Abrawoŋ nâanul Saara ntuwa apañoorool
20
Ban Abrawoŋ nâcaalh di êsukay yata Manre, ma akay ki akin di bantaabu bata Negebi, ma atuto êsukay yata Kadis di yata Sur. Ban na agam nakaye ki alako di êsukay yata Jerar, 2 yâanul Saara âliinool. Ña Abimeleeki agam âyyaw ata dô, naboñ ma kuŋallool Saara be di kâyyaku katawool.3 Be Emitay di elob di Abimeleeki di sîyawutasu busonnaaru ma yeenool: “Jijaa, aw mbi uket! Mata añakanaw umu a uŋallom, omu ma asoñom.”
4 Be Abimeleeki oo bagororutool. Ña narink ATA EMIT ma aanool: “Kama mbi ûbuy êsukay yabajutum kûbajumiñ? 5 Kama ntuwa oo aanommi anñaakana'ume âliinool? Anñaakanaw ume poop naanom malhegen âliinool. Moo înje igawut kôji.”
6 Ña Emitay di elob joon d'oo di sîyawutasu ma yeenool: “Înje nîmire kaan ugawut wah wakojuwe, momakiimom poop ma iwalhutumibom ma ugorool, ma aatuba mbi ubaj hûbajumiñ d'înje. 7 Moo uŋarool ulaañen apañoorool, mata âynaaw umu añaaŋenaaw ata kûboñaku kûmbaam. Oo mbi alhaw batayi ma ootuba mbi uket. Be ulat jaa kalaañenool, mânooman mbi uket, be di bukani peh.”
8 Ña Abimeleeki nâlhaalowul bûjomaru bîb ma âwoolul bugorooraabu batawool peh ma alobii'mo. Ña di kûkoli noon. 9 Ban, nâwoolul Abrawoŋ ma arinkool aanool: “Kama mata wa ma ûgawumolim ume? Hûbajumiñ bu, nibaje d'aw, makiim nûgawoli ume buhiira'ube? Wahaw wa ûgawolim ume ûgaworiiti.” 10 Ban narinkool joon aanool: “Kama wa nunongum, makiim nûgawum ume?”
11 Be Abrawoŋ naanool: “Înje, înje inongum nêenul bukanaku kata ûde kûkoliit Emitay, moo manooman mbi kubujom mata apañoorom. 12 Be poop malhegen oo âliinom, mata âmpawoli anor, ban uwoogut iñaawaay. Be nuyaboor. 13 Mata na Emitay yeenommi îcaalhul di eluupay yata ampawom ma ikay be bin baabu, neen Saara: ‘Ma mbi îmir kaan ya ujam d'înje, tiŋ peh ta mbi ûriiŋa, nooniil înje âliini.’ ”
14 Ña Abimeleeki nalaañen Abrawoŋ apañoorool Saara. Ban nawulool poop, sîgaraniinaasu, di sibaasu, di poop emiikeelay kagam yîinaay, di poop yaaraay. 15 Ban naanool: “Jijaa etaamay yûmbaam yooye, tiŋatu ta ûkimmi, nukin.”
16 Ban poop naan Saara: “Jijaa niwule ban âliini bancaamabu bârimmi ênjunni (1.000) bata praata, ma bukani mbi kunamulen kaan aw ubajut hûbajumiñ.”