw watawool peh awul añoolool Isaki. 6 Be ban naŋar poop wahaw waawu awul kawulwul kuŋilaku kata kupañoorool kaaku, ban nagawiil ma kukay ki kukin di etaamay yata ba jaley âcaalhumewuum ma kûrangiyoor di Isaki.
Eketay yata Abrawoŋ
7 Na Abrawoŋ agam ujaañaw êteemeer, di bukanaku êhaaji di kunŋen di hutok (175), 8 ña naket oo ma ahallemmi ban ñekep ñekep, ma akay ki âtoo'dô simpawool sihaan. 9 Be kuñoolool Isaki, koo di Ismayel, di kuhokool di êluŋay yata Makpela, ñata di êsukay yata Manre, di kalhaakaku kata Ephroŋ aamom añool Zowar agam êteew. 10 Kalhaaka'uku ka Abrawoŋ anommi di kuñool Eti, dô da ahokim koo di apañoorool Saara. 11 Be na Abrawoŋ agam nakete, Emitay di ewul añoolool Isaki hûpiiraahu, noo oo ma akimmi ñata di enkoloŋay yaaneyim Laay-Roy.a
Êbajoorumay yata Ismayel
12 Êbajoorumay yata Ismayel aamom añool Abrawoŋ a kubaam koo di Agaar ata Ejiptu, agam amiikeelaw ata Saara, 13 mo ma egam: Ismayel nabaj Nebayoti, ban nabaj Kedaar, di Abdeel, di Mibsan, 14 di Misma, di Dumaa, di Masaa, 15 di Adar, di Tema, di Jetur, di Naphis, be di Kedemaa. 16 Kuŋila'uke kunŋen di egabaay, koo kagam kuñool Ismayel. Be di kuga yahaanay yata sîsukasu satayiil, ban anoowan êsukay yatawool, naga yo kañaaŋaku katawool. 17 Be na Ismayel agam ujaañaw êteemeer di anabawo, di kunŋen di hutok di ugaba (137), naket ma akay ki âtoo'dô simpawool. 18 Be kuñoolool di kukin di etaamay yata Avilaa, di yata Sur, ñata di êsukay yata Ejiptu di karebaku kata ba jaley âcaalhumewuum, di hubangahu hata be Asiiriya; ma kûrangiyoor di kuŋil kaaku kata Abrawoŋ.
Êbajoorumay yata Isaki
19 Êbajoorumay yata Isaki añool Abrawoŋ mo ma egam. 20 Na Isaki agam ujaañaw bukanaku egaba (40), di kuyaboor koo di Rebeeka âliin Laboŋ, kaamom kuñool Betuwel, agam aramew ata êsukay yata Padaŋ-Araŋ.
21 Be mata ma Rebeeka abajutum aŋil, ña Isaki ya alhaw ATA EMIT ma mbi awulool aŋil. Ña ATA EMIT najam kalhawaku katawool, apañoorool naharet. 22 Be balaabu ya kugogoroor di harahu hatawool, ña nâanul: “Kama mata wa ma gawmem d'înje ume?” Ña narink ATA EMIT. 23 Be ATA EMIT naanool: “Aw ma ûkuloorum sîsukasu sigaba.
Mata mbi ubaj sîbajoorumasu sigaba sa mbi sîgiitor.
Êbajoorum yaayu mbi ehaŋ sembe yaayu;
be yaayu yata aahu araheem, mbi ega agorooraaw ata yaayu yata aahu inŋetaaw.”
Êsawu koo di Jako di kubaji
24 Ban na hukahu hata Rebeeka huhuutum, di kûmir kaan magabaamu nâkuloorum. 25 Be na arommi, aahu âtiyaaraw nâyem, ban nâhalet non wañ wata buhal. Mo ma keenumoom Êsawu.b 26 Be aahu agabutaw, oo ma asohulom hutonjahu hata atiyool Êsawu. Moma keenumoom Jako. Na kuñoolool buku kubajim, ampayiil Isaki oo ma agam ujaañaw bukanaku êhaaji (60).
27 Na balaa'ubu bukoobemmi aahu aaneyim Êsawu naga alhuuñaaw, ma ya sûumool kakay di bujalabu. Be atiyool Jako, oo anaw ahepum, ban ya sûumool kalako to di ûngungaw watayiil. 28 Ña ampayiil di sûumool noon Êsawu, mata ma âbujewuum bânunkureŋabu kutokoñ. Be iñaayiil poop, di sûumool Jako.
29 Kûriiŋ huk haahu, Jako nâlew êleway yaaneyim gîsaadu; be atiyool Êsawu nâcaalhumul di bujalabu ma agayum, 30 âriiŋul naanool: “Atii, uñankiit uwulom ma di gîsaadu uyu yatayi yâyemaay ma iri, mata bacaarabu bobu d'înje!” Momakiimom ma kêenummi Êsawu Edoŋ.c
31 Be Jako naanool: “Unoomom jaa hiŋahu hatayi hata karaheraku, niwuli di yo uri.”
32 Ña Êsawu naanool: “Înje, înje umu jamiket bacaarabu! Moo, hiŋahu hata karaheraku, wa mbi îgawum hô?”