Emitay di ega Abroŋ kañaaŋ kaaku
17
Na Abroŋ agam ujaañaw bukanaku ebakiir di kunŋen di hutok di ubakiir (99), ATA EMIT nâcallhool ma aanool: “Înje Emitay yahammi wahaw peh. Moo, urees jak ma uga non ma înje ilobim. 2 Mata mbi ugawa yaŋaayay, ban mbi iga êbajoorumay yatayi emeeŋ noon.”3 Ña Abroŋ nâtiigen ma aya hûriiŋahu hatawool di etaam. Emitay di yeenool: 4 “Wahaw wa mbi igawi mata yaŋaayay yatoola, mbi igawi ma uga ampaw âmbasuk bameeŋe. 5 Ban poop bukanaku keetunki keeni joon Abroŋ,a be mbi ya keeni Abrawoŋ,b mata ma igawim ampaw ata bâsuk bameeŋe. 6 Mbi iga ma êbajoorumay yatayi emeeŋ noon, ma bâsuk bameeŋe, di poop kîyyaku, mbi kûcaalhumuu'dô. 7 Moo, yaŋaayay ya mbi ugawa, mbi elako to be nanoonan di êbajoorumay yatayi, ma mbi iga Emitay yatayi, di poop yatayiil. 8 Ban poop di etaama'uyu yata Kanaaŋ da ugam amaasooraaw, mbi iwuli yo, aw di êbajoorumay yatayi be nanoonan; ban înje mbi iga Emitay yatayiil.”
9 Ban Emitay di yeen Abrawoŋ joon: “Usoh jak yaŋaayay ya ugawam, be di êbajoorumay yatayi be nanoonan. 10 Be maame mbi ya jiga, ânniinewooniine ammi yanŋi, mbi agawi huhaanaahu hata yîinaay. 11 Mbi jigawi huhaanaahu hata yîinaay, ma ga êmanjumay yata yaŋaayay yûmbaam di miwuul. 12 Na mbi aŋilooŋil îinaaw ata di êbajoorumay yatawuul abaji aga kukaku hutok di kûhaaji, di jigawool huhaanaahu hata yîinaay; di poop emiikeelay yatawuul kabajim saŋuul, di poop kaaku ka jinommi kagawutum bukanuul, di jigawii'ho. 13 Palimo aŋil a abajim yanŋi, be mante a unoommi, mbi ugawool huhaanaa'uhu. Mata êmajuma'uyu ya igam di siniilasu satawuul, yoo egam êmanjumay yata yaŋaayay yûmbaam di miwuul be nanoonan. 14 Be an peh îinaaw agawutim huhaanaa'uhu, mbi âcaalheni di êsukay yatawuul, mata ma ahuusuum yaŋaayay ya ugawam.”
Emitay di ega Saray kañaaŋ kaaku
15 Ban Emitay di yeen Abrawoŋ joon: “Saray aamom apañoori, maame aatubi âami Saray, be mbi ya aani Saara.c 16 Mata mbi iwulool hûpiiraahu ma jibaj aŋil, ban mbi aga iñaaw bâsuk bameeŋe, ban poop kîyyaku kata bâsukabu mbi kûcaalhumul d'oo.”
17 Ña Abrawoŋ nâtiigen ma aya hûriiŋahu di etaam, ban ya âlhu di bûyegetabu batawool ma âanul: “Înje jami iga ujaañaw êteemeer (100), neeliye ibaj aŋil? Apañoorom Saara oma aga ujaañaw bukanaku ebakiir di kunŋen (90), naaliye poop abaj aŋil?” 18 Ban Abrawoŋ naan Emitay: “Înje neene aw uwul Ismayel kâsuumaay.”
19 Be Emitay di yeenool: “Malhegen apañoori aamom Saara mbi abaj aŋilaw, ban mbi ugawool kañaaŋaku kata Isaki.d Mata d'oo mbi îjuumenum yaŋaayay yatoola yaatumbi ebawrer be di êbajoorumay yatawool. 20 Be non ma uloom mata Ismayel, nijame. Mbi iwulool hûpiira ma abaj kuŋilaku huc ma êbajoorumay yatawool mbi eyej. Ban mbi igawool aga ampawaayaw ata yahaanay kunŋen di egaba, ban mbi igawool aga anaw ata bâsuk bameeŋe. 21 Be yaŋaayay yatoola, di Isaki mbi îjuumenum yo a apañoori Saara, mbi abaj tima maame bulay.”
22 Na Emitay egam elobe di Abrawoŋ ban, ña di ekay.
23 Ña huka'uhu, Abrawoŋ naga non ma Emitay eloboom, ma aga huhaanaahu hata yîinaay añoolool Ismayel, di bukan kaaku kîinaaku kabajim yanŋool, di poop kaaku ka anollom. 24 Be na Abrawoŋ agawim huhaanaahu hata yîinaay, oo ma aganom ujaañaw bukanaku ebakiir di kunŋen di hutok di ubakiir (99). 25 Ismayel naga no poop ujaañaw kunŋen di ûhaaji (13). 26 Ma kugawi no huhaanaahu di hukahu hanorahu, 27 di poop kaaku kagam yîinaay kabajim yanŋool, di poop kaaku ka anollom.