Emitay di elaso Abrawoŋ
22
Ban piyo, Emitay di elaso Abrawoŋ ma yeenool: “Abrawoŋ!” Abrawoŋ nâwool ma aan yo: “Înje ume.” 2 Di yeenool: “Uŋar añooli anoraw aamom Isaki a uboolaatum, ma ukay d'oo be di hurimbiliŋahu ha mbi îyisi di bantaabu bata Moriya, ûriiŋ nûbujoo'dô, ban nureemenool ma uwulom opherta.”3 Ña hata kajom, Abrawoŋ nalhaalo urabaw ma abandoor embaamay yatawool, ban nacac uyaajaw wa nki âreemenum wahaw wa mbi âwaasenum, ban poop naŋar kugorooraaku katawool egaba, di añoolool Isaki ma kukay be ba Emitay eloboom di bo. 4 Na kugam kukaku kûhaaji, Abrawoŋ najiker naŋanden tiŋa'utu. 5 Ña naan kugorooraaku katawool: “Jilako ute di embaamay, ma ûli ukay di añoolom be di hurimbiliŋa'unha ma nki ûbinken Emitay, ban nûlaañul.”
6 Ña ban, naŋar uyaajaw uwu apeenen Isaki, ma oo asoh sambunasu di esapaay ma kukay buko egaba. 7 Be na kugam koo kakayem, Isaki narink ampawool aanool: “Ampoom.” Abrawoŋ naanool: “Añoolom, înje ume.” Ña naanool: “Sambunasu soose di uyaajaw, moo êgaraniinaay yôoyey ya nki uwaasenuma?”
8 Be Abrawoŋ naanool: “Añoolom, Emitay mbi ewulola êgaraniinaay ya nki uwaasenuma.” Ña di kujaŋen buko egabaay ma kukay. 9 Na kugam kûriiŋe tiŋatu ta Emitay eloboom di to, ña Abrawoŋ nacookoor to Altar,a ban naga dô uyaajaw. Ban nagenk añoolool aamom Isaki ma ataloo'dô. 10 Be na agam nañuure ma âsohul esapaay ma abujool, 11 amalaakaw ata ATA EMIT, nâŋaaŋulowumul hatiya di emitay ma aanool: “Abrawoŋ! Abrawoŋ!” Abrawoŋ naanool: “Înje ume.”
12 Ña amalaakaw umu nallool: “Aatuba ubuj añooli. Mowme nîmire kaan ya ujam di Emitay, mata ulatut di añooli anoraw.”
13 Ña Abrawoŋ naga lhâar, ban ajeg kujeeŋandawool, najuk êgaraniinaay yîinaay ma usiinaw wata yo ulhakum di hûñoobahu. Ña nakay ki âŋaruu'yo areemen âwaasenum yo ma eŋar hiŋahu hata añoolool. 14 Ña Abrawoŋ naga kañaaŋaku kata tiŋa'utu “ATA EMIT Awulem Wah.” Ña tiŋa'utu di têemi kañaaŋa'uku be jaat.
15 Amalaakaw ata ATA EMIT, nâwoolumul Abrawoŋ joon hatiya di emitay 16 ma aanool: “Înje ATA EMIT neene, inuuri kañaaŋaku kûmbaam kaan, ma ugam ume, ma ulatutum di añooli anoraw, 17 manooman mbi iwuli hûpiiraahu ma êbajoorumay yatayi mbi emeeŋ non boot, di emeeŋ poop non hulhuus hata hubeereera. Êbajoorumay yatayi poop, mbi kuhaat kûsuumutaaku katayiil ma kuyab etaamay yatayiil. 18 Malhegen mata ma uyaam hurimahu hûmbaam, êsukay yata etaamay peh, mbi kubaj hûpiiraahu mata êbajoorumayb yatayi.”
19 Ban Abrawoŋ nâlaañul ki atoo'to kugorooraaku katawool, ban di keet be Berseba baamom ba akimmi.
Êbajoorumay yata Nawor
20 Ban piyo maa, di kuñaaŋen Abrawoŋ kaan Milka nabaje kuŋil atiyool aamom Nawor: 21 Haahu araheem naaneyim Ûs, atiyool yaani Bus, di Kemuwel aamom ampaw Araŋ, 22 nabaj poop Kesed, di Asu, di Pildas, di Jidlap, di poop Betuwel. 23 Betuwel naga ban nabaj Rebeeka. Kuŋila'uku hutok di êhaaji, ko ka Milka kubaam di Nawor aamom atii Abrawoŋ. 24 Apañoorool poop aahu aaneyim Rewma, nabajool kuŋil kaaku kaamom: Teba, di Gawaŋ, di Taas, di poop Maaka.