Agaar koo di Ismayel
16
Be Saray aamom apañoor Abroŋ, abajut aŋil. Be amiikeelaw ata Saray aaneyim Agaar ata Ejiptu oo to. 2-3 Na Abroŋ agam ujaañaw kunŋen di êsukay yata Kanaaŋ, apañoorool naŋar amiikeelaw atawool aamom Agaar ata Ejiptu ma aanool: “Ma ATA EMIT awulutommi aŋil, uŋar amiikeelaw ume ûmbaam uyab, mante nabajom aŋil.” Ña Abroŋ nayab hurima'uhu. Ña nawulool amiikeelaw umu ayab.4 Ña na Abroŋ agam nayabe Agaar, naharet. Be na Agaar âmiim kaan omu di harahu, ña ya arembeel Saray aamom akiloom.
5 Ña Saray naan Abroŋ: “Aw ukiimom ma Agaar arembeelumem d'înje jaat. Mata înje iwuliwoom uyab; be jaat naharete, oma arembeelem di înje! Moo, Ata Emit mbi agawola batalenabu.”
6 Be Abroŋ naanool: “Amiikeelaw ume magam aw ukiloom, uga non ma ûkimmi.” Ña Saray nâgaykoor Agaar; ña nateyool.
7 Be Amalaakaw ata ATA EMIT najukool oo di ekinkay ñata di enkoloŋay yammi di buruŋabu bata Sur, 8 naanool: “Agaar, amiikeelaw ata Saray, ûbey nûcaalhumulom? Ma ukay ûbey?” Agaar naanool: “Înje iteyem di anaw akilommi aamom Saray.”
9 Be Amalaakaw ata ATA EMIT naanool: “Ulaañ be baabu di anaw akilim, ûriiŋ nujam d'oo.” 10 Ban naanool joon: “Mbi iga êbajoorumay yatayi ma emeeŋ poopii an aatubi aali apin yo.”
11 Ban naanool joon:
“Jijaa, aw umu di harahu, be na mbi uroŋ,
aŋilaw umu nugawool kañaaŋaku kata Ismayel,a
mata Ata Emit najuke hûlaamahu hatayi.
12 Be mbi aga non ênunkureŋ yata bujal,
ma leetubi sûumool an,
bukanaku poop peh, leetubi sûumiwool,
ban mbi akin râagi kutiyool.”
13 Ña Agaar nâwool ATA EMIT alobulom d'oo ma aanool: “Aw Emitay yajukem,” mata ma ammi: “Kama pîya, înje ijuum anaw ajukommi?” 14 Momakiimom enkoloŋa'uyu yammi ñata êsukay yata Kadis di Beredi, di yeeni Beer-Laay-Roy.b