Emitay di yeen Jako akay be Betel
35
Ban Emitay di yeen Jako: “Ulhaalo ma ukay be di êsukay yata Betel ma nki ulako bo. Ban nucookoor Altar be bata înje Emitay jâcallhim na uteylom atiyi Êsawu.”2 Ña Jako naan bukanaku katawool, di bukaaku ka ya kureboorum: “Jîcaalhenul ûkiinaw watawuul peh jibet, ban di jîbuyoor di Emitay, ban di jitiinoor wañaw watawuul. 3 Mata ma ukaayaal be Betel ban nki icookoor Altar be bata Emitay yaamom yaanenommi na ihiirum, ban di esisenom tiŋootiŋ ta ikayum.” 4 Ña di kûŋarul ûkiinaw watayiil, di sikopasu sa kugawem di ûjaŋayaw watayiil kuwul Jako. Ña Jako naŋar wahaw uwu peh, ban nâhunen buyaajabu bâamak baaneyim karvaaju bammi ñata Sikeŋ ma alhink wo to. 5 Ña na kugam kukaye, Emitay di ega bukanaku kata sîsukasu sa kukotoorum ma kûkoliyiil. Ña an asokent asoolheniil.
6 Ña Jako koo di bukanaku katawool di kûriiŋ tiŋatu taaneyim Lûs, taaneyim poop Betel, tammi di etaamay yata Kanaaŋ. 7 Na ârintom, nacookoor to Altar ban naga to kañaaŋaku kata El Betel, mata to ta Emitay êcallhoom na ateyum atiyool Êsawu.
Eketay yata Deebora
8 Ban Deebora aamom âwoyuum Rebeeka naket, ña di kûhunen di buyaajabu baaneyim karvaaju ñata Betel ma kuhokoo'to. Momakiimom di kûgawum bo kañaaŋaku kata Aloŋ-Bakuti.a
9 Na Jako alaañumulom di êsukay yata Padaŋ-Araŋ, Emitay di êcallhool joon, ban di ewulool hûpiiraahu 10 ma yeenool: “Malhegen kañaaŋaku katayi Jako, be hukahu hata jaat mbi uwaa'ko ma ôomi Israyel.” Ña di egawool ma âami Israyel.
11 Ban di yeenool joon: “Înje, înje igam Emitay yata Sembaasu, mbi ubaj bukanaku huc, ma êbajoorumay yatayi eyej. Ban sîsukasu, di poop kâyyaku mbi kûcaalhumul d'aw. 12 Moo, etaamay ya iwuum ampayi ahaan aamom Abrawoŋ, di poop ampayi Isaki, mbi iwuli yo, ban mbi iwuu'yo poop êbajoorumay yatayi.” 13 Ban Emitay di ewalhoo'to ta ya eloom d'oo ma ekay.
14 Ña Jako najuumen eliŋay yata kuwaaliisaku tiŋa'utu ta kuloom di Emitay, ban nâyu to bunukabu, di êduuliinay. 15 Ban naga to kañaaŋaku kata El Betel.
Eketay yata Rakeel
16 Ban Jako koo di bukanool, di kûcaa'to Betel ma kukay. Be na kuhuutum di êsukay yata Ephraata,b Rakeel aamom apañoor Jako hukahu hatawool di hûriiŋ, be nâlaam noon. 17 Be mata ma âlaamum noon, abuunenaaw naanool: “Sâkoli, mbi ûcaalhul di aŋilaw di kâsuumaay.” 18 Be di hûlaama'uhu, Rakeel di heekool ma aket. Be na agam ma aket, ña naga aŋilaw umu îinaaw a aroŋum, kañaaŋaku kata Benooni.c Be ampawool nagawool kaaku kata Benjamiŋ.d
19 Ña Rakeel naket, Jako naŋarool ki ahok ñata di buruŋabu bata êsukay yata Ephraata yaamom Beleŋ. 20 Ban najuumen to eliŋay yata jawollhaaju di êluŋay yata apañoorool. Be be jaat, huwalisa'uhu hohu to.
21 Ban Jako najaŋen be kayooŋ âriiŋ najuumen bûngungabu batawool di êsukay yata Migdal Eder.e 22 Be koo boo di êsuka'uyu, Rubeŋ nakay ki akumen di Biila aamom apañoor ampawool. Be ampawool naga ban nâmiimo.
Kuñool Jako
Be Jako oo ma abaanom kuŋilaku kîinaaku kunŋen di egaba kagam yîinaay.
23 Leeya nabajiil keemo hutok di an anor: Âtiyaaraw atawool naaneyim Rubeŋ, aahu Simiyoŋ, aahu Levi, aahu Judaa, aahu Isakaar, aahu Zebuloŋ.
24 Kata Rakeel keemo egaba: Jose, di Benjamiŋ.
25 Kata Biila aamom amiikeelaw ata Rakeel keemo egaba: Daŋ, di Naphtali.
26 Kata poop Ziilpa aamom amiikeelaw ata Leeya keemo egaba: Gaadi, di Aseer. Kuŋila'uku peh kata Jako, ka abajulom di êsukay yata Padaŋ-Araŋ.
Eketay yata Isaki
27 Ban Jako nakay ki kûjukoorul di ampawool di êsukay yata Manre, yammi ñata êsukay yata Kiriyati-Arba yaamom Ebroŋ, baamom ba ampawool ahaan Abrawoŋ, di ampawool Isaki kulakuwemmi. 28 Be ampawool aamom Isaki nalako to ujaañaw êteemeer di bukanaku ebakiir (180), 29 naket ma nki âtoo'dô simpawool, ña Êsawu koo di atiyool Jako, di kuhokool.