Saara naket
23
Ban na Saara agam ujaañaw êteemeer di anabawo di hutok di ugaba (127), 2 ña naket di êsukay yata Kiriyati-Arba baamom Ebroŋ, di etaamay yata Kanaaŋ. Be Abrawoŋ nakaawool noon, ma ya alhooŋooro.3 Ban nalhaalo ta ehuluŋaayay yemmi, ma akay ki alob di kuñool Eti ma aaniil: 4 “Kutiyaay înje amaasooraaw ammi ûde, moo jiñankiit ma jînoomom tiŋ iga husaahahu ta eelim ihok apañoorom.”
5 Be kuñool Eti di keenool: 6 “Annahaanaw, uñankiit utallhen maama mbi ulobi! Aw annahaanaw âamak ata Emitay ammi ute d'ûli, moo uhok apañoori di husaahahu ha ûkimmi, mata an atukalat ma uhok apañoori di usaah hakeel hâtooli.”
7 Ña Abrawoŋ nalhaalo ma âsik, 8 ban naaniil: “Nokoor jaa non jîkine ma ihok apañoorom, di jiñankiit ma jilob di Ephroŋ aamom añool Zowar, 9 ma anoomom kâgoboŋaku kata Makpela kakangum di kalhaakaku katawool, ma mbi incaamool maama mbi apinom, ma mbi tiga husaahahu hûmbaam.”
10 Be Ephroŋ oo too ma kuleehom di êsukay. Ña nâŋaaŋulo ma bukanaku peh kaleehotom di êtingaay kujam ma aan Abrawoŋ: 11 “Iyiy, mumulet bi iga mo. Utallhen, meemo êsukay yooye ute, înje mbi iwuli to, be di kaverna santom. Moo uŋa'to ma uhok apañoori.”
12 Be Abrawoŋ nalaañ joon âsik ta êsukay yemmi, 13 ban naan Ephroŋ: “Uñankiit oonom jaa aawo, nincaami ma mbi eeli ihok apañoorom.”
14 Ña Ephroŋ naanool: 15 “Annahaanaw, utallhenom. Tiŋatu non utu, ya tinoomi bancaamabu bârimmi sîteemeer sibakiir (400) bata praata. Moo, bancaama'ubu wa beelim bugawola? Uhok to apañoori.”
16 Ña na Abrawoŋ ajammi ma Ephroŋ aloboom umu, ña napeeso praata non ma apinoom, awuloo'to di êsukay. 17 Ña tiŋa'utu tata Ephroŋ tammi Makpela ñata Manre, di kaverna uyu, di poop uyaajaw peh wândom, dôo peh di di ga data Abrawoŋ. 18 Ma kuñool Eti, di poop bukana'uku kalakotom di êtingaay yata êsukay, kujuum ma Abrawoŋ anoon to.