Abrawoŋ nalob mata bûyababu bata Isaki
24
Na Abrawoŋ agam nahallene, ATA EMIT oo ma awuloom ban husaanumahu di wah peh. 2 Huk haahu, nâwool agorooraaw atawool ahammi mapiyo dô, akiim mata wahaw peh watawool ma aanool: “Ûhunen kaŋenaku katayi di huboŋahua hûmbaam, 3 ma unuur di kañaaŋaku kata ATA EMIT aamom Emitay yakiim hatiya di emitay, di etaamay, di kaan ootubi ûŋarul anñaakan be bata añoolom di ûjuraw ata di êsuka'uye yata Kanaaŋ da emmi, 4 be mbi ukay be di êsukay yûmbaam ta bukanom kemmi, ma nki ûŋaruu'bo anñaakan a mbi añoolom Isaki ayab.”5 Ña agorooraaw umu atawool narinkool aanool: “Ma anñaakanaw umu alat jaa kâkayil be ube, niŋar añooli be bo di êsuka'uyu ba ûcaalhumulom?”
6 Be Abrawoŋ naanool: “Ootuba usoken ma uŋar añoolom be bo. 7 Mata ATA EMIT aamom Emitay yammi hatiya, yâcaalhellommi di êsukay yata bukanom di eluupay yata ampawom, yoo enuurum ma yeenom mbi ewul êbajoorumay yûmbaam etaama'uye. Moo amalaakaw ata yo, mbi asiseni ma mbi ûbajuu'bo anñaakan uwul añoolom. 8 Be anñaakanaw umu alat jaa kâkayil, aw ubajut to batila. Be manooman, aatuba uŋar añoolom be bo.”
9 Ña agorooraaw umu atawool naŋar kaŋenaku katawool âhunen di huboŋahu hata Abrawoŋ ma anuur âanul mbi aga non ma aloboom. 10 Ban nakay di kameelusii seemo kunŋen, di poop wah waawu wahammi majak wata Abrawoŋ, ma akay di wo be Mesopotaamiya di êsukay ba Nawor akimmi. 11 Na agam nârimbo, jaley poop ma areenemmi, naamom na yaaraay kûkayewuum kamojaku. Ña naga kameelusii ma sîtiigen ñata di enkoloŋay yammi tîyaŋ di hankahu, 12 ban nalhaw Emitay ma âanul: “ATA EMIT, Emitay yata annahaanaw ûmbaam Abrawoŋ, uga buruŋabu bûmbaam ma buwuŋ ma uwul annahaanaw ûmbaam hûpiira. 13 Înje ume ute ma ijummi di enkoloŋay. Ta ûjuraw wata êsuka'uye kûkayewuum be kamojaku. 14 Moo, nîkine ma âjuraw a mbi âriiŋul ute, eenoo'jaa âwalenul elompay yatawool ma isiben, awulom jaa isiben, ban nawul poop kameelusii sûmbaam sisiben, nîmir kaan oo ma ujotum a mbi Isaki ayab. Nîmir poop kaan, nuwule annahaanaw ûmbaam hûpiira.”
Rebeeka nâriiŋul di enkoloŋay
15 Be oo baroŋ ma alobem, nâjukul Rebeeka aamom añool Betuwel, agam ebajulankenay yata Milka koo di Nawor, aamom atii Abrawoŋ, oo ma âkayewuum ma âgawul elompay di kacakaku. 16 Malhegen Rebeeka âjuraw ajakum noon, ban âmirut ânniine. Na ârillom, nariiŋo di enkoloŋay ki âmojul elompay yatawool, ban nâcaalhul. 17 Ña agorooraaw umu ata Abrawoŋ natey ki kupam ma aanool: “Uñankiit uwulom jimel di elompay yatayi isiben.”
18 Ña nâwalenul elompay cab ma aanool: “Annahaanaw uyab usiben.” 19 Na awuloom asiben ban, naanool: “Mbi îmojul poop ma kameelusii satayi peh Sisiben.” 20 Ña nakay cab ki âyumo dâ uncaamaw usibenem, ban natey ki ya âmojul di enkoloŋay be na sisibemmi peh. 21 Be âynaaw umu napato ma ya ajikerool, ma alaso mante ATA EMIT mbi agawool buruŋabu buwuŋ.
22 Na kameelusii sigam sisibene peh, ña âynaaw umu naŋar ekopay yata ûuru ya mânaatamu mata yo muhammi graamab seemo hutok, di poop kunguluŋaku kugaba kata ûuru ka mânaatamu mata ko muhammi graama seemo êteemeer, agawool di kaŋenaku. 23 Ban narinkool aanool: “Âacuu, kama ay abaji? Uñankiit uñaaŋenom, mante pîya nooliye ubaj tiŋ tata kaŋot dâadu ampayi?”
24 Ña âjuraw umu naanool: “Înje Betuwel abajommi, ebajulankenay yata Milka koo di Nawor. 25 Nubaje tiŋatu ta mbi uncaamaw uŋot, di mûhenumaayamu lhay, di poop wah waawu wata huriyahu.”
26 Ña agorooraaw umu ata Abrawoŋ, nâñup be di etaam ma asal ATA EMIT 27 ma âanul: “Usalaal ATA EMIT aamom Emitay yata annahaanaw ûmbaam Abrawoŋ, yawulommi hûpiiraahu ma ibaj buruŋ bawuŋe ma îkayil be di eluupay yata bukanool.”
28 Ña âjuraw umu natey be yanŋiil ki aloo'mo bukanaku kata iñaawool. 29 Be Rebeeka âliinool aaneyim Laboŋ oo too. Ña nâteyil ki ayaaño âynaaw umu di enkoloŋay, 30 mata ma ajuum ekopay, di poop hunguluŋahu di kaŋenaku kata âliinool, ban najam poop ma Rebeeka ya aloom maama âynaaw umu aloboom. Ña mo ma âkayummi ki atookoo'bo oo ma ajummi di kameelusii satawool ñata di enkoloŋay. 31 Âriiŋ naanool: “Mata wa nulako ube tîyaŋ? Ûnebejul! Aw anaw a ATA EMIT awuum hûpiiraahu. Nibandoore ban eluupay, di poop tiŋatu tata kameelusii satayi.”
32 Ña agorooraaw umu ata Abrawoŋ, di kukay di Laboŋ be di eluupay. Na kûrimmi, di kûwalenul wañaw di kameelusii ma kuwuu'so mûhenumaayamu sihen. Ban di kuŋalliil poop mumelamu ma kukullhen ûkandumaw koo di kûynaaku ka kureboorlom. 33 Ban di kûŋarul wahaw wata huriyahu kuwalhenool, be naaniil: “Mumulet bi iri înje balobutuul wahaw wa ikaymulom.” Ña Laboŋ naanool: “Kama ûlobul.”
34 Ña naanool: “Malhegen înje agorooraaw ata Abrawoŋ. 35 Be ATA EMIT nawulool hûpiiraahu hâamak ma asaanumo ma abaj sîgaraniinaasu, di sibaasu, di praata, di ûuru, di bugorooraabu kagam yîinaay, di poop kaaku kagam yaaraay, di kameelusii, di poop simbaamasu. 36 Saara aamom apañoorool, nabajool aŋilaw anor di bahalhenerabu. Be Abrawoŋ nawul aŋilaw umu husaanumahu peh hatawool. 37 Be annahaanaw ûmbaam nagawom inuur ma aanom: ‘Mumulet bi isoken îpaamul anñaakan ata di êsukay yata Kanaaŋ da akimmi, bi añoolool ayab. 38 Be naanom mbi îkayil be ute di eluupay yata ampawool ta bukanool kemmi, ki ipaamen anñaakan ki añoolool ayab.’ 39 Be na alobommom, nirinkool eenool: ‘Ma anñaakanaw umu alat jaa kâkayil?’ 40 Naanom: ‘ATA EMIT a înje îynemmi, mbi âboñul amalaakaw atawool ma asiseni ma mbi buruŋabu batayi buwuŋ, ma mbi ooli ûbajuu'bo anñaakan a mbi añoolom ayab. 41 Be ûriiŋ jaa di eluupay yata bukanaku kûmbaam, kulat ka awuli anñaakan, non ña aw ubajut batila, mata buko kulatum.’ 42 Momakiimom na îrillom jaat di enkoloŋay, nêenul Emitay: ‘ATA EMIT aamom Emitay yata annahaanaw ûmbaam Abrawoŋ, nokoor jaa non mbi uwulom buruŋ bajake, 43 ma emmi ute ñata di enkoloŋay, nîkine ma âjuraw a mbi âkayil ute kamojaku, eenool jaa awulom jimel di elompay yatawool isiben. 44 Be aanom jaa isiben, ban naanom joon mbi awul poop kameelusii sûmbaam sisiben, nîmir kaan oo ma aw ATA EMIT ujotum a mbi añool annahaanaw ûmbaam ayab.’
45 “Be înje baroŋ ma ilobem di êsigiray yûmbaam, Rebeeka nâhankul oo ma agawlom elompay di kacakaku. Na ârillom, nariiŋo di enkoloŋay ma âmojul. Ña neenool añankiit awulom mumel isiben. 46 Ña nâwalenul elompay cab ma aanom: ‘Uyab usiben; ban mbi îmojul joon ma kameelusii satayi poop sisiben.’ 47 Ña nirinkool eenool: ‘Kama ay abajim?’ Naanom: ‘Betuwel abajoom, aamom añool Nawor koo di Milka.’ Ña niŋar ekopay ikopenool di êŋindaay, ban nigawool poop hunguluŋahu di kaŋenaku. 48 Ña ban, nîñup be di etaam ma isal ATA EMIT ma eenool: ‘ATA EMIT aamom Emitay yata annahaanaw ûmbaam Abrawoŋ, neeni jêrejep mata nuwulom buruŋ bajake ma eeli ibaj anñaakan di eluupay yata bukanool a nki añoolool ayab.’ 49 Moo, nîkine irinkuul mante maama annahaanaw ûmbaam abollommi mbi jak, mante leetubi jak? Ma jakut jaa, nikay be tiŋ taatu.”
50 Be Laboŋ koo di Betuwel di keenool: “Ûde peh burokabu bata ATA EMIT, moo ûli mumulet bi ulob makeel. 51 Meemo Rebeeka oome ute, ukay d'oo ma nki añool annahaanaw atayi ayabool non ma ATA EMIT aloom.”
52 Na agorooraaw ata Abrawoŋ ajammi ma kuloom umu, ña nâñup be di etaam ma asal ATA EMIT. 53 Ban nâcaalhenul wahaw wata praata, di wata ûuru, di poop wañaw awul Rebeeka. Ban poop nâcaalhenul wah waawu wajakum awul âliinool, koo di iñaawool. 54 Ña ban di kuri, di kujaken buko di kûynaa'uku ka kureboorlom, ban di kuŋot to. Kûriiŋ hata kajom, agorooraaw umu ata Abrawoŋ naaniil: “Jibonket, nîkine ma ilaañ.”
55 Be âliin Rebeeka, koo di iñaawool di keenool: “Ukob para ma Rebeeka alako haahe, palimo kukaku kunŋen, ña di jikay.”
56 Be oo naaniil: “Jeetuba jigawom umu, mata ATA EMIT nawulom ban buruŋ bajake. Moo, jiwalhom bo ma ilaañ.”
57 Ña di keenool: “Kama ukob ma ûwoolul âacuu ma urinkool.”
Rebeeka nâanul aawo mbi kuyaboor di Isaki
58 Ña di kûwoolul Rebeeka ma kurinkool keenool: “Rebeeka, nûkine ma jikay di âynaaw ume?” Naaniil: “Aa, nîkine.” 59 Ña di kuwalhoo'bo koo di añakanaw âwoyloom, ma kukay di agorooraaw umu ata Abrawoŋ, di poop kûynaa'uku ka kureboorlom. 60 Be ban di kuñaanool ma keenool:
“Âliin, Emitay ekaan ubajoor ma ubaj kuŋil kameeŋe,
ma êbajoorumay yatayi mbi ebaj sembe ehaŋ bukanaku kâsuumutiim,
ma kuhaatiil ma kuyab sîsukasu satayiil.”
61 Ña Rebeeka di kulhaalo koo di ûjuraw kagoroorewoom, ma kugeelo kameelusii ma kukay di agorooraaw umu ata Abrawoŋ.
62 Be Isaki ma akinnom di bantaabu bata Negebi, ña nakay be kajimaku kata enkoloŋay yata Laay-Roy. 63 Âriiŋ huk haahu jaley ma areenemmi, nâcaalh ma akay be di bujalabu kalhawaku kata Emitay, na agam lhâar naŋanden kameelusii ma sîreesewuum. 64 Rebeeka poop naga lhâar naŋandenool, ña nâwalowul di kameelu, 65 ban narink agorooraaw ata Abrawoŋ ma aanool: “Kama âynaaw umu âcaalhumewuum di bujalabu ki upamaal, aymoom?” Ña naanool: “Umu annahaanaw ûmbaam.” Ña Rebeeka naŋar bewc yatawool ma âhipen buulabu.