Isaki nabaji
21
Ban ATA EMIT nañankiit Saara ma agawool non ma aloboom. 2 Ña na tîrimmi na Emitay eloboom di no, naharet ma âbajul Abrawoŋ aŋilaw, noo Abrawoŋ bahalleneeban. 3 Ña Abrawoŋ nagawool kañaaŋaku kata Isaki. 4 Be na aŋilaw umu agam kukaku hutok di kûhaaji, Abrawoŋ nagawool huhaanaahu hata yîinaay non ma Emitay eloboom. 5 Nownu na Isaki abajim, Abrawoŋ ma aganom ujaañaw êteemeer (100).6 Ña Saara nâanul: “Emitay egawom jaat nîlhuwe, ban poop bukanaku ka mbi kujam mûmbaam, mbi kûlhu poop.” 7 Ban nâanul joon: “Ay âyneneene kaan înje mbi ibajeen Abrawoŋ aŋil? Be jaat palimo ma ahallemmi ume, Emitay egawom ibajool aŋil.”
8 Na Isaki agam nakoobene, iñaawool nâcaalhenool di baraahabu. Di huka'uhu, ampawool Abrawoŋ naga no epeetay.
Agaar koo di añoolool Ismayel
9 Saara najuk Ismayel aamom añool Agaar ata Ejiptu agam amiikeelaw atawool a kubaam di Abrawoŋ, ma ya arinemmi añoolool Isaki, 10 ña naan Abrawoŋ: “Uga amiikeelaw umu, koo di añoolool ma kûcaalh, mata mumulet bi añoolool alako ute ma mbi kûgiitoor wahaw watayi di añoolom.”
11 Ña Abrawoŋ sûumutool, mata Ismayel poop añoolool. 12 Be Emitay di yeenool: “Aatuba unongoor mata ampa di poop iñaawool aamom amiikeelaw atayi, be uga non ma apañoori alobim, mata êbajoorumay yatayi di Isaki mbi epinumi. 13 Be ampa umu aamom añool amiikeelaw atayi mbi igawool ma aga ampaw êsuk yâamak, mata oo poop añooli.”
14 Hata kajom, ña Abrawoŋ nalhaalo urabaw ma aŋar hûmburuwaahu, ban naga mumelamu di humbootaahu hata kabaŋaku ma awul Agaar agalo, ban nawulool añoolool Ismayel ma akay d'oo.
Ña Agaar nakay ma ya areesoor di ekinkay yata Berseba.
15 Na mumelamu mugam mubawe di humbootaa'uhu, naleehen añoolool di bagoogaayabu bata buyaajabu. 16 Ban nakay ki aleeho râagi rewoor, mata ma ammi âkint ajuk añoolool oo ma aketem. Ña naleeho to ma ya akaaw.
17 Be Emitay di ejam ma aŋilaw umu ya akaawum, ña amalaakaw ata yo nâwoolumul Agaar hatiya di emitay ma aanool: “Agaar, kama wa ugawi ma ukaawumem? Aatuba ûkoli mata Emitay ejame karimaku kata añooli ta ammi. 18 Moo, ulhaalo ma ukay ki usohool, mata oo poop mbi igawool aga êsuk yâamak.”
19 Ña Emitay di ega Agaar ma ajuk enkoloŋay, ña nakay ki âmojul humbootaa'uhu hata kabaŋaku, ban nakay ki awul añoolool ma asiben.
20 Ban Emitay di epooy ampa umu ma akooben di kâsuumaayaku. Ña naga ban nakin di ekinkay yata Paraŋ ma aga bo alhuuñaaw. 21 Iñaawool napaamellool añakanaw ata êsukay yata Ejiptu ayab.
Abrawoŋ di kuga yaŋaayay di Abimeleeki
22 Nownu Abimeleeki koo di annahaanaw ata esellooraay yatawool aaneyim Phikol, di kukay be baabu Abrawoŋ kûriiŋ di keenool: “Ûli nûmire kaan Emitay yoyu d'aw mata wahaw peh wa ugawem ya ujak. 23 Moo unuur Emitay kaan ootubi ubuntenom ma ugawom kôji, palimo kuñoolom, palimo poop ebajulankenay yûmbaam! Moo mbi uga jak bukanaku kata di etaama'uye da ukaylom bi ukin, non ma înje poop igawim jak.”
24 Ña Abrawoŋ naanool: “Inuuri!” 25 Ban nâyis Abimeleeki kaan sûumutool ma bugorooraabu batawool kubotum enkoloŋay d'oo di sembe. 26 Be Abimeleeki naanool: “Înje îmirut makeel, ban îmirut anaw agamom poop! Kama mata wa ma uñaaŋenumutommi? Înje inkit majamem di mo d'aw!”
27 Ña Abrawoŋ naŋar sîgaraniinaasu, di sibaasu, awul Abimeleeki ma kuga yaŋaayay. 28 Be naŋar sîgaraniinaasu hutok di sigaba, aga bûto. 29 Ña Abimeleeki narinkool aanool: “Kama mata wa ma ûgawummi sîgaraniinaa'usu bûto?” 30 Abrawoŋ naanool: “Înje iwulisom ma îyis kaan malhegen enkoloŋa'uyu, înje iwokuyom.” 31 Momakiimom tiŋa'utu di teeni Berseba,a mata to ta kunuurum.
32 Na kuloom mata yaŋaaya'uyu Berseba, ban Abimeleeki koo di annahaanaw ata esellooraay yatawool aaneyim Phikol, di kulaañ be di êsukay yata philistewwi. 33 Ña Abrawoŋ nagiiten to buyaajabu baaneyim tamarisk, ban na âbinken to ATA EMIT agam Emitay Yantom be Nanoonan. 34 Ban Abrawoŋ nalako bo piyo di êsuka'uyu yata philistewwi.